启示录

17 喺嗰七个分别拎住碗嘅天使当中，有一个嚟同我讲：“嚟吖，我要俾你睇大娼妓所受嘅惩罚。佢坐喺好多条河上面， 2 地上嘅列王同佢淫乱*，喺地上居住嘅人都饮咗佢淫乱*嘅酒就醉咗。”

3 嗰个天使用神圣力量将我带去旷野。我见到一个女人坐喺鲜红色嘅野兽上面，野兽有七个头，头上有十只角，身上布满亵渎嘅名。 4 呢个女人着住紫色同鲜红色嘅衫，戴住黄金、宝石同埋珍珠做装饰，手上拎住金杯，杯里面装满可憎之物同佢淫乱*嘅污秽之物。 5 佢嘅额头上面写咗一个隐含奥秘嘅名：“大巴比伦，娼妓同地上可憎之物嘅母亲。” 6 我见呢个女人饮醉咗，因为佢饮咗圣民嘅血同耶稣嘅见证人嘅血。

我见到佢，就觉得好惊讶。 7 天使同我讲：“点解你咁惊讶呢？我会将关于呢个女人同佢骑住嗰只七头十角野兽嘅奥秘话俾你知： 8 你见到嘅野兽，以前喺度，而家唔喺度，但系好快就会喺无底深渊*上嚟，之后会被毁灭。喺地上居住嘅人见到野兽以前喺度，之后唔喺度，后嚟又再出现，都会非常惊叹。由世界奠基以嚟，呢啲人嘅名都冇写喺生命册上面。

9 “人要有智慧先至能够明白，七个头系象征呢个女人坐嘅七座山。 10 有七个王，五个已经倾倒，一个仲喺度，另一个仲未嚟到。佢嚟到之后，就会存留一阵。 11 以前喺度、而家唔喺度嘅野兽系第八个王，佢系源于嗰七个王嘅。呢只野兽正走向灭亡。

12 “你见到嘅十只角象征十个王。虽然佢哋仲未开始统治，但系将来一定会得到王权，同野兽一齐统治一个钟。 13 佢哋嘅谂法一致，所以将自己嘅力量同权力都交俾野兽。 14 佢哋会同绵羊羔交战，绵羊羔会战胜佢哋，因为佢系万主之主、万王之王。嗰啲同佢一齐嘅人，即系嗰啲被上帝呼召，被拣选出嚟嘅忠信嘅人，都会战胜佢哋。”

15 天使又同我讲：“你见到娼妓坐喺河上面，呢啲河象征所有民族、人群、国家同语言。 16 你见到嘅十只角同野兽会憎恨娼妓，摧残佢，令佢赤身，仲会食咗佢嘅肉，用火将佢完全烧毁。 17 因为上帝将自己嘅谂法放入十只角嘅心里面，要十只角将佢哋一致嘅谂法实行出嚟，就系将王权交俾野兽，直到上帝讲嘅说话实现为止。 18 你见到嘅女人象征一座统治地上列王嘅大城。”