8 我哋想讲嘅重点系：我哋有一位噉样嘅大祭司，佢已经喺高天之上，坐喺伟大上帝嘅宝座右边， 2 喺真圣幕嘅至圣所服务。呢个圣幕系耶和华搭建嘅，唔系人搭建嘅。 3 每一位大祭司都系受委任去献礼物同祭牲嘅，所以呢位大祭司都一定要献上祭物。 4 如果佢仲喺地上，就唔会系祭司嘞，因为已经有祭司按照法典献上礼物。 5 呢啲祭司嘅神圣职务系天上事物嘅象征同影子。所以摩西要建造圣幕嘅时候，上帝吩咐话：“呢一切，你都要仔细按照我喺山上俾你睇嘅设计去造。” 6 不过，而家耶稣得到更加优越嘅职务，因为佢为更好嘅誓约做中间人。呢个誓约已经根据更好嘅承诺喺法律上确立咗嘞。
7 如果第一个誓约系毫无瑕疵嘅，根本就唔需要第二个誓约。 8 不过上帝指责佢嘅子民话：“耶和华话：‘时候就快到嘞，我要同以色列人同埋犹大人订立一个新约。 9 呢个新约同我之前同佢哋祖先订立嘅誓约唔一样。当日我拖住嗰啲人嘅手，带佢哋离开埃及，同佢哋立约。不过佢哋冇遵守我嘅誓约，所以我唔再理佢哋。’呢个系耶和华讲嘅。”
10 “耶和华话：‘嗰段时期之后，我要同以色列人立噉样嘅约：我要将我嘅法律放喺佢哋嘅脑海，写喺佢哋嘅心入面。我要做佢哋嘅上帝，佢哋要做我嘅子民。
11 “‘佢哋唔会再教导同胞同埋弟兄，话：“要认识耶和华！”因为佢哋所有人，无论长幼尊卑，都会认识我。 12 我要宽恕佢哋嘅不义，唔再谂返佢哋嘅罪恶。’”
13 既然上帝提到“新约”，就表示前一个誓约已经过时。呢个陈旧过时嘅誓约，就快消逝嘞。