以弗所书

5 所以，你哋既然系上帝所爱嘅仔女，就要效法上帝， 2 亦都要继续怀住爱心行事为人，正如基督爱我哋*，为我哋*牺牲咗自己，作为祭物献俾上帝，发出馨香之气。

3 淫乱*同埋各种不洁嘅事，或者贪心嘅事，你哋提都唔应该提，因为身为圣民讲呢啲嘢系唔合适㗎。 4 可耻嘅行为、愚蠢嘅话题、下流嘅笑话，呢啲唔合适嘅事都唔应该讲。你哋应该讲感谢上帝嘅说话。 5 你哋都清楚知道，淫乱*嘅、不洁嘅、贪心嘅，即系拜偶像嘅，都唔能够进入基督同上帝嘅王国承受产业。

6 你哋唔好俾人用空虚嘅说话呃到。因为呢啲事，上帝要向叛逆嘅人降怒。 7 所以，唔好同佢哋同流合污。 8 你哋以前身处黑暗，但系而家由于主嘅缘故就喺光明里面。你哋行事为人，要继续做光明嘅儿女， 9 因为光明结出嘅果实，就系各种良善、正义、正直。 10 要不断确认乜嘢先至系主钟意嘅*。 11 人哋做黑暗无益嘅事，你哋唔好再参与，反而要将呢啲事嘅真相揭露出嚟， 12 因为佢哋暗中做嘅坏事，就连讲出嚟都令人觉得羞耻。 13 所有被揭露出嚟嘅*，都俾光照得清清楚楚；所有变得清清楚楚嘅，就变得好似光一样。 14 所以有句说话噉讲：“瞓着咗嘅人，你醒啦！死咗嘅人，复活啦！基督会照亮你。”

15 你哋要仔细留意自己点样行事为人，唔好做愚昧嘅人，要做有智慧嘅人。 16 要尽力善用时间*，因为呢个时代好邪恶。 17 所以，唔好咁唔合理嘞，要不断辨明耶和华*嘅旨意系乜嘢。 18 唔好醉酒，醉酒会令人任意妄为*，要经常充满神圣力量。 19 要用诗篇、赞美上帝嘅诗歌同埋崇拜上帝嘅歌曲互相鼓励*，仲要喺心里面*向耶和华*唱歌奏乐。 20 凡事都要奉我哋主耶稣基督嘅名，时刻感谢上帝我哋嘅爸爸。

21 你哋要怀住敬畏基督嘅心，互相顺服。 22 做太太嘅应该顺服丈夫，就好似顺服主一样， 23 因为丈夫系太太嘅头*，就好似基督系会众嘅头。会众系身体，基督系呢个身体嘅救主。 24 其实，就好似会众顺服基督噉，太太都应该凡事顺服丈夫。 25 做丈夫嘅，你哋要继续爱太太，就好似基督爱会众，为会众牺牲咗自己， 26 基督通过上帝嘅话语就令会众洁净成圣*，好似用水洗干净一样。 27 噉样，佢就可以将会众献俾自己，光彩照人，冇斑点、皱纹或者任何缺陷，圣洁无瑕。

28 同样，丈夫应该爱太太，就好似爱自己嘅身体一样。爱太太就系爱自己嘞。 29 从来冇人憎恨自己嘅身体，只会喂养爱护，就好似基督对待会众噉， 30 因为我哋都系佢身体嘅一部分。 31 “所以人要离开父母，同佢太太长相厮守*，二人合为一体。” 32 呢个系重大嘅神圣秘密。我讲嘅神圣秘密系关于基督同会众嘅事。 33 无论如何，你哋每个人都应该爱太太，就好似爱自己噉；做太太嘅都应该深深尊敬佢嘅丈夫。