11 我好希望你哋能够容忍我有少少唔合理。其实你哋而家就要容忍我嘞！ 2 我非常关心你哋，就好似上帝关心你哋一样。我亲自将你哋许配俾一个丈夫，就系基督，我想将你哋好似贞洁嘅处女一样献俾佢。 3 不过，我惊你哋嘅思想俾人腐化，失去对基督应有嘅诚恳同贞洁，就好似夏娃俾蛇用诡计诱惑一样。 4 我噉样讲系因为，如果有人嚟传讲另一个耶稣，唔系我哋传讲嘅，要你哋领受另一种精神，唔系你哋已经领受嘅，叫你哋接受另一种好消息，唔系你哋已经接受嘅，你哋反而轻易容忍呢啲人㖞。 5 我认为自己冇一样嘢比唔上你哋嗰啲超等使徒。 6 就算我冇口才，都绝对唔系冇知识。我哋喺各方面，喺所有事上，都已经向你哋表明呢一点。
7 我委屈自己，令你哋受到显扬，仲开开心心噉将上帝嘅好消息免费传俾你哋，唔通我噉样做系犯罪咩？ 8 我接受其他会众嘅资助，就好似抢咗佢哋嘅嘢嚟为你哋服务噉。 9 我喺你哋嗰度嘅时候无论缺少乜嘢，都冇成为你哋任何一个人嘅负担，因为我需要嘅一切，马其顿嚟嘅弟兄都充足噉供应俾我。喺各方面，我从来都冇成为你哋嘅负担，将来亦都唔会。 10 只要我仲有基督嘅真理，我喺亚该亚一带都会继续噉样夸耀。 11 点解呢？系咪因为我唔爱你哋呢？上帝知道我系好爱你哋㗎。
12 我而家做嘅，将来都会做，就系唔俾嗰啲人揾到任何借口去夸耀自己嘅地位。佢哋一直想证明自己同我哋同等。 13 呢啲人系假使徒，行事诡诈，假扮基督嘅使徒。 14 噉唔出奇吖，因为撒但都一直假扮光明嘅天使。 15 所以佢嘅仆人一直假扮正义嘅仆人，我都唔觉得出奇。佢哋做咗乜嘢事，就会有乜嘢下场。
16 我再讲多次，唔好认为我唔合理。就算你哋真系觉得我唔合理，都请你哋接纳我，俾我稍为夸耀一下。 17 而家我噉样讲，唔系学习主嘅榜样，而系好似一个唔合理嘅人，自以为是噉夸耀。 18 既然有好多人攞世俗嘅条件嚟夸耀，我都要夸耀吓。 19 你哋咁“通情达理”，自然乐意容忍唔合理嘅人。 20 其实，就连嗰啲奴役你哋，侵占你哋财产，抢你哋嘢，鄙视你哋，掌掴你哋嘅人，你哋都能够容忍！
21 我噉样讲，我哋自己都觉得冇面，因为有啲人会以为我哋好软弱。
不过我要讲句唔合理嘅说话：如果有人够胆夸耀，我都够胆夸耀。 22 佢哋系希伯来人咩？我都系。佢哋系以色列人咩？我都系。佢哋系亚伯拉罕嘅后代咩？我都系。 23 佢哋系咪基督嘅仆人？我要狂妄噉讲，我更加系。我做嘅工作比佢哋更多，坐监嘅次数比佢哋更多，俾人打过无数次，试过好多次几乎冇命。 24 我俾犹太人打过五次，每次四十减一下； 25 我俾人用棍打过三次，有一次差啲俾人用石头打死，遭遇船难三次，曾经一日一夜喺大海漂浮； 26 我经常远行，经历江河嘅危险、强盗嘅危险、同族嘅危险、外族嘅危险、城入面嘅危险、旷野嘅危险、海上嘅危险、假弟兄嘅危险， 27 劳苦艰辛，不眠不休，又饥又渴，经常缺粮，唔够衫着，挨冷受冻。
28 除咗呢啲外在嘅事，我日日都为各群会众忧虑。 29 如果有人觉得软弱，其实我都感同身受。如果有人令人失足跌倒，我又点会唔嬲呢？
30 如果我一定要夸耀，我会夸耀自己软弱嘅一面。 31 主耶稣嘅上帝，佢嘅爸爸，系应该永远受到赞美嘅，佢知道我唔系讲紧大话。 32 我喺大马士革嘅时候，亚里达王手下嘅总督把守住大马士革城，想逮捕我， 33 不过因为有人用一个篮将我由城墙上嘅窗口放落去，所以我先可以逃过佢嘅毒手。