哥林多后书

6 我哋呢啲同上帝一齐工作嘅人都劝你哋，你哋接受咗上帝嘅分外恩典，就唔好辜负佢当初施恩嘅美意。 2 因为佢话：“喺施恩*嘅时期，我垂听咗你。喺拯救嘅日子，我帮助咗你。”睇吓！而家就系格外施恩*嘅时期，而家就系拯救嘅日子。

3 我哋凡事都唔应该成为其他人嘅绊脚石*，以免我哋嘅职务俾人挑剔。 4 我哋喺各方面都表明自己系上帝嘅仆人。例如，我哋忍受好多考验，经历患难、贫穷、困境、 5 拷打、监禁、暴乱、劳苦、失眠、缺粮； 6 我哋显出纯洁、知识、耐心、仁慈，喺生活上受神圣力量引导，显出唔虚伪嘅爱心、 7 讲真话、依靠上帝嘅大能；右手同左手都攞住正义嘅武器*； 8 我哋唔计较荣耀同羞辱，亦都唔计较批评同赞赏。我哋俾人当做骗子，但其实系诚实嘅； 9 睇嚟寂寂无闻，其实受到认可；睇嚟必死无疑*，竟然仲可以活着；睇嚟受到惩罚*，不过未至于被处死； 10 睇嚟悲伤，其实经常喜乐；睇嚟贫穷，其实令好多人富足；似乎一无所有，其实样样都有。

11 哥林多人啊，我哋好坦率噉同你哋讲说话，而且对你哋开阔心胸。 12 我哋向你哋敞开心扉，充满温情；但系你哋对我哋就有所保留，温情太少。 13 请你哋都向我哋开阔心胸吖。我当你哋系自己嘅仔女先至噉样讲。

14 你哋同唔系信徒嘅人一啲都唔相配，唔好同佢哋同负一轭*。正义同邪恶*点会有交情呢？光明同黑暗点会有交集呢？ 15 基督同彼列*点会一致呢？信徒*同唔系信徒嘅人点会一样呢？ 16 上帝嘅圣殿又点会接纳偶像呢？我哋就系真神*嘅圣殿。上帝讲过：“我会住喺佢哋当中，喺佢哋当中行走，做佢哋嘅上帝，佢哋会做我嘅子民。” 17 耶和华*亦都话：“‘所以，你哋要喺佢哋当中出嚟，同佢哋分开，唔好再接触不洁*嘅嘢’，‘我就接纳你哋’。” 18 “‘我会做你哋嘅爸爸，你哋会做我嘅仔女’，呢嗰系全能嘅耶和华*讲嘅。”