4 所以，我呢个为主而坐监嘅人劝你哋，待人处事要配得上你哋所受嘅呼召， 2 要满心谦卑、温和，要有耐心，用爱心彼此包容， 3 以和睦维系团结，竭力维持靠着神圣力量而有嘅合一。 4 身体只有一个，神圣力量只有一种，就好似你哋受呼召得到嘅希望都只有一个。 5 主只有一位，信仰只有一个，浸礼只有一种， 6 上帝只有一位，就系所有人嘅爸爸。佢统管所有人，通过所有人行动，亦都喺所有人当中发挥作用。
7 我哋每个人得到嘅分外恩典，都取决于基督点样分配恩赐。 8 圣经讲过：“佢升上高处嘅时候，俘掳咗人。佢将人赐下，作为礼物。” 9 佢升上去系咩意思呢？就系佢曾经降下，嚟到地上。 10 呢位曾经降下嘅，就系后嚟升上去、远远超越高天嘅嗰位。佢升上去，系要完满成就一切。
11 佢赐下一啲人，有做使徒嘅，有做先知嘅，有传福音嘅，有牧养同教导嘅， 12 目的系纠正圣民，执行神圣嘅职务，令基督嘅身体更加强壮， 13 直到我哋所有人喺信仰上完全一致，喺确切认识上帝嘅仔方面都完全一致，而且长大成人，好似基督一样完全成熟为止。 14 所以，我哋唔应该再好似小朋友噉，容易中人嘅诡计，误信呃人嘅谬论，受到各种歪风邪说影响，以致飘忽不定，随波逐流。 15 既然我哋讲嘅系真理，就应该怀住爱心不断成长，喺各方面同身体嘅头，即系基督和谐一致。 16 由于佢，全身都和谐噉连接埋一齐，互相配合，每个关节都各尽其职。每一部分都发挥应有嘅功能，身体就能够成长，因为爱而变得强壮。
17 所以，我奉主嘅名噉样讲，亦都噉样作证：你哋唔好再好似列国嘅人噉，行事为人受到徒劳无益嘅思想影响。 18 佢哋思想昏暗，远离上帝所赐嘅生命，因为佢哋唔想认识上帝，而且内心麻木。 19 佢哋完全冇道德感，纵情于无耻嘅行为，贪得无厌噉做出各种不洁嘅事。
20 不过，你哋认识嘅基督唔系噉嘅。 21 只要你哋听过佢嘅说话，受过佢嘅教导，就知道嘞，因为耶稣教嘅系真理。 22 你哋学过，要除去旧品格，摆脱你哋以往嘅生活方式，因为你哋嘅旧品格不断受到呃人嘅欲望腐化。 23 要不断更新你哋嘅思维模式， 24 着上新品格。呢种新品格系按照上帝嘅旨意创造嘅，反映出真实嘅正义同忠贞。
25 所以，既然你哋已经除去唔诚实嘅行为，每个人就应该对人讲真话，因为我哋亲如手足，属于同一个身体。 26 就算好嬲，都唔好犯罪，唔好到日落仲喺度嬲， 27 唔好俾魔鬼有机可乘。 28 偷嘢嘅人，唔好再偷嘞，反而要勤力，靠双手做正当嘅工作，噉就有嘢可以分俾需要帮助嘅人。 29 有害无益嘅说话一句都唔好讲，反而要按照情况讲鼓励人嘅说话，令听到嘅人得益。 30 仲有，唔好抗拒上帝嘅神圣力量，令佢忧愁。因为你哋已经得到神圣力量作为印记，当日子嚟到，你哋就会凭赎价得到释放。
31 你哋要除去一切恶毒、怒气、愤恨、吵闹、伤人嘅说话，同埋一切有害嘅事。 32 要以仁慈相待，亦都要怀住温情体恤其他人，彼此甘心宽恕，就好似上帝通过基督甘心宽恕咗你哋一样。