19 之后，我听到天上有洪亮嘅声音，好似系一大班人喺度讲说话。佢哋话：“要赞美耶和华！救恩、荣耀、力量都属于我哋嘅上帝， 2 因为上帝嘅判决又公平又正义。大娼妓用淫乱腐化咗大地，上帝已经对佢执行判决，向佢追讨血债，为自己嘅奴隶申冤嘞。” 3 佢哋即刻再讲一次：“要赞美耶和华！焚烧呢座城嘅烟会永永远远向上升。”
4 嗰24个长老同四个活物就跪喺度，崇拜宝座上嘅上帝，话：“阿们！要赞美耶和华！”
5 有声音由宝座发出，话：“上帝嘅所有奴隶，敬畏佢嘅人啊，无论长幼尊卑，你哋都要不断赞美我哋嘅上帝。”
6 我又听到有好似一大班人嘅声音，好似急流嘅声音，亦都好似雷霆嘅声音，话：“要赞美耶和华，因为耶和华我哋全能嘅上帝成为君王嘞。 7 我哋要欢欣雀跃，将荣耀归于佢，因为绵羊羔举行婚礼嘅时候到嘞，佢嘅新娘已经准备好。 8 有明亮洁净嘅上等细麻衣俾新娘着，细麻衣象征圣民嘅正义行为。”
9 天使同我讲：“你要噉样写：受到邀请参加绵羊羔婚宴嘅人真系有福！”佢又同我讲：“呢啲说话系上帝讲嘅，都系真㗎。” 10 我一听到，就跪喺佢脚前想崇拜佢。但系佢同我讲：“唔好呀！唔好噉样做！你要崇拜上帝！我只系奴隶，同你仲有你嗰啲为耶稣作证嘅弟兄都一样。上帝指引人发言，就系要为耶稣作证。”
11 我见到天打开咗，睇吓！有一匹白马。骑马嗰位称为“忠信真实”，佢根据正义去审判同作战。 12 佢嘅眼好似火焰，头上戴住好多王冠。佢身上写咗一个名，除咗佢自己，冇人认识呢个名。 13 佢身上着住染咗血迹嘅外衣，佢个名叫做“上帝嘅话语”。 14 天上嘅军队都骑住白马，着住白色、洁净嘅上等细麻衣跟随佢。 15 佢口里面伸出一把利剑，用嚟攻击列国。佢亦都要用铁杖统治佢哋，仲会踩全能嘅上帝盛怒嘅酒榨。 16 喺佢外衣上面，近大髀嘅地方写咗一个名，就系“万王之王，万主之主”。
17 我又见到一个天使企喺太阳嗰度，大声呼喊，向所有喺空中飞翔嘅雀鸟话：“嚟呢度聚集啦，参加上帝盛大嘅宴席， 18 噉样你哋就可以食君王嘅肉、将军嘅肉、壮士嘅肉、马同骑士嘅肉，可以食所有人嘅肉，冇分自由人定系奴隶，亦都唔分长幼尊卑。”
19 我见到野兽、地上嘅列王同佢哋嘅军队都聚集埋一齐，要同嗰位骑马嘅仲有佢嘅军队作战。 20 野兽同假先知都被捉住。假先知曾经喺野兽面前施行神迹，迷惑咗接受野兽嘅记号同埋崇拜兽像嘅人。野兽同假先知就活生生噉被掟入烧住硫磺嘅火湖里面。 21 其余嘅人都俾嗰位骑马嘅，用口里面伸出嘅长剑杀死。所有飞鸟都去食佢哋嘅肉，仲食饱咗。