11 信心系肯定希望嘅事一定实现，系睇唔见嘅事实嘅确凿证据。 2 凭住信心，古人得到上帝嘅认可。
3 凭住信心，我哋睇出各个制度都因为上帝嘅话语而安排好，所以而家睇得见嘅都系嚟自睇唔见嘅。
4 凭住信心，亚伯将祭牲献俾上帝，比该隐献上嘅更好。由于呢种信心，佢得到上帝嘅认可，表明佢系正义嘅，因为上帝接纳咗佢嘅礼物。虽然佢死咗，但系仍然凭住信心讲说话。
5 凭住信心，以诺被带走，佢死嘅时候冇经历痛苦。上帝带走咗佢，就冇人揾到佢嘞。佢被带走之前，上帝已经向佢表明，佢赢得上帝嘅喜悦。 6 人冇信心，就冇可能赢得上帝嘅喜悦，因为到上帝面前崇拜佢嘅人一定要相信佢存在，亦都要相信佢会奖赏恳切寻求佢嘅人。
7 凭住信心，挪亚听到上帝嘅警告、知道仲未睇见嘅事之后，显出敬畏嘅心，建造方舟，救咗自己一家。佢嘅呢种信心表明当时嘅世界被毁灭系罪有应得嘅，佢亦都因为信心而得到正义嘅地位。
8 凭住信心，亚伯拉罕受上帝呼召嘅时候就服从命令，去上帝俾佢做产业嘅地方。佢虽然唔知道要去边，但系仍然离开自己嘅地方。 9 凭住信心，佢住喺上帝承诺赐予嘅土地，就好似外族人住喺异乡一样，佢同埋得到同一个承诺嘅以撒、雅各都住喺帐篷。 10 亚伯拉罕一直等待嗰座有真正根基嘅城，亦即系上帝设计同建造嘅城。
11 凭住信心，撒拉虽然过咗生育嘅年纪，但系都能够怀孕，因为佢相信赐承诺俾佢嘅上帝系值得信赖嘅。 12 所以，佢丈夫嘅身体虽然同死咗冇分别，仍然能够生到子子孙孙，数目好似天上嘅星咁多，亦都好似海边嘅沙一样多不胜数。
13 呢啲人到死嘅时候仍然咁有信心，虽然仲未得到承诺嘅福分，但系远远见到，就好期待呢啲承诺实现，亦都公开声明自己喺当地系外来嘅，系寄居嘅。 14 噉样讲嘅人表明，佢哋恳切寻求一个属于自己嘅地方。 15 如果佢哋念念不忘离开咗嘅家乡，其实仲有机会返去， 16 不过佢哋竭力追求一个更好嘅地方，系隶属于天嘅。所以，佢哋向上帝呼求，视佢为自己嘅上帝，上帝冇以佢哋为耻，反而为佢哋准备咗一座城。
17 凭住信心，亚伯拉罕受考验嘅时候几乎献上咗以撒。当时，呢个开开心心噉得到承诺嘅人，准备好献上自己嘅独生子。 18 即使上帝同佢讲过，“从以撒而出嘅先至会称为‘你嘅后代’”，佢依然噉样做。 19 佢知道，就算以撒死咗，上帝都可以令以撒复活。结果，亚伯拉罕真系从死亡中得到返以撒，呢件事就成为象征。
20 凭住信心，以撒祝福雅各同以扫嘅时候，预告咗未来嘅事。
21 凭住信心，雅各喺离世之前，扶住佢支杖崇拜上帝，祝福约瑟嘅两个仔。
22 凭住信心，约瑟临终嗰阵提到以色列人会离开埃及，亦都留低指示，点样处理自己嘅骸骨。
23 凭住信心，摩西嘅父母喺摩西出世之后，将佢收埋咗三个月。因为佢哋见佢生得好靓，亦都唔怕违反国王嘅命令。 24 凭住信心，摩西长大之后就唔肯被称为法老个女嘅仔。 25 佢选择同上帝嘅子民一齐受虐待，而唔系享受犯罪带嚟嘅短暂快乐， 26 因为喺佢眼中，即使成为受上帝任命嘅人会受到羞辱，仍然比埃及嘅财宝有价值得多。佢注视嘅，系将来会得到嘅奖赏。 27 凭住信心，佢离开埃及，唔怕国王发嬲。佢坚定不移，就好似见到人睇唔见嘅上帝。 28 凭住信心，佢守逾越节，将血洒喺门框，以免天使执行毁灭嘅时候，伤害以色列人当中头生嘅人畜。
29 凭住信心，以色列人穿过红海，好似喺干地上面行一样。埃及人都尝试过去，但系就俾海水吞灭咗。
30 凭住信心，以色列人围绕住耶利哥嘅城墙行咗七日之后，城墙就冧咗嘞。 31 凭住信心，妓女喇合友善噉接待咗探子，结果冇同嗰啲唔服从上帝嘅人一齐失去生命。
32 唔通我仲需要举多啲例子？如果我仲要讲埋基甸、巴拉、参孙、耶弗他、大卫、撒母耳同埋其他先知嘅事迹，就唔够时间嘞。 33 凭住信心，佢哋打败敌国，伸张正义，得到上帝嘅承诺，封住狮子嘅口， 34 挡住烈火嘅威力，逃离刀剑嘅利刃，由软弱变得强大，喺战场勇猛作战，击溃入侵嘅军队。 35 有啲女人嘅亲人死而复生。有啲人为咗得到更好嘅复活，宁愿忍受酷刑，都唔肯为咗获释而背弃信仰。 36 有啲人遭受考验，例如被嘲笑、鞭打，甚至被锁住、被囚禁。 37 佢哋俾人用石头打死，受到考验，俾人用锯锯开，用刀剑杀死。佢哋披住绵羊山羊嘅皮颠沛流离，陷于贫困，忍受患难，俾人虐待。 38 呢个世界根本配唔起佢哋。佢哋流落荒漠、山岭、洞穴、地穴，漂泊无定。
39 由于有信心，呢啲人全部都得到上帝嘅认可，但系仲未得到佢承诺嘅福分， 40 因为上帝一早打算俾更好嘅奖赏我哋，令佢哋唔会早过我哋获致完美。