1 我系雅各，系上帝同主耶稣基督嘅奴隶。我写信俾分散各地嘅12个部族。
你哋好！
2 我嘅弟兄，你哋遇到各种考验嘅时候，要将呢一切视为喜乐嘅事， 3 因为知道，你哋嘅信心经过验证，就会产生忍耐。 4 但系，要俾忍耐完全发挥作用，噉你哋就可以完整齐备，喺各方面都无可指责，毫无欠缺。
5 你哋有边个缺乏智慧，都应该不断向上帝祈求，就可以得到智慧，因为上帝对每个人都好慷慨，而且唔责骂人。 6 不过，人应该怀住信心不断祈求，一啲都唔好怀疑，因为怀疑嘅人就好似海浪俾风吹动一样，起伏不定。 7 噉样嘅人唔好以为可以喺耶和华嗰度得到乜嘢。 8 呢种人三心两意，做任何事都摇摆不定。
9 卑微嘅弟兄应该因为自己受到提升而欢欣， 10 有钱嘅人亦都应该因为自己受到贬低而欢欣，因为佢最终会好似花草一样消逝。 11 正如太阳升起，酷热会令草木枯萎，花朵凋谢，失去美丽嘅外表，有钱嘅人都一样，佢喺追逐财富嘅路上都会消逝。
12 喺考验下保持忍耐嘅人有福嘞，因为佢受到认可之后，就会获得生命嘅冠冕。呢个系耶和华承诺赐俾一直爱佢嘅人㗎。 13 人受到考验嘅时候，唔应该话：“系上帝考验我。”因为冇嘢可以令上帝做坏事，而上帝都唔会用坏事去考验人。 14 其实每个人受考验，系俾自己嘅私欲勾引同诱惑嘅。 15 私欲既然怀胎，就会生罪出嚟；罪一旦达到目的，就会带嚟死亡。
16 亲爱嘅弟兄，唔好被误导嘞。 17 各种美好嘅礼物同埋完美嘅赏赐，都嚟自天上，系天上亮光之父所赐嘅。佢同会移动嘅影子唔同，绝对唔会改变。 18 佢嘅旨意系通过真理嘅话语俾生命我哋，令我哋喺佢创造嘅人类当中，好似最早献上嘅收成一样。
19 亲爱嘅弟兄，你哋唔好忘记，人人都要乐于聆听，唔好急住讲嘢，唔好轻易发嬲， 20 因为人嘅愤怒唔能够伸张上帝嘅正义。 21 所以，你哋要摆脱一切污秽同埋每一丝恶念。你哋要用温和嘅态度接受上帝嘅话语，噉佢嘅话语就可以喺你哋心里面扎根。上帝嘅话语能够拯救你哋嘅生命。
22 你哋要实践上帝嘅话语，唔好净系听咗就算，谂啲错误嘅道理嚟自己呃自己。 23 因为人听咗上帝嘅话语但系唔实践，就好似人照镜，望住自己块面， 24 望完就走开，即刻唔记得自己系点嘅样。 25 但系，人如果仔细噉睇带嚟自由嘅完美法律，仲时刻遵守，佢就系付诸实行，而唔系听完就忘记。佢会因为实践出嚟而得到福分。
26 一个人如果认为自己崇拜紧上帝，但系冇好好约束自己嘅舌头，就系呃紧自己，佢嘅崇拜一啲价值都冇。 27 喺上帝我哋嘅爸爸眼中，洁净而冇污秽嘅崇拜，就系要关心照顾遭遇患难嘅孤儿寡妇，而自己亦都唔好俾世俗玷污。