启示录

2 “你要写信俾以弗所会众嘅使者*：右手有七粒星，喺七个金灯台之间行走嘅，噉样讲： 2 ‘我知道你做嘅一切、你付出嘅努力，同埋表现嘅忍耐。我都知道你唔能够容忍坏人，你曾经考验嗰啲自称系使徒*，但系其实唔系使徒嘅人。你睇出佢哋讲嘅都系大话。 3 仲有，你显出忍耐，为我嘅名坚持不懈，冇灰心。 4 不过，有一样嘢我要责备你，就系你失去咗最初嗰份爱*。

5 “‘所以，你要谂返自己系由边度跌落嚟*，要悔改，要做你起初做嘅事。如果唔系，我就会去你嗰度。你唔悔改嘅话，我就会将你嘅灯台由原本嘅地方拎走。 6 但系你有一点做得好嘅，就系你憎恨尼哥拉派嘅所作所为，呢个都系我憎恨嘅。 7 有耳仔嘅，都应该听上帝通过神圣力量对各群会众讲嘅说话：战胜嘅人，我会将上帝乐园里面生命树上嘅果实赐俾佢食。’

8 “你要写信俾士每拿会众嘅使者：嗰位‘最先嘅亦都系最后嘅’，就系嗰位死而复生嘅，噉样讲： 9 ‘我知道你经历患难，而且贫穷，但系你系富足嘅。我都知道有啲人讲亵渎嘅说话。佢哋自称系犹太人，其实唔系，佢哋系撒但嘅同党*。 10 你将会遭遇苦难，不过你唔使惊。睇吓！魔鬼会将你哋当中嘅一啲人拉去坐监，令你哋彻底受考验，遭受迫害十日。你要忠心至死，我就会将生命嘅冠冕赐俾你。 11 有耳仔嘅，都应该听上帝通过神圣力量对各群会众讲嘅说话：战胜嘅人绝对唔会俾第二种死亡伤害。’

12 “你要写信俾别迦摩会众嘅使者：嗰位有两刃利剑嘅，噉样讲： 13 ‘我知道你住嘅地方系撒但宝座嘅所在地。我忠信嘅见证人安提帕喺你嗰度，佢喺撒但住嘅地方被杀嘅时候，你仍然对我忠心耿耿*，冇否认对我嘅信仰。

14 “‘不过，我有几样嘢要责备你。你嗰度有啲人坚持做巴兰教唆嘅事。巴兰曾经教唆巴勒，要佢将绊脚石放喺以色列人面前，怂恿佢哋淫乱*，食献俾偶像嘅祭牲。 15 同样，你嗰度都有啲人坚持做尼哥拉派教唆嘅事。 16 所以，你要悔改。如果唔系，我好快就会去你嗰度，用我口里面伸出嘅长剑同佢哋作战。

17 “‘有耳仔嘅，都应该听上帝通过神圣力量对各群会众讲嘅说话：战胜嘅人，我要赐一啲隐藏嘅吗哪同一块白色嘅石仔俾佢，石上面写咗一个新嘅名。除咗得到呢个名嘅人，冇人认识呢个名。’

18 “你要写信俾推雅推拉会众嘅使者：上帝嘅仔，嗰位眼睛好似火焰、脚好似精铜嘅，噉样讲： 19 ‘我好清楚你做嘅事，你嘅爱心、信心、服务、忍耐，亦都知道你最近做嘅比最初仲多。

20 “‘不过，有一点我真系要责备你。你宽容嗰个自称系先知嘅女人耶洗别，任由佢教唆同迷惑我嘅奴隶，令佢哋淫乱*，食献俾偶像嘅祭牲。 21 我曾经俾时间佢悔改，但系佢唔肯悔改，仲继续淫乱*。 22 睇吓！我好快就会令佢卧病在床。如果嗰啲同佢通奸嘅人唔悔改，继续仿效佢嘅行为，我就会令佢哋痛苦不堪。 23 我要用致命嘅瘟疫杀死佢嘅仔女，令所有会众都知道，我察验人嘅内心同心底嘅谂法*，我会按照你哋嘅行为个别奖赏或者惩罚你哋。

24 “‘至于你哋其余喺推雅推拉嘅人，就系嗰啲冇受到教唆、唔想了解所谓“撒但高深嘅事”嘅人，我话俾你哋知，我唔会将其他重担放喺你哋身上， 25 但系你哋要紧紧守住自己拥有嘅，直到我嚟。 26 战胜嘅人、遵守我嘅吩咐而且坚持到底嘅人，我会赐权力俾佢统治列国， 27 就好似我喺爸爸嗰度得到嘅权力一样。战胜嘅人要用铁杖统治*列国，将列国打到粉碎，好似打碎陶器一样。 28 我仲会赐晨星俾佢。 29 有耳仔嘅，都应该听上帝通过神圣力量对各群会众讲嘅说话。’”