加拉太书

3 不明事理嘅加拉太人啊，既然你哋已经清楚明白耶稣基督钉喺木柱上嘅意义*，噉到底系边个迷惑咗你哋呢？ 2 我净系想问你哋一样嘢：你哋得到神圣力量，系因为遵守法典，定系因为信从听到嘅信息呢？ 3 你哋咁不明事理㗎咩？你哋一开始顺从神圣力量嘅引导，而家反而要采纳人嘅做法*？ 4 你哋受咗咁多苦，都系白费㗎咩？我好肯定唔系白费嘅！ 5 令你哋得到神圣力量，而且喺你哋当中施行奇迹嘅嗰位*，佢噉样做，系因为你哋遵守法典，定系因为你哋信从听到嘅信息呢？ 6 谂吓亚伯拉罕嘅例子吖，佢“信从耶和华*，就被视为*正义嘅人嘞”。

7 你哋一定知道，边个持守信心，边个就系亚伯拉罕嘅子孙。 8 既然上帝喺圣经预告，佢会因为列国嘅人有信心而将佢哋称为正义嘅人*，佢就事先将呢个好消息话俾亚伯拉罕知：“万国都会因为你而赢得福分。” 9 所以，持守信心嘅人，而家就同有信心嘅亚伯拉罕一齐赢得福分嘞。

10 边个只系依靠法典*就会受咀咒，因为圣经话：“边个冇贯彻遵守法典所写嘅一切，就会受咀咒。” 11 好明显，喺上帝眼中，冇人可以凭住遵守法典而称为正义嘅人*，因为“正义嘅人会由于有信心而活着”。 12 法典并唔系以信心为基础嘅，因为法典系话：“边个遵守呢一切，就会因为噉而得到生命。” 13 圣经亦都话：“所有挂喺木柱上嘅人，都系受咀咒嘅。”基督代替咗我哋成为受咀咒嘅，佢救赎我哋，令我哋摆脱咗法典嘅咀咒， 14 噉亚伯拉罕嘅福分就可以通过基督耶稣延伸到列国嘅人身上，等我哋可以凭住信心得到上帝承诺嘅神圣力量。

15 各位弟兄，等我举个日常嘅例子吖：人订立嘅誓约一生效，就冇人可以废除，亦都唔可以再附加啲咩条文。 16 上帝嘅承诺系对亚伯拉罕同埋佢嘅后代*讲嘅。圣经唔系话“你啲子孙*”，就好似系对好多子孙讲嘅噉，而系话“你嘅后代*”，即系只有一位，就系基督。 17 我仲想指出一点：上帝既然一早就订立咗呢个誓约，430年之后先至颁布嘅法典自然唔能够令誓约失效，令承诺作废。 18 如果上帝赐下产业系根据法典，噉就唔再系根据承诺赐下嘞。不过，上帝系通过承诺，仁慈噉赐产业俾亚伯拉罕嘅。

19 噉点解要有摩西法典呢？法典系后嚟添加嘅，目的系令犯法嘅事变得明显，直到获得承诺嘅嗰位后代嚟到为止。法典系通过天使经中间人颁布嘅*。 20 单方面嘅安排唔需要中间人，而上帝就系单方面作出承诺嘅*。 21 照噉睇，法典同上帝嘅承诺系唔系对立呢？当然唔系啦！如果已经颁布嘅法典俾到生命人，人一早就靠法典得到正义嘞。 22 但系圣经表明，人系喺罪嘅控制之下嘅。噉信从耶稣基督嘅人，就可以因为信从佢而得到承诺嘅福分。

23 不过，呢种信仰*嚟到之前，我哋一直受到法典看守同埋监管，盼望上帝将呢种信仰启示出嚟。 24 于是，法典成为咗我哋嘅监护人*，带领我哋到基督嗰度，等我哋能够因为有信心而称为正义嘅人*。 25 而家，既然呢种信仰已经嚟到，我哋就唔再受监护人*监管嘞。

26 由于信从基督耶稣，你哋全部都成为上帝嘅仔女。 27 你哋已经受浸同基督联合，全部都效法咗*基督。 28 无论系犹太人定系希腊人*，奴隶定系自由人，男人定系女人，由于你哋同基督耶稣联合，全部都系一体嘞。 29 你哋既然属于基督，就真系亚伯拉罕嘅后代，系根据承诺领受产业嘅人。