19 亚波罗喺哥林多期间，保罗去匀内陆地区，然后落去以弗所，喺嗰度见到一啲门徒。 2 保罗同佢哋讲：“你哋成为信徒嗰阵，有冇得到神圣力量？”佢哋话：“冇呀。我哋从来都冇听过可以得到神圣力量㗎㖞。” 3 保罗问：“噉你哋接受嘅系乜嘢浸礼呀？”佢哋话：“约翰嘅浸礼。” 4 保罗话：“约翰嘅浸礼系象征悔改嘅，佢吩咐民众要相信喺佢之后嚟嗰位，亦即系耶稣。” 5 佢哋一听到佢噉讲，就奉主耶稣嘅名受浸嘞。 6 保罗将手放喺佢哋身上，佢哋就得到神圣力量，开始讲唔同嘅外语，受上帝启示发言， 7 当时大约有12个男人。
8 连续三个月，保罗都喺会堂勇敢向人传道，用令人信服嘅论据讲解上帝嘅王国。 9 不过有啲人好固执，唔肯相信，仲当众诬蔑主道。于是保罗带埋门徒离开，唔同佢哋一齐。保罗日日喺推拉诺嘅讲堂发表演讲， 10 噉样持续咗两年，结果亚细亚行省嘅居民，无论系犹太人定系希腊人，全部都听到上帝嘅话语。
11 上帝不断通过保罗施行非凡嘅奇迹， 12 有人甚至将保罗掂过嘅手巾、围裙放喺病人身上，佢哋嘅病就好返嘞，邪灵亦都喺啲人身上出嚟。 13 有啲犹太人周围去驱逐邪灵，企图用主耶稣嘅名去驱逐附喺人身上嘅邪灵，佢哋话：“我奉保罗传扬嘅耶稣之名，命令你哋出嚟。” 14 犹太祭司长士基瓦嘅七个仔都噉样做。 15 不过邪灵就话：“我识耶稣，亦都知保罗系边个，但系你哋系边个呀？” 16 俾邪灵附身嗰个人即刻扑去佢哋身上，攻击佢哋，将佢哋一一制伏，结果佢哋全部都受咗伤，赤身由间屋走出嚟。 17 所有住喺以弗所嘅犹太人同希腊人都知道呢件事，人人都因为噉而敬畏上帝，从嗰时起，耶稣嘅名更加受到尊崇。 18 好多成为信徒嘅人都喺大家面前，坦白承认自己曾经做过嘅嘢。 19 唔少经常施行魔法嘅人将佢哋啲书攞出嚟，堆埋一齐，当众烧咗佢。佢哋计一计书嘅价值，先至知道总共值五万块银钱。 20 就系噉，耶和华嘅话语继续发挥强大嘅力量，不断传开，节节得胜。
21 呢啲事结束之后，保罗决定去完马其顿同亚该亚，就去耶路撒冷。佢话：“我去完嗰度之后，都要去罗马。” 22 于是佢派提摩太同以拉都呢两个助手去马其顿先，而自己就暂时留喺亚细亚行省。
23 嗰个时候，因为主道引发咗一场骚乱。 24 有个银匠叫底米特，佢制造阿耳忒弥斯银龛，令到啲工匠赚咗好多钱。 25 佢召集呢啲工匠同其他同行，话：“各位，你哋都好清楚，我哋系靠呢门生意发达嘅。 26 你哋见到亦都听到㗎啦，呢个叫保罗嘅人唔单止喺以弗所，仲喺几乎成个亚细亚行省，说服咗一大班人改信另一套道理，话用人手造出嚟嘅并唔系神。 27 噉样落去，我担心唔单止我哋呢个行业嘅名声会受到影响，而且伟大嘅女神阿耳忒弥斯嘅神殿都会俾人蔑视，就连呢位喺全亚细亚行省同全世界受人崇拜嘅女神都会威严尽失。” 28 民众听到呢番说话，就非常之激气，开始大嗌：“以弗所人嘅阿耳忒弥斯伟大非凡！”
29 于是全城大乱，啲人拉住同保罗一齐嚟嘅同伴，就系该犹同亚里达古呢两个马其顿人，一齐冲入剧场。 30 保罗本来好想走入人群，但系门徒唔俾佢噉做。 31 有啲负责筹备节期同竞技活动嘅官员一向对保罗好友善，佢哋都派人嚟劝佢唔好冒险去剧场。 32 当时情况好混乱，有啲人嗌呢样，有啲人嗌嗰样，其实大部分人都唔知道点解喺嗰度聚集。 33 有人将一个叫亚历山大嘅人由人群当中拉出嚟，犹太人将佢推去前面。亚历山大想向民众发言，就用手势示意大家安静。 34 不过大家一认出佢系犹太人，就异口同声噉大嗌：“以弗所人嘅阿耳忒弥斯伟大非凡！”佢哋就噉样嗌咗大约两个钟。
35 城入面嘅书记官终于使大家安静落嚟，之后佢话：“各位以弗所人，世上有边个唔知道以弗所城守护伟大嘅阿耳忒弥斯神殿，同埋从天而降嘅神像呢？ 36 既然呢个系事实，冇办法否认，你哋就唔好咁冲动，应该平心静气。 37 你哋带嚟嘅呢啲人，冇抢劫我哋嘅神殿，亦都冇亵渎我哋嘅女神。 38 我哋有开庭嘅日子，亦都有行省总督，如果底米特同埋啲工匠想控告边个，佢哋到时大可以互相控告。 39 但系如果你哋有其他要求，就一定要召开一个正式会议去解决。 40 今日发生嘅事，我哋实在有被控叛乱嘅危险。噉样聚集一大班人引起骚乱，我哋根本揾唔到理由去交代。” 41 讲完之后，佢就打发啲人走嘞。