启示录

22 天使又叫我睇吓一条有生命水流出嚟嘅河，河水好似水晶咁清澈，由上帝同绵羊羔嘅宝座流出嚟， 2 经过城里面大街嘅中央。河嘅两边都有生命树，每个月都结果实，每年结12次。树上嘅叶能够用嚟医治列国嘅人。

3 到时唔会再有任何咀咒。上帝同绵羊羔嘅宝座喺城里面，上帝嘅奴隶都会敬奉佢。 4 佢哋会见到佢嘅面，佢哋嘅额头都会写住佢嘅名。 5 到时亦都唔会再有黑夜，佢哋唔需要灯光同阳光，因为耶和华*上帝会照耀佢哋。佢哋会做君王，直到永永远远。

6 天使同我讲：“呢啲说话都系真嘅，系可靠*嘅。指引先知发言嘅上帝耶和华*派天使嚟，向自己嘅奴隶说明冇几耐之后一定会发生嘅事。 7 睇吓！我好快就会嚟。人如果遵守呢卷预言书上嘅说话，就有福*嘞！”

8 听到睇到呢啲事嘅就系我约翰。我听到睇到呢啲事之后，就跪喺嗰个向我说明呢啲事嘅天使脚前，想崇拜佢。 9 不过佢同我讲：“唔好呀！唔好噉样做！我同你仲有你嗰啲做先知嘅弟兄，同埋遵守呢卷书上面嘅说话嘅人一样，都只不过系奴隶。你要崇拜上帝。”

10 佢吩咐我：“唔好用印封住呢卷预言书嘅说话，因为指定嘅时候就快到嘞。 11 不义嘅人即管继续做不义嘅事，污秽嘅人即管继续做污秽嘅事啦。但系，正义嘅人就要坚守正义，圣洁嘅人要保持圣洁。

12 “‘睇吓！我好快就会嚟，奖赏同惩罚都准备好嘞，我要按照每一个人嘅行为回报佢哋。 13 我系阿尔法，亦都系奥米加*；我系最先嘅，亦都系最后嘅；我系开始，亦都系终结。 14 将自己嘅袍洗干净嘅人真系有福！佢哋有权食生命树嘅果实，亦都可以由城门入城。 15 不过城外有狗*，有通灵嘅、淫乱*嘅、杀人嘅、拜偶像嘅，同埋所有钟意讲大话、做事虚伪嘅人，佢哋都唔可以入城。’

16 “‘为咗各地嘅会众，我耶稣派我嘅天使向你哋作证，说明呢啲事。我系大卫嘅根，亦都系佢嘅子孙，系明亮嘅晨星。’”

17 神圣力量同新娘不断话：“嚟吖！”所有听到嘅人都要话：“嚟吖！”所有口渴嘅人都可以嚟。所有愿意嚟嘅人，都可以尽情*享用生命水。

18 “我向每一个听到呢卷预言书嘅说话嘅人宣告：如果有人喺呢啲说话上加添任何嘢，上帝就会用写喺呢卷书上面嘅灾祸惩罚佢； 19 如果有人删去呢卷预言书里面嘅任何说话，上帝就会将写喺呢卷书上、本来要赐俾佢嘅福分攞走，唔俾佢食生命树嘅果实，亦都唔俾佢进入圣城。

20 “为呢啲事作证嘅嗰位话：‘冇错，我好快就会嚟。’”

“阿们！主耶稣啊，请你嚟啦。”

21 愿圣民享有主耶稣嘅分外恩典。