5 你哋呢啲有钱嘅人痛哭哀号啦，因为将会有悲惨嘅事发生喺你哋身上。 2 你哋嘅财物已经腐烂，啲衫俾虫蛀咗。 3 你哋嘅金银都生晒锈。呢啲锈会指证你哋唔啱嘅地方，食咗你哋嘅肉。喺最后嘅日子，你哋积存嘅嘢最终会好似火一样。 4 工人帮你哋收割田入面嘅农作物，你哋竟然唔出粮。呢啲工资不停喺度呼叫。收割嘅人嘅求救声，已经传到去天军嘅统帅耶和华嘅耳嘞。 5 你哋喺世上过奢华嘅生活，净系挂住满足自己嘅欲望。喺被宰杀嘅日子嚟到之前，你哋已经将自己嘅心养肥，就好似牲畜养肥咗噉。 6 你哋将正义嘅人定罪杀死。而家佢唔系同你哋为敌咩？
7 所以，各位弟兄，你哋要有耐心，直到主返嚟我哋呢度嘅时候。农夫不断耐心等候土地嘅宝贵出产，直到秋雨春雨降临。 8 你哋都要有耐心。要心意坚定，因为主就快返嚟我哋呢度嘞。
9 各位弟兄，你哋唔好互相埋怨，噉你哋就唔会受审判。睇吓，审判人嘅主企咗喺门口嘞。 10 各位弟兄，以往奉耶和华嘅名发言嘅先知，忍受逆境，显出耐心，你哋要视佢哋为模范。 11 我哋话保持忍耐嘅人系有福嘅。你哋听过约伯点样忍耐，知道耶和华最后赐咗乜嘢福分俾佢，就睇出耶和华充满温情，而且怜悯人。
12 我嘅弟兄，无论如何，唔好再发誓嘞。唔好向天、地或者任何其他嘢发誓。你哋讲说话，系就话“系”，唔系就话“唔系”，噉你哋就唔会受审判。
13 你哋当中有冇人忍受紧逆境呢？佢应该不断祷告。有冇人心境开朗呢？佢应该唱诗歌赞美上帝。 14 你哋当中有冇人病咗呢？佢应该请会众嘅长老嚟，等佢哋为佢祷告，奉耶和华嘅名将油搽喺佢身上。 15 出于信心嘅祷告可以令病咗嘅人好返。耶和华会令佢康复。如果佢犯咗罪，都会得到宽恕。
16 所以，你哋要互相坦诚认罪，彼此祷告代求，噉你哋就可以得到医治。正义嘅人嘅恳切祈求系有力量㗎，真系帮到人。 17 以利亚系同我哋性情相似嘅人，佢祷告恳求唔好落雨，就三年零六个月冇落雨。 18 后嚟佢再祷告，天就落雨，土地亦都有出产。
19 我嘅弟兄，如果你哋当中有人被引入歧途，偏离咗真理，而其他人令佢回头， 20 就要知道，帮助罪人回头离开歧途嘅人，唔单止可以拯救罪人嘅生命，亦都可以遮盖好多罪。