罗马书

7 各位弟兄，我对识法律嘅人讲，唔通你哋唔知道，法典系喺人在生嘅时候，先至对佢有约束力*咩？ 2 举个例，已婚嘅女人，只要丈夫仲在生，法律就规定佢属于丈夫。但系，如果丈夫死咗，丈夫嘅法律就唔能够再约束佢。 3 所以，丈夫在生嘅时候，妻子如果跟咗另一个男人，就系通奸。但系，如果丈夫死咗，妻子就唔再受丈夫嘅法律约束，即使同另一个男人结婚，都唔算通奸。

4 我嘅弟兄，你哋嘅情形都系噉，由于基督牺牲咗佢嘅身体，你哋都好似死咗一样，唔再受法典约束，可以属于另一个人，即系已经死而复生嗰位，噉而家我哋嘅行为就可以得到上帝认可*嘞。 5 以往我哋顺应有罪嘅本性*生活嗰阵，法典令我哋清楚睇出，有罪嘅欲望喺我哋身上发挥作用，令我哋犯罪而死亡*。 6 不过，而家我哋脱离咗法典嘅约束，唔再受佢限制*，噉我哋就唔再系靠住法典，用旧嘅方式做上帝嘅奴隶*，而系靠住神圣力量，用新嘅方式做奴隶。

7 噉我哋想讲嘅系乜嘢呢？法典系咪有缺陷呢*？梗系唔系啦！如果冇法典，我根本唔知道乜嘢系罪。例如，如果唔系法典话“唔可以贪婪”，我都唔知道乜嘢系贪婪。 8 不过，罪通过呢条诫命就有机可乘嘞，罪令我身上嘅各种贪婪显露出嚟，因为冇法典嗰阵，罪系死嘅*。 9 以前冇法典嘅时候，我系活着嘅。后嚟有咗诫命，罪就活着，而我就死咗嘞。 10 诫命本来系要令人得到生命，但系我睇出佢令人死亡。 11 通过诫命，罪就有机可乘，诱惑我，杀咗我。 12 其实，法典本身系圣洁嘅，诫命亦都系圣洁、正义、良善嘅。

13 噉令我死嘅系咪良善嘅法典呢？梗系唔系啦！令我死嘅系罪。罪通过良善嘅法典，令我死亡，噉就表明罪系点样嘅。诫命亦都显明，罪系对人非常有害嘅*。 14 我哋知道法典嚟自上帝，但系我只系血肉之躯，已经卖咗俾罪做奴隶。 15 我做嘅事，自己都唔明白。我想做嘅事，冇经常去做；我憎恨嘅事，反而走去做。 16 既然我做嘅，其实系我唔想做嘅事，噉即系话我承认法典系好嘅。 17 而家做呢啲恶事嘅，唔系我，而系我内在嘅罪。 18 我知道我只系血肉之躯，喺我里面一啲良善都冇。虽然我有行善嘅愿望，但系冇行善嘅能力。 19 我想做好嘅事*，我冇去做；我唔想做坏嘅事*，我反而经常做。 20 既然我做嘅，系我唔想做嘅事，噉做呢啲事嘅，就唔系我，而系我内在嘅罪。

21 我发现自己受制于一种法律：每当我想做啱嘅事，硬系有恶念缠住我。 22 我嘅内心*真系好钟意上帝嘅法律， 23 但系我睇出身体里面有另一种法律，同我思想嘅法律打紧仗，想俘掳我，令我受制于身体里面罪嘅法律*。 24 我真系可怜呀！呢个身体令我步向死亡*，边个嚟救我呢？ 25 感谢上帝通过我哋嘅主耶稣基督拯救咗我！由此可见，我嘅思想听命于上帝嘅法律*，但系我嘅身体就受罪嘅法律奴役。