3 你要知道，到咗最后嘅日子，会有难以应付嘅非常时期。 2 到时，人会净系爱自己，贪钱，自夸，高傲，亵渎，反叛父母，忘恩负义，唔忠贞， 3 冇亲情，唔愿意达成协议，诽谤，唔识自制，凶狠，唔爱良善， 4 出卖人，一意孤行，自高自大，爱享乐唔爱上帝， 5 表面上好虔诚，但系生活方式就冇表明自己敬奉上帝。你要避开噉样嘅人。 6 佢哋有啲人潜入人哋屋企，迷惑意志薄弱嘅妇女。呢啲妇女俾罪压倒，受各种欲望操纵， 7 即使一直学习，但系点都冇办法确切认识真理。
8 以往雅尼同杨布点样反对摩西，而家呢啲人都点样不断反对真理。佢哋思想完全腐败，喺信仰上唔受上帝认可。 9 但系佢哋唔会成功，因为佢哋嘅愚蠢会喺所有人面前暴露无遗，就好似雅尼同杨布一样。 10 不过，你就密切留意我嘅教导、生活方式、目标、信心、耐心、爱心、忍耐， 11 亦都清楚知道我喺安提阿、以哥念、路司得经历过嘅迫害同埋苦楚。我遭受呢啲迫害，但系主将我从呢一切当中拯救出嚟。 12 其实，所有想追随基督耶稣过虔诚生活嘅人，都会受到迫害。 13 邪恶嘅人同骗子会越嚟越坏，佢哋欺骗人，亦都俾人欺骗。
14 不过，你要持守自己经过学习、受到劝导先至确信嘅道理，因为你知道系跟边个学嘅， 15 又知道自己由婴儿时期开始，就认识圣经。你认识圣经，相信基督耶稣，就有智慧可以得救。 16 圣经全部都系上帝指引人写低嘅，对于教导、责备、纠正、按正义嘅标准施行管教，都有益处， 17 令崇拜上帝嘅人完全胜任，装备齐全，能够做各种美善嘅工作。