哥林多前书

10 各位弟兄，你哋都知道，以前我哋嘅祖先喺云下面穿过红海， 2 佢哋都喺云下面同埋海里面受浸，同摩西联合。 3 佢哋食嘅都系上帝所赐嘅食物， 4 饮嘅都系上帝所赐嘅水。佢哋饮嘅水系嚟自上帝所赐嘅磐石。呢块伴随佢哋嘅磐石，指嘅就系*基督。 5 不过佢哋大多数人都令上帝唔高兴，结果死喺旷野。

6 呢啲事成为我哋嘅前车之鉴，警告我哋：唔好贪恋恶事，好似佢哋一样。 7 唔好拜偶像，好似佢哋有啲人做嘅噉。关于呢啲人，圣经噉样写：“人民坐低饮饮食食，又狂欢作乐。” 8 唔好淫乱*，好似佢哋有啲人噉样，一日就死咗2万3000人。 9 唔好试探*耶和华*，好似佢哋有啲人噉做，就俾蛇咬死。 10 唔好成日埋怨，好似佢哋有啲人一样，就俾上帝嘅天使*处死。 11 佢哋嘅遭遇都成为前车之鉴，仲写低落嚟，警告我哋呢啲面临各个制度终结嘅人。

12 所以，自以为企得稳嘅人要小心，以免跌倒。 13 你哋遇到嘅引诱，其实其他人都遇到。上帝系信实可靠嘅，佢唔会俾你哋面对一啲你哋忍受唔到嘅引诱。面对引诱嘅时候，佢会打开出路，等你哋忍耐得住。

14 所以，我亲爱嘅朋友，你哋要远远避开拜偶像嘅行为。 15 我认为你哋系明辨事理嘅人，所以噉样讲。我讲得啱唔啱，你哋自己判断嘞。 16 我哋用感恩嘅杯嚟感谢上帝，唔系就系一齐领受基督嘅血咩？我哋将饼搣开嚟食，唔系就系一齐领受基督嘅身体咩？ 17 饼只有一个，我哋大家都分享同一个饼，所以我哋虽然人数好多，仍然系一个身体。

18 请谂吓血统上嘅以色列人吖。佢哋食祭坛上嘅祭牲，咪就系同上帝一齐吃喝啰。 19 我讲嘅系咩意思呢？我系咪话献俾偶像嘅祭牲或者偶像本身好重要呢？ 20 唔系。我意思系列国嘅人献祭，系献俾邪灵，唔系献俾上帝。所以，我唔希望你哋同邪灵有任何关系。 21 你哋唔可以攞耶和华*嘅杯嚟饮，又攞邪灵嘅杯嚟饮；唔可以享用“耶和华*嘅宴席”，又享用邪灵嘅宴席。 22 “我哋系咪想激起耶和华*嘅愤怒*吖？”我哋根本冇能力承受佢嘅愤怒。

23 凡事都可以做，不过唔系样样都有益处。凡事都可以做，不过唔系样样都能够鼓励人。 24 每个人都要时刻为人着想，唔好净系谂自己。

25 喺市场卖嘅肉，你哋都可以食，唔使为自己嘅良心追问啲肉系边度嚟嘅， 26 因为“大地同大地嘅一切，都属于耶和华*”。 27 如果唔系信徒嘅人请你哋食饭，而你哋都想去，噉摆喺面前嘅食物，你哋都可以食，唔使为自己嘅良心追问啲乜嘢。 28 不过，如果有人同你哋讲“呢啲嘢系献过俾偶像嘅”，为咗呢个人，亦都为咗良心嘅缘故，你哋就唔应该食嘞。 29 我所讲嘅唔系你嘅良心，而系嗰个人嘅良心。虽然我有自由噉做，但系我唔想因为令其他人良心不安而俾人指责。 30 就算我食嘅时候系怀住感恩之心，但系如果会引起批评，我系咪仲要噉做呢？

31 所以，你哋无论系吃喝定系做其他事，一切都要为上帝嘅荣耀而做。 32 无论系犹太人，希腊人*定系上帝嘅会众，你哋都唔好成为佢哋嘅绊脚石， 33 反而要好似我一样，做任何事都唔系净系谂自己，而系为大家着想，令大家开心，希望佢哋可以得救。