6 你哋同弟兄有纷争，竟然够胆告上法庭？点解你哋要喺唔信主嘅人面前解决，而唔喺会众嘅圣民面前解决呢？ 2 你哋唔知道，将来圣民会审判世人咩？既然你哋将来会审判世人，又点会冇能力审理呢啲小事呢？ 3 你哋唔知道，我哋将来会审判天使咩？既然系噉，我哋就更加应该审理地上嘅事嘞。 4 所以，你哋既然需要审理地上嘅事，点解仲要请唔系会众嘅人嚟主持公道呢？ 5 我噉讲，系要令你哋惭愧。喺你哋当中冇人能够审理弟兄之间嘅纷争咩？唔通连一个有智慧嘅人都冇？ 6 系咪一定要弟兄告弟兄，喺唔信主嘅人面前解决呢？
7 你哋互相控告，其实就已经失败嘞。点解唔宁愿蚀底啲，就算俾对方呃，都由得佢呢？ 8 但系你哋竟然占人便宜，呃自己嘅弟兄！
9 你哋唔知道不义嘅人唔能够承受上帝嘅王国咩？唔好自己呃自己嘞，无论系淫乱嘅、拜偶像嘅、通奸嘅、有同性恋行为嘅、 10 偷窃嘅、贪心嘅、醉酒嘅、辱骂人嘅、敲诈人嘅，都唔能够承受上帝嘅王国。 11 你哋有啲人都曾经系噉，但系而家奉我哋主耶稣基督嘅名，靠住我哋上帝嘅神圣力量，已经洗净，成为圣洁，称为正义嘅人嘞。
12 任何事我都可以做，但系唔系每件事都有益处。任何事我都可以做，但系我唔会俾任何事控制。 13 食物系用嚟满足肚腹嘅需要，而肚腹就系用嚟吸收食物，不过上帝会令呢两样嘢都唔再存在。身体唔系用嚟淫乱，系用嚟为主服务嘅，而主就供应我哋身体嘅需要。 14 另外，上帝既然施展大能令主复活，亦都会令我哋死而复生。
15 你哋唔知道你哋嘅身体就系基督身体嘅一部分咩？既然系噉，我可唔可以将基督身体嘅一部分攞去同妓女结合呢？当然唔可以！ 16 你哋唔知道同妓女结合嘅，就系同佢合为一体咩？因为上帝话：“二人合为一体。” 17 但系同主结合嘅，就系同佢有同一种精神嘞。 18 你哋要远远避开淫乱！人犯其他罪都唔会直接影响自己嘅身体，不过淫乱嘅人系得罪自己嘅身体。 19 你哋唔知自己嘅身体就系圣殿，喺你哋里面有嚟自上帝嘅神圣力量咩？更何况，你哋并唔属于自己， 20 因为你哋系上帝用高价买返嚟嘅。所以，你哋要用身体尊崇上帝。