提摩太后书

4 当基督显现同埋喺佢嘅王国作王嘅时候，佢会审判活人同死人，所以我喺上帝同基督耶稣面前郑重吩咐你： 2 要传讲上帝嘅话语，无论时势顺唔顺利，都急切噉*传讲。要怀住极大嘅耐心，充分发挥教导嘅艺术，责备人，谴责人，劝勉人。 3 将来会有一段时期，人会拒绝健全嘅*教导，反而顺住自己嘅欲望去揾好多导师，想听顺耳嘅说话。 4 佢哋唔听真理，反而留意无稽之谈。 5 但系你要事事清醒，忍受艰辛，做传福音者嘅工作*，彻底完成你嘅职务。

6 而家我就好似浇祭*一样被倒出嚟，我得到释放*嘅时候近在眼前嘞。 7 嗰场美好嘅仗我已经打完，比赛我已经跑完，信仰我已经守住嘞。 8 由而家起，有正义嘅冠冕留俾我。到咗嗰日，施行正义审判嘅主会将冠冕赏赐俾我，唔单止赐俾我，亦都赐俾所有热切盼望*佢显现嘅人。

9 请你尽快嚟见我， 10 噉系因为底马贪爱呢个世界嘅事*，揼低我去咗帖撒罗尼迦。克勒士去咗加拉太，提多去咗达尔马提亚， 11 得返路加喺我身边。请你带埋马可一齐嚟，因为佢帮到我执行职务。 12 我已经派咗推基古去以弗所。 13 我喺特洛阿斯嗰阵，将斗篷留咗喺迦布嗰度。你嚟嘅时候，请顺便带嚟。另外，请你将嗰啲书卷，特别系皮制书卷，都带埋嚟吖。

14 铜匠亚历山大令我受咗唔少苦，耶和华*会按照佢嘅行为惩罚佢。 15 你都要防备佢，因为佢极力反对我哋嘅信息。

16 我第一次为自己辩护嘅时候，冇人企喺我呢边，反而全部都揼低我。但愿上帝唔会同佢哋算帐。 17 不过，主企喺我身边，俾力量我，通过我彻底完成传道工作，等列国嘅人都可以听到呢个信息。我亦都从狮子嘅口获救。 18 主会解救我脱离各种邪恶嘅事，拯救我进入佢天上嘅王国。愿荣耀永永远远归于佢。阿们。

19 请代我问候百姬拉同亚居拉，亦都问候奥尼色弗一家。

20 以拉都仲喺哥林多*。特罗非摩病咗，所以我将佢留喺米利都。 21 请你尽可能喺冬天前嚟到。

友布罗问候你，布田、利努斯、克劳狄亚同所有弟兄都问候你。

22 愿主因为你表现美好嘅精神而同你同在。愿你哋享有佢嘅分外恩典。