哥林多后书

4 既然我哋得到上帝嘅怜悯，领受咗呢个职务，就唔会放弃。 2 我哋唔会暗中做可耻嘅坏事，唔会行事奸诈，唔会曲解上帝嘅话语*。我哋显扬真理，噉每个人就可以喺上帝面前凭良心判断我哋。 3 如果我哋宣扬嘅好消息好似俾布遮住，噉都只系对嗰啲走向灭亡嘅人嚟讲被遮住。 4 呢啲唔信主嘅人嘅思想俾目前制度*嘅神蒙蔽咗，就好似俾人整盲咗噉，所以佢哋睇唔到基督荣耀嘅好消息发出嘅光辉。而基督系上帝嘅形象。 5 我哋唔系传扬自己，而系传扬耶稣基督系主，仲有我哋为咗耶稣而成为你哋嘅仆人*。 6 上帝讲过：“要有光喺黑暗里面照出嚟。”通过基督嘅面，上帝已经用自己荣耀嘅知识照亮咗我哋嘅心。

7 我哋只不过系瓦器*，但系就有呢个珍宝放喺里面，所以，其实非凡嘅力量并唔系嚟自我哋，而系嚟自上帝。 8 我哋虽然四面受压，但系未至于陷入绝境*；虽然觉得迷惘，但系未至于走投无路*； 9 虽然受到迫害，但系未至于被抛弃；虽然俾忧虑压倒*，但系未至于灭亡。 10 我哋时刻身受死亡嘅威胁，就好似耶稣所遭遇嘅一样，噉耶稣嘅一生就喺我哋身上体现嘞。 11 我哋虽然活着，但系就为咗耶稣而时刻面对死亡，噉样，耶稣嘅一生亦都喺我哋呢啲会死嘅人身上体现出嚟。 12 噉就可以睇出，我哋要面对死亡，而你哋就会得到生命。

13 圣经讲过：“我信从上帝，所以我噉样讲说话。”既然我哋有同一种信心，同一种精神*，噉我哋就同样系信从上帝，所以都噉样讲说话。 14 我哋知道，既然上帝令耶稣复活，都会令我哋复活，同耶稣一齐。佢会将我哋同你哋一齐带到耶稣面前。 15 呢一切都系为咗你哋而发生嘅。噉样，既然有更多人感谢上帝，分外恩典就越嚟越丰厚，令荣耀归于上帝。

16 所以，我哋唔会放弃。虽然我哋外在嘅人渐渐衰退，但系内在嘅人*就日日更新。 17 我哋遭遇嘅患难*系短暂同轻微嘅，但系为我哋带嚟嘅荣耀就无与伦比，日益辉煌*，永远长存。 18 我哋注视嘅，唔系睇得到嘅，而系睇唔到嘅。因为睇得到嘅系暂时嘅，而睇唔到嘅系永恒㗎。