希伯来书

5 人间嘅大祭司都受任命，去为人民处理同崇拜上帝有关嘅事，献上礼物同赎罪嘅祭牲。 2 大祭司能够体谅*无知同犯错嘅人，因为佢自己都系软弱嘅*。 3 所以佢除咗为人民献祭赎罪，亦都一定要为自己噉样做。

4 有荣幸做大祭司嘅人，唔系自己委任自己嘅。同亚伦一样，佢一定要系上帝委任嘅。 5 同样，基督都唔系自己委任自己做大祭司，去得到荣耀嘅，而系上帝赐荣耀俾佢，同佢讲：“你系我嘅仔，今日我成为咗你嘅爸爸。” 6 上帝仲喺另一段经文话：“你会好似麦基洗德噉样*做祭司，而且会永远做祭司！”

7 基督喺地上嘅时候*，曾经呼号流泪，再三恳切祈求，亦都请求上帝，即系救到佢脱离死亡嘅嗰位。因为佢敬畏上帝，上帝就垂听佢嘅祷告。 8 虽然佢系上帝个仔，仍然学识喺苦难之中表现服从。 9 佢完全符合资格*之后，就身负重任，令所有服从佢嘅人得到永远嘅拯救， 10 因为上帝已经指定佢好似麦基洗德噉样*做大祭司。

11 我哋有好多关于佢嘅嘢要讲，不过好难解释俾你哋听，因为你哋嘅听觉变得迟钝。 12 其实，到咗而家，你哋应该一早就做咗导师，但系你哋仲需要人将上帝圣言嘅基本道理由头教过你哋。你哋竟然净系饮到奶，食唔到固体食物。 13 净系饮到奶嘅都唔熟悉上帝嘅话语*，因为佢仲系好细个。 14 成熟嘅人先至食到固体食物。佢哋嘅辨识力因为经常运用而锻炼纯熟，可以明辨是非。