1 我系保罗，按照上帝嘅旨意做基督耶稣嘅使徒。我写信俾以弗所嘅圣民，即系同基督耶稣联合嘅忠信嘅人。
2 愿上帝我哋嘅爸爸，仲有主耶稣基督，令你哋享有分外恩典同安宁。
3 愿赞美归于我哋主耶稣基督嘅上帝，佢嘅爸爸，因为上帝令我哋同基督联合，从天上将佢嘅各种福分赐俾我哋。 4 佢喺世界奠基之前就拣选咗我哋，令我哋同基督联合，等我哋因为爱上帝，喺佢面前圣洁无瑕。 5 佢按照自己嘅意愿同旨意，预先决定通过耶稣基督收养我哋做佢嘅仔， 6 噉样，人就可以赞美佢伟大嘅分外恩典。佢通过自己深爱嘅仔，将呢个恩典仁慈噉赐俾我哋。 7 通过佢爱子嘅血，我哋凭住赎价得到释放，过错得到宽恕。上帝嘅分外恩典真系好丰富！
8 上帝将呢个分外恩典厚赐俾我哋，令我哋有充足嘅智慧同理解力， 9 知道同佢旨意有关嘅神圣秘密。呢个秘密就系，上帝按照自己所定嘅意愿， 10 等期限一到，就设立管理安排，将一切召集起嚟，令天上嘅同地上嘅都顺服基督。 11 上帝能够按照自己嘅旨意，以自己定嘅方式成就一切。佢预先拣选咗我哋同基督联合，一齐承受产业， 12 噉我哋呢啲最早将希望寄托于基督嘅人，就能够为上帝带嚟荣耀同赞美。 13 你哋听到真理嘅话语，知道咗同得救有关嘅好消息之后，亦都将希望寄托于基督。你哋相信基督之后，仲靠住佢得到上帝承诺嘅神圣力量作为印记， 14 同埋作为我哋承受产业之前嘅凭证。噉样，上帝嘅子民就能够凭住赎价得到释放，令上帝得到荣耀同赞美。
15 我听到你哋对主耶稣有信心，亦都对所有圣民有爱心， 16 就为你哋不断感谢上帝。我祷告嘅时候，经常提到你哋， 17 祈求我哋主耶稣基督嘅上帝，充满荣耀嘅爸爸，赐力量俾你哋，令你哋有智慧，能够明白启示，得到关于佢嘅确切知识。 18 我亦都求上帝令你哋心中嘅眼睛明亮，能够睇出佢呼召你哋嘅时候，俾咗点样嘅希望你哋，佢赐俾圣民嘅产业充满荣耀嘅财富， 19 佢向我哋呢啲信徒施展嘅力量实在超卓伟大。上帝运用佢嘅强大力量， 20 喺基督身上发挥作用，令佢死而复生，去到天上坐喺上帝嘅右边， 21 佢嘅地位远远超越一切执政嘅、当权嘅、有势力嘅、统治嘅，以及一切头衔，唔单止系目前制度嘅，亦都包括将来制度嘅。 22 上帝仲令一切都顺服喺基督脚下，令佢成为会众嘅元首，统管一切。 23 会众就系佢嘅身体，充满佢嘅特质；佢令一切都完满。