5 基督释放我哋，就系想我哋得到呢种自由。所以你哋要立场坚定，唔好再负起奴隶嘅担子，再受约束嘞。
2 我保罗而家同你哋讲，如果你哋受割礼，基督做嘅嘢就对你哋一啲益处都冇。 3 我再次提醒任何接受割礼嘅人，佢有义务遵守整套摩西法典。 4 如果你哋边个想靠住法典称为正义嘅人，就同基督隔绝，离开咗佢嘅分外恩典。 5 但系我哋系靠住神圣力量热切等待，盼望达至完全正义㗎。呢种正义系因为信心而有嘅。 6 对于同基督耶稣联合嘅人嚟讲，受唔受割礼都唔重要，有信心先至重要。呢种信心系通过爱心表现出嚟嘅。
7 以前你哋做得好好㗎，系边个阻碍你哋继续服从真理呢？ 8 噉样唆摆你哋离开真理嘅，唔系嗰位呼召你哋嘅上帝。 9 少少酵就可以令成个面团发大。 10 你哋系同主联合嘅人，我好肯定你哋会同意我嘅睇法。不过，无论边个喺你哋当中制造混乱，都会受到应得嘅审判。 11 各位弟兄，如果我仲传讲割礼，而家又点会受到迫害呢？如果我噉做，苦刑柱嘅道理早就唔再系绊脚石嘞。 12 我恨不得嗰啲令你哋混乱不安嘅人阉割咗自己。
13 各位弟兄，你哋受呼召系要得到自由，但系唔好将呢种自由当成机会，去放纵有罪嘅欲望。要受爱心推动而互相效劳， 14 因为“爱人如己”呢条诫命体现咗成套法典嘅精神。 15 但系要小心，如果你哋继续相咬相吞，就有可能同归于尽嘞。
16 我想讲，你哋要不断顺应神圣力量行事，噉就绝对唔会将有罪嘅欲望付诸行动。 17 由于罪性引发嘅欲望，罪性同神圣力量对抗，神圣力量亦都同罪性对抗。呢两样嘢互相对立，结果你哋想做嘅事，你哋偏偏冇做。 18 另外，你哋如果受神圣力量引导，就唔再受法典约束嘞。
19 顺应罪性嘅行为都系明显嘅，有淫乱、不洁、无耻嘅行为、 20 拜偶像、通灵、敌对、争执、忌恨、大发脾气、纷争、分裂、鼓吹宗派思想、 21 妒忌、醉酒、狂欢，同埋其他类似嘅事。关于呢啲事，我以前警告过你哋，而家再次警告你哋，有呢啲恶习嘅人，都唔能够承受上帝嘅王国。
22 另一方面，神圣力量嘅果实有爱心、喜乐、安宁、耐心、仁慈、良善、信心、 23 温和、自制。噉样嘅特质冇法律禁止。 24 再讲，属于基督耶稣嘅人，已经将有罪嘅身体、有罪身体嘅欲望同埋渴求，全部都钉喺木柱上面嘞。
25 如果我哋已经顺应神圣力量生活，就应该继续按照神圣力量嘅引导行事为人。 26 我哋唔应该自命不凡，互相挑起竞争，互相妒忌。