提多书

1 我系保罗，系上帝嘅奴隶，系耶稣基督嘅使徒*。我嘅职务同上帝拣选嘅人嘅信仰一致，亦都同真理嘅确切知识一致。真理符合虔诚*之道， 2 亦都基于永生嘅希望。喺好多个世代之前，冇可能讲大话嘅上帝已经承诺赐永远嘅生命俾人。 3 到咗上帝指定嘅时候，佢就通过传道工作令人认识佢嘅话语。我系按照我哋救主上帝嘅命令，受委托做呢项传道工作嘅。 4 提多，我而家写信俾你。你同我有共同嘅信仰，你就好似我嘅亲生仔一样。

愿上帝我哋嘅天父，仲有我哋嘅救主基督耶稣，令你享有分外恩典同安宁*。

5 我留你喺克里特，系想你按照我嘅吩咐去处理一啲需要纠正嘅问题*，同埋喺各座城委任长老。 6 如果有人无可指责，只有一个太太，仔女都信主，冇人指控佢嘅仔女生活放纵*或者反叛，你就可以委任佢。 7 监督身为上帝嘅管家，必须无可指责，唔坚持己见，唔会脾气暴躁*，唔醉酒，唔粗暴*，唔贪图利益*。 8 佢必须好客，喜爱良善，思想健全*，正义，忠贞，自制， 9 坚持用上帝信实嘅话语*发挥教导嘅艺术，噉佢就可以用健全嘅*教导鼓励*人，责备反驳嘅人。

10 有好多人欺骗人，反叛，言谈无益，特别系嗰啲死守割礼*嘅人。 11 你一定要令呢啲人收声*，因为佢哋贪图利益*，教人错误嘅道理，彻底破坏一啲家庭嘅信心。 12 克里特人自己嘅先知都系噉样讲：“克里特人成日讲大话，系害人嘅野兽，好食懒飞。”

13 呢句说话*系真嘅。所以你要不断严厉噉责备佢哋，令佢哋喺信仰上健全， 14 唔好再理犹太人嘅传说同埋嗰啲离弃真理嘅人嘅诫命。 15 对洁净*嘅人嚟讲，一切都系洁净嘅。不过对污秽不洁、冇信心嘅人嚟讲，冇嘢系洁净嘅，就连佢哋嘅思想同良心都系污秽嘅。 16 佢哋公开声称自己认识上帝，但系行为就表明自己否认上帝，因为佢哋又可恶又反叛，唔配*做任何美善嘅事。