1 我系保罗，按照上帝嘅旨意做基督耶稣嘅使徒。我同我哋嘅弟兄提摩太， 2 一齐写信俾歌罗西嘅圣民，即系同基督联合嘅忠信弟兄。
愿上帝我哋嘅爸爸将分外恩典同安宁赐俾你哋。
3 每次我哋为你哋祷告，都感谢上帝，亦即系我哋嘅主耶稣基督嘅爸爸， 4 因为我哋听到你哋对基督耶稣有信心，亦都对所有圣民有爱心。 5 你哋有呢种信心同爱心，因为你哋有希望得到天上嘅奖赏。你哋以前听到呢个希望，系因为有人向你哋传讲好消息，宣扬真理。 6 呢个好消息喺全世界结出果实，成果越嚟越多。自从你哋当初听到而且确切认识上帝嘅分外恩典，好消息就喺你哋当中有好好嘅成果。 7 你哋系喺我哋亲爱嘅同伴以巴弗嗰度，学到上帝嘅分外恩典嘅。佢同我哋一齐工作，系基督嘅忠心仆人，代替我哋为大家服务。 8 佢亦都话俾我哋知，你哋由于神圣力量而显出爱心。
9 所以，由我哋听到你哋嘅情况嗰日开始，就不断为你哋祷告，我哋求上帝令你哋对佢嘅旨意充满确切嘅知识，有充足嘅智慧，而且因为神圣力量而有理解力。 10 噉样，你哋行事为人就能够对得住耶和华，做任何事都令佢喜悦，喺各种善行上不断结出果实，而且不断增加关于上帝嘅确切知识。 11 我哋都祈求，上帝用佢荣耀嘅大能，赐你哋充足嘅力量。噉样，你哋就能够有耐心同喜乐，凡事忍耐， 12 而且感谢天父，因为佢令你哋有资格同嗰啲喺光明里面嘅圣民，一齐得到产业。
13 上帝救我哋脱离咗黑暗嘅权势，带我哋去到佢爱子嘅王国里面。 14 通过佢嘅仔献出嘅赎价，我哋得到释放，罪亦都得到宽恕。 15 呢个仔系人睇唔见嘅上帝嘅形象。喺受造万物当中，佢系头生子， 16 因为天上嘅、地上嘅，包括睇得见嘅、睇唔见嘅，无论系在位嘅、统治嘅、执政嘅、当权嘅，全部都系通过佢而创造嘅。其余嘅万物都系通过佢、为咗佢而创造嘅。 17 佢喺其余嘅万物出现之前已经存在嘞，而其余嘅万物都系通过佢先至存在。 18 佢系身体嘅头，呢个身体就系会众。佢系开始，系死人当中第一个复活嘅，所以能够喺万物当中居于首位。 19 因为上帝按照自己嘅意思，令佢嘅仔喺各方面都毫无欠缺，应有尽有， 20 而且通过佢喺苦刑柱上流出嘅血促成和睦，令其余嘅一切，无论系天上嘅定系地上嘅，都可以通过佢同上帝和好。
21 以前你哋远离上帝，系佢嘅敌人，因为你哋谂嘅都系邪恶嘅事。 22 不过，而家上帝已经通过基督嘅身体，同埋佢嘅死，令你哋同上帝和好。噉样，上帝就能够将你哋带到自己面前，系圣洁无瑕、无可指责嘅。 23 当然，你哋要继续留喺信仰里面，喺根基上坚定不移，唔好放弃好消息带嚟嘅希望。你哋听到嘅好消息已经传遍天下，受造众生都知道嘞。我保罗就系宣扬呢个好消息嘅仆人。
24 而家我为咗你哋受苦，反而觉得开心。为咗基督嘅身体，亦即系会众，我承受紧基督所受嘅患难，不过我受嘅患难仲未够。 25 上帝为咗你哋，将管家嘅职责交托俾我，所以我为会众服务，彻底传讲上帝嘅话语， 26 传讲神圣秘密。以前，喺各个时代嘅制度当中，呢个秘密一直隐藏，不过而家就向上帝嘅圣民揭示出嚟。 27 上帝乐意俾嚟自列国嘅圣民知道，神圣秘密充满荣耀嘅财富。而呢个秘密就系：基督同你哋联合，令你哋有希望得享佢嘅荣耀。 28 我哋传扬嘅就系佢。我哋尽力劝诫同教导每个人，将充足嘅智慧同人分享，噉样，我哋就能够帮助每个同基督联合嘅人迈向成熟。 29 所以我继续辛勤工作，靠住上帝喺我身上发挥嘅强大力量，竭力奋斗。