6 各位弟兄，如果有人不知不觉失足，你哋当中成熟嘅基督徒，就要用温和嘅态度，揾方法纠正佢。你自己都要小心，唔好受到引诱。 2 你哋嘅重担要继续互相承担，噉就可以体现基督法律嘅精神。 3 人如果冇咩咁犀利，但系觉得自己好犀利，就系自己呃自己。 4 每个人都应该省察自己所做嘅事。噉佢开心，就系因为自己做嘅嘢，而唔系因为同人哋比较。 5 每个人要承担自己嘅担子。
6 另外，边个接受教导，认识上帝嘅话语，都应该同教导嘅人分享一切美物。
7 唔好自己呃自己嘞，上帝系唔可以蔑视嘅。人种嘅系乜嘢，收嘅亦都系乜嘢。 8 顺应罪性撒种嘅，就从罪性收朽坏；顺应神圣力量撒种嘅，就从神圣力量收永生。 9 唔好放弃做美好嘅事，只要唔灰心，时候到咗，就有收成。 10 所以，我哋一有机会，就应该对所有人行善，对信徒更加应该噉做，因为大家就好似一家人咁亲。
11 你哋睇，我亲手写俾你哋嘅字几咁大。
12 嗰啲迫你哋受割礼嘅人，都系想靠住外在条件讨好人嘅。佢哋噉做，只系唔想因为基督而受迫害啫。 13 其实，连嗰啲接受割礼嘅人都唔遵守摩西法典。佢哋想你哋受割礼，只不过系想攞你哋嘅身体嚟炫耀。 14 我绝对唔会夸耀其他嘢，净系会夸耀死喺苦刑柱嘅主耶稣基督。对我嚟讲，世界已经因为佢而被处死；对世界嚟讲，我亦都已经因为佢而被处死。 15 有冇受割礼都唔重要，成为新创造嘅人先至重要。 16 愿上帝赐安宁同怜悯俾所有遵照呢个行为准则生活嘅人，即系上帝嘅以色列。
17 我身上带住烙印，表明我系耶稣嘅奴隶，所以，希望从今以后，唔会再有人揾我麻烦。
18 各位弟兄，愿我哋嘅主耶稣基督因为你哋表现嘅精神，令你哋享有分外恩典。阿们。