希伯来书

3 所以，各位受呼召*去天上嘅圣洁弟兄*，你哋要仔细谂吓耶稣嘅榜样，佢系我哋承认嘅使徒*同埋大祭司。 2 耶稣对任命佢嘅上帝忠心，就好似摩西喺上帝嘅家*忠心服务一样。 3 耶稣应该比摩西得到更多荣耀，因为建造房屋*嘅人比房屋本身更加尊贵。 4 任何房屋*都有人建造，但系建造万物嘅就系上帝。 5 摩西只不过系仆人，喺上帝嘅家*忠心服务，预示*将来会被传扬嘅事； 6 而基督先系上帝嘅仔，忠心管理上帝嘅家。如果我哋放胆发言，持守我哋夸耀嘅希望，而且坚持到底，我哋就系上帝嘅家*嘞。

7 所以，就好似神圣力量*讲嘅噉：“今日，但愿你哋听我*讲， 8 唔好硬颈*，好似你哋嘅祖先以前激嬲我*，当日喺旷野试探我*一样。 9 喺嗰度，你哋嘅祖先试探我，质疑我。40年嚟，即使佢哋见到我嘅作为，都仲系噉对我。 10 所以我厌恶嗰一代人，我话：‘佢哋嘅心一直偏离正途，唔认识我嘅道路。’ 11 我就喺愤怒之中发誓：‘佢哋唔可以入去得享我嘅安息。’”

12 各位弟兄，你哋要小心，因为人离弃真神*，就会形成邪恶嘅心，对佢冇信心。 13 你哋要趁住仲有叫做“今日”嘅时候，每日都互相鼓励，噉你哋就冇人会俾罪欺骗*，变得硬颈。 14 我哋一定要坚持当初嘅信念，而且坚持到底，噉样先至可以经历基督所经历嘅一切。 15 圣经话：“今日，但愿你哋听我讲，唔好硬颈*，好似你哋嘅祖先以前激嬲我一样。”

16 边啲人听咗呢啲说话，仲激嬲佢呢？唔系摩西由埃及带出嚟嘅所有人咩？ 17 喺嗰40年，上帝又一直厌恶边啲人呢？唔系嗰啲犯罪而死喺旷野嘅人咩？ 18 佢向边啲人发誓，唔俾佢哋入去得享佢嘅安息呢？唔系嗰啲反叛嘅人咩？ 19 由此可见，佢哋冇得入去得享安息，系因为佢哋对上帝冇信心。