提摩太前书

4 上帝启示嘅说话*清楚讲到，将来会有人离弃信仰，留意嗰啲好似嚟自上帝而误导人嘅言论*，亦都听从邪灵嘅教导， 2 因为佢哋受到虚伪又讲大话嘅人影响。嗰啲人嘅良心好似俾热铁焫过噉。 3 佢哋禁止人结婚，命令人禁戒某啲食物。其实，上帝创造呢啲食物，系要俾有信心而且确切认识真理嘅人，怀住感恩嘅心享用㗎。 4 上帝创造嘅一切都系好嘅，只要怀住感恩嘅心接受，就冇乜嘢系应该弃绝嘅。 5 凭住上帝嘅说话，通过祷告，呢啲食物就成圣嘞。

6 你用呢啲说话劝诫弟兄，就表明自己系基督耶稣嘅好仆人，亦都受真理*同埋优良教导嘅话语滋养。你一直都紧紧遵从呢种教导。 7 你唔好听嗰啲羞辱上帝嘅无稽之谈，例如有啲人*钟意讲嘅嗰啲故事。相反，你要以虔诚*为目标锻炼自己。 8 锻炼身体*嘅益处有限，但系虔诚就喺各方面都有益，能够令人喺目前同未来嘅生命，都得到上帝承诺嘅福分。 9 呢句说话真实可信，值得完全接受。 10 为咗呢个目标，我哋努力工作，竭力奋斗，因为我哋寄望于真实存在嘅*上帝。佢系各种各样嘅人嘅救主，尤其系忠信嘅人嘅救主。

11 你要不断吩咐同埋教导人呢啲事。 12 唔好俾人因为你后生而睇小你。要喺言谈、行为、爱心、信心、贞洁*呢几方面，做忠信嘅人嘅榜样。 13 喺我嚟到之前，你要继续努力提升喺朗读、劝勉*、教导方面嘅能力。 14 唔好忽视你嘅恩赐*。呢个恩赐系通过长老团按手喺你身上赐俾你嘅，同关于你嘅预言一致。 15 呢啲事你要思考*，要全神贯注，等人人都清楚睇到你喺崇拜方面不断进步。 16 你要经常留意自己同埋自己嘅教导。要坚持不懈噉做我吩咐你做嘅呢啲事，因为噉样做唔单止救到你自己，亦都救到听你讲嘅人。