23 嗰个时候，耶稣对民众同埋门徒讲： 2 “抄经士同法利赛派自以为有同摩西一样嘅地位。 3 佢哋话俾你哋听嘅所有嘢，你哋系要遵守嘅，但系唔好学佢哋嘅行为，因为佢哋净系识讲唔识做。 4 佢哋要人守规条就好似将重担放咗喺人哋嘅膊头，但系自己连用一只手指去掂吓都唔肯。 5 佢哋做嘅所有嘢，都系做俾人睇。例如，佢哋将当做护身符嘅经文匣整到大一大，又将衫嘅穗边加长。 6 佢哋钟意坐喺晚宴最好嘅地方、会堂最好嘅座位， 7 又钟意人哋喺市集广场嗰度恭敬噉同佢哋打招呼，亦都钟意人哋称呼佢哋做‘拉比’。 8 但系，你哋唔好接受‘拉比’呢个尊称，因为你哋嘅‘老师’只有一位，你哋全部都系弟兄。 9 你哋亦都唔好尊称地上任何人做‘父’，因为你哋嘅父只有一位，就系天父。 10 你哋亦都唔好接受‘领袖’嘅尊称，因为你哋嘅领袖只有一位，就系‘基督’。 11 你哋当中最大嘅，一定要做仆人，为人服务。 12 边个抬高自己，就会被贬低；边个内心谦卑，就会被抬高。
13 “抄经士同法利赛派啊，你哋呢啲虚伪嘅人有祸嘞！因为你哋将天上王国嘅门闩埋，唔俾人入，唔单止自己唔入去，连人哋想入去都唔准。 14 －－－
15 “抄经士同法利赛派啊，你哋呢啲虚伪嘅人有祸嘞！因为你哋为咗令一个人改信犹太教，不惜横越海洋陆地，到佢成为信徒嘞，你哋就令佢比你哋更加有罪，更加应该被揼入欣嫩谷。
16 “你哋有祸嘞！你哋系盲嘅，但系就为人带路。你哋同人讲：‘边个指住圣殿发誓，可以唔算数；但系边个指住圣殿入面嘅黄金发誓，就一定要遵守誓言。’ 17 你哋呢啲又盲又蠢嘅人！到底系黄金重要啲吖，定系令黄金成为圣物嘅圣殿重要啲呢？ 18 你哋仲话：‘边个指住祭坛发誓，可以唔算数；但系边个指住祭坛嘅祭物发誓，就一定要遵守誓言。’ 19 你哋呢啲盲嘅人！到底系祭物重要啲吖，定系令祭物成为圣物嘅祭坛重要啲呀？ 20 所以，指住祭坛发誓嘅，其实就系指住祭坛同埋祭坛上面所有嘢发誓； 21 指住圣殿发誓嘅，其实就系指住圣殿同埋住喺圣殿嘅上帝发誓； 22 指住天发誓嘅，其实就系指住上帝嘅宝座，同埋坐喺宝座上面嘅发誓。
23 “抄经士同法利赛派啊，你哋呢啲虚伪嘅人有祸嘞！因为薄荷、刁草、孜然，你哋就奉献十分之一，但系反而漠视法典上更加重要嘅事，就系公正、怜悯、忠信。奉献十分之一系需要嘅，但系唔代表噉就可以忽略法典上更重要嘅事。 24 你哋系盲嘅，但系去为人带路。蚊虫你哋就隔出嚟，但系骆驼你哋反而吞咗佢！
25 “抄经士同法利赛派啊，你哋呢啲虚伪嘅人有祸嘞！因为你哋洗干净杯碟嘅外面，但系入面就装满晒贪婪同埋放纵。 26 盲眼嘅法利赛派啊，洗干净杯碟嘅里面先啦，噉外面都会变得干净。
27 “抄经士同法利赛派啊，你哋呢啲虚伪嘅人有祸嘞！因为你哋好似扫咗白灰嘅坟墓，表面好睇，但系入面充满死人嘅骨头同埋各种不洁嘅嘢。 28 同样，喺人眼中你哋睇起嚟系正义嘅，但系其实内心充满虚伪同埋不法。
29 “抄经士同法利赛派啊，你哋呢啲虚伪嘅人有祸嘞！因为你哋修建先知嘅坟，粉饰正义嘅人嘅墓， 30 仲话：‘如果我哋生活喺我哋祖先嘅时代，一定唔会同佢哋一齐杀害先知，分担佢哋嘅血债。’ 31 噉即系话，你哋承认自己系杀害先知嘅人嘅子孙啦。 32 你哋即管做埋你哋祖先未完成嘅恶事啦！
33 “你哋系蛇，系毒蛇嘅子孙，你哋可以逃避判决，唔使被揼入欣嫩谷咩？ 34 由于你哋做咗呢啲坏事，我会派先知、智者、导师嚟到你哋呢度。有啲你哋会杀死，喺木柱上面处决；有啲你哋会喺会堂入面鞭打，由一座城迫害到另一座城。 35 所以，地上所有正义嘅人被杀嘅血债都要由你哋偿还，由正义嘅亚伯开始，去到巴拉加嘅仔撒迦利亚为止，呢个撒迦利亚就系你哋喺圣殿前面，祭坛附近杀死嘅嗰位。 36 我可以好肯定噉同你哋讲，呢一代人要为所有呢啲事承担责任。
37 “耶路撒冷，耶路撒冷，你杀死先知，又用石头打死上帝派嚟你呢度嘅人。我一次又一次想聚集你啲仔女，就好似母鸡将鸡仔聚集去佢对翼下面噉！但系你哋唔愿意。 38 所以，上帝会舍弃你哋嘅圣殿。 39 我话俾你哋知，由而家起，你哋绝对唔会再见到我，直到你哋话：‘奉耶和华嘅名而嚟嘅嗰一位系有福嘅！’”