哥林多后书

2 我已经决定咗，下次去你哋嗰度嘅时候，唔会令大家伤心。 2 如果我令你哋伤心，噉边个能够令我开心返呢？就系因为我而伤心嘅人嘞。 3 所以我写咗嗰封信俾你哋，以免我嚟到之后，本来应该令我开心嘅人，反而令我伤心。我深信，令我开心嘅事，亦都会令你哋所有人开心。 4 之前我写信俾你哋嘅时候，心入面非常痛苦难过，流咗唔少眼泪。我唔系要令你哋伤心，而系想你哋知道我真系好爱你哋。

5 如果有任何人令人伤心，佢唔系令我伤心，而系令你哋所有人都有啲伤心。我讲有啲，系唔想我嘅说话太严厉。 6 呢个人受过大部分人嘅谴责，噉样已经够嘞。 7 你哋应该衷心原谅*佢，安慰佢，以免佢因为太难过而觉得绝望。 8 所以我劝你哋，要俾佢知道你哋的确好爱佢。 9 我写呢封信亦都系为咗确认，你哋可唔可以证明自己事事服从。 10 你哋原谅边个，我都会原谅。其实，我原谅任何过错，都系为咗帮你哋，而且系喺基督眼前噉做， 11 噉我哋就唔会俾撒但有机可乘*，因为我哋好清楚佢嘅阴谋。

12 我曾经去特洛阿斯宣扬基督嘅好消息。当时有一道门为我打开，可以为主工作， 13 但系我揾唔到我嘅弟兄提多，就好担心，于是同大家道别，去咗马其顿。

14 感谢上帝！佢时刻带领我哋同基督一齐喺凯旋队伍当中游行，通过我哋将关于上帝嘅知识传到各地，就好似散发香气一样。 15 对上帝嚟讲，无论我哋喺将会得救嘅人当中，定系喺走向灭亡嘅人当中，都系基督嘅香气。 16 对于走向灭亡嘅人嚟讲，呢股系死亡嘅气味*，导致死亡；不过对于将会得救嘅人嚟讲，就系生命嘅香气，带嚟生命。边个能够胜任呢件工作呢？ 17 我哋能够胜任，因为我哋唔系好似其他人*噉，贩卖上帝嘅话语*，而系奉上帝差遣，喺上帝眼前，靠住基督，充满真诚噉传讲真理。