启示录
16 我听到至圣所里面有洪亮嘅声音同七个天使讲：“你哋去将上帝嘅七碗愤怒倒落地上啦。”
2 第一个天使就去，将佢个碗里面嘅愤怒倒落地上。嗰啲有野兽嘅记号而且崇拜兽像嘅人，皮肉就溃烂得非常严重。
3 第二个天使将佢个碗里面嘅愤怒倒落海里面，海就变成血，好似被杀嘅人流出嘅血，海里面嘅生物全部都死晒。
4 第三个天使将佢个碗里面嘅愤怒倒落河流同水泉里面，水就变成血。 5 我听到掌管水嘅天使话：“而家存在、以往存在、忠贞嘅主啊，你系正义嘅，因为你已经作出呢啲判决。 6 由于佢哋曾经令圣民同先知丧命流血，所以你俾血佢哋饮。佢哋系罪有应得嘅。” 7 我听到有声音由祭坛发出，话：“冇错，耶和华*全能嘅上帝啊，你嘅判决又公平*又正义。”
8 第四个天使将佢个碗里面嘅愤怒倒喺太阳嗰度，太阳就可以*用火灼伤人。 9 而啲人俾火嘅热力灼伤之后，并冇悔改，亦都冇将荣耀归于上帝，仲亵渎上帝嘅名，佢系有权控制呢啲灾祸嘅。
10 第五个天使将佢个碗里面嘅愤怒倒落野兽嘅宝座，野兽嘅王国就变得黑暗。啲人因为极度痛苦而咬自己嘅脷*。 11 佢哋又因为皮肉溃烂，非常痛苦，就亵渎天上嘅上帝，而且继续作恶，唔悔改。
12 第六个天使将佢个碗里面嘅愤怒倒落幼发拉底大河，河水就干咗，为由日出之处*嚟嘅君王准备道路。
13 我见到，有三个不洁嘅信息*好似青蛙噉，由龙嘅口、野兽嘅口同埋假先知嘅口出嚟。 14 呢啲信息受邪灵启示，显出神迹，去到全天下嘅君王嗰度，召集佢哋喺全能上帝嘅大日子投入战争。
15 “睇吓！我会好似贼一样嚟到。警醒而保住外衣嘅人真系有福！*噉样，佢就唔使赤身行走，而且冇人会见到佢嘅丑态。”
17 第七个天使将佢个碗里面嘅愤怒倒喺空气之中，跟住就即刻有洪亮嘅声音由至圣所嘅宝座发出，话：“完成嘞！” 18 之后有闪电，讲说话嘅声音，雷霆同埋大地震。自从地上有人以嚟，冇发生过咁严重嘅大地震。 19 嗰座大城就裂开，分成三部分，列国嘅城镇都倒冧。上帝一谂到大巴比伦嘅所作所为，就要大巴比伦饮上帝杯里面嘅烈怒之酒。 20 所有海岛都消失，山岳都唔见埋。 21 大冰雹从天而降，跌落人身上，每块大约重1塔兰特*。啲人就因为呢场非常严重嘅雹灾而亵渎上帝。