哥林多前书

3 各位弟兄，以前我同你哋讲说话，只能够好似同有世俗思想嘅人*讲说话噉，因为你哋冇上帝嘅思想*。你哋虽然系基督徒*，但系仍然好似婴孩噉。 2 当时我喂你哋食嘅系奶，唔系固体食物，因为你哋唔够强壮。其实你哋而家都系唔够强壮， 3 因为你哋仍然有世俗嘅思想。你哋当中有妒忌纷争，噉就表明你哋有世俗嘅思想嘞。你哋行事为人唔系同世人一样咩？ 4 你哋有啲话“我系属于保罗嘅”，有啲话“我系属于亚波罗嘅”，噉唔系世人嘅做法咩？

5 亚波罗有几犀利呢？保罗又算得乜嘢呢？我哋只不过系仆人，帮助你哋成为信徒。呢个系主交俾我哋每个人嘅工作。 6 撒种嘅系我，淋水嘅系亚波罗，但系促成生长嘅系上帝。 7 所以，撒种嘅同淋水嘅都唔算得乜嘢，其实系上帝令佢生长。 8 撒种嘅同淋水嘅都团结一致，而每个人都会按照自己所做嘅得到奖赏。 9 我哋系同上帝一齐工作嘅同伴。你哋系上帝耕种嘅田地，系上帝建造嘅房屋。

10 由于上帝将分外恩典赐俾我，我就好似一个精明能干*嘅工程主管，打好根基，不过喺根基上建造嘅系另一个人。所以，人人都要不断留意自己点样喺根基上建造。 11 上帝已经奠定咗根基，就系耶稣基督，冇人能够奠定其他根基。 12 有啲人系用金、银、贵重嘅石头喺根基上建造，而另一啲人就用木头、干草、禾秆建造， 13 每个人嘅工程做成点，将来都会显露出嚟，到时*就自然清楚嘞，因为火能够显露工程做得好唔好，验证每个人嘅工程。 14 人喺根基上建造出嚟嘅，如果仲能够存留，佢就会得到奖赏。 15 如果人建造出嚟嘅俾火烧咗，佢就会有损失。就算佢得救，都会好似喺火场走出嚟噉。

16 你哋唔知，你哋系上帝嘅圣殿，喺你哋里面有*上帝嘅神圣力量咩？ 17 边个毁灭上帝嘅圣殿，上帝就会毁灭边个，因为上帝嘅圣殿系圣洁嘅。你哋就系呢座圣殿。

18 唔好自己呃自己。如果有人以为自己喺呢个制度*好有智慧，就不如做个愚蠢嘅人，噉样反而能够成为有智慧嘅人。 19 因为呢个世界嘅智慧，喺上帝眼中系愚蠢嘅。圣经噉样写，“佢令有智慧嘅人中咗自己嘅诡计”， 20 另一段经文噉样写，“耶和华*知道，有智慧嘅人所谂嘅空虚无益”。 21 所以，边个都唔应该夸耀人做嘅嘢。其实一切都系属于你哋嘅， 22 无论系保罗、亚波罗、矶法*，系呢个世界，系生，系死，系而家嘅事，系将来嘅事，一切都系属于你哋嘅。 23 你哋系属于基督嘅，基督系属于上帝嘅。