启示录

20 我见到一个天使从天而降，手上拎住无底深渊*嘅锁匙同埋一条大锁链。 2 佢捉住龙，就系最初嘅嗰条蛇，亦即系魔鬼撒但，将佢捆绑1000年。 3 天使将佢掟入无底深渊，用印将深渊封住*，令佢唔能够再迷惑列国，直到嗰1000年结束为止。之后，佢一定会被释放一段短暂嘅时间。

4 我见到一啲宝座，坐喺宝座上嘅都得到审判嘅权力。我仲见到呢啲人嘅血*，佢哋由于为耶稣作证，传讲关于上帝嘅事而被处决*。佢哋冇崇拜过野兽或者兽像，亦都冇喺额头同埋手上接受记号。佢哋都有返生命，同基督一齐做君王1000年。 5 呢个系第一种复活。但系其余死咗嘅人，就要等到嗰1000年结束之后先会有返生命。 6 经历第一种复活嘅人系有福*嘅，系圣洁嘅。呢啲人唔会经历第二种死亡*。佢哋会做上帝同基督嘅祭司，喺嗰1000年里面同基督一齐做君王。

7 嗰1000年一结束，撒但就会由监狱释放出嚟。 8 佢会出嚟迷惑大地四极嘅列国，即系歌革同玛歌革，召集佢哋投入战争，呢啲人嘅数目好似海沙咁多。 9 佢哋向前推进，遍布整个大地，包围圣民嘅营地同上帝所爱嘅城。但系有火从天而降，消灭佢哋。 10 迷惑佢哋嘅魔鬼被揼入有硫磺烈火嘅湖里面，野兽同假先知都已经喺湖里面。佢哋会日夜受到折磨*，直到永永远远。

11 我见到一个白色嘅大宝座同嗰位坐喺上面嘅。天地都从佢面前逃走，消失得无影无踪。 12 我见到死咗嘅人，无论长幼尊卑，都企喺宝座前，书卷都打开咗。仲有另一个书卷打开咗，就系生命册。根据呢啲书卷上写嘅说话，死咗嘅人都按照自己嘅行为接受审判。 13 海交出佢里面嘅死人，死亡同坟墓*亦都交出佢哋里面嘅死人，而每个人都按照自己嘅行为接受审判。 14 死亡同坟墓都被揼入火湖里面，呢个火湖象征第二种死亡。 15 边个嘅名冇记录喺生命册，就会被揼入火湖里面。