3 所以我同你哋讲，我保罗为咗基督耶稣而坐监，为咗你哋嚟自列国嘅人而被监禁。 2 你哋一定听过，上帝将管家嘅职责交托俾我，要我帮助你哋得到佢嘅分外恩典。 3 通过上帝嘅启示，我知道咗神圣秘密。之前我喺信里面都提过吓呢一点。 4 你哋读到呢封信，就会知道我已经理解关于基督嘅神圣秘密。 5 历代以嚟，呢个秘密系世人唔知道嘅，不过而家就通过神圣力量向佢嘅圣使徒同埋先知揭示出嚟。 6 呢个秘密就系，列国嘅人通过好消息，通过同基督耶稣联合，能够一齐承受产业，成为身体嘅一部分，同我哋一齐领受上帝嘅承诺。 7 由于上帝施展大能，赐分外恩典俾我做礼物，我就成为宣扬呢个秘密嘅仆人。
8 喺所有圣民当中，我连最微不足道嘅都比唔上，不过上帝将呢个分外恩典赐俾我，要我向列国嘅人宣扬好消息，就系基督会带嚟无限嘅福分， 9 亦都要我帮助所有人明白同神圣秘密有关嘅管理安排。（自古以嚟，创造万物嘅上帝一直将呢个秘密隐藏起嚟。） 10 噉样，天上执政嘅、当权嘅，而家就可以通过会众，知道上帝丰富多彩嘅智慧嘞。 11 呢件事所根据嘅，系上帝按我哋嘅主基督耶稣而制定嘅永恒旨意。 12 我哋对基督有信心，就能够通过佢，放心向上帝倾诉，怀住信念亲近上帝。 13 所以，请你哋唔好由于我为你哋遭受患难就灰心放弃，因为我嘅患难能够为你哋带嚟荣耀。
14 因为噉，我向天父屈膝祷告。 15 （天上地上嘅所有家族，都系因为佢先至存在。） 16 我祈求充满荣耀嘅上帝凭住佢嘅大能，运用佢嘅神圣力量，令你哋内心坚强。 17 我亦都祈求，你哋由于有信心，基督会住喺你哋心里面，而且你哋当中都充满爱心。愿你哋喺信仰上扎根奠基， 18 噉样，你哋就能够同所有圣民一齐彻底领会真理嘅长阔高深， 19 亦都认识基督嘅爱，佢嘅爱超越知识，令你哋能够充满上帝所赐嘅各种特质。
20 上帝能够喺我哋身上施展力量，成就非凡嘅事，远远超过我哋所求所想嘅一切。 21 上帝配得荣耀，愿佢通过会众，亦都通过基督耶稣，世世代代、永永远远得享荣耀。阿们。