哥林多后书

12 我真系要夸耀一下。我想讲吓主赐下嘅异象*同启示，虽然噉做对我冇乜益处。 2 我识得一个人，佢系同基督联合嘅。14年前，佢突然间被接去三重天。当时佢系咪亲身去*，我唔知，只有上帝先至知道。 3 我真系识得呢个人，但系佢到底系咪亲身去嘅*，我唔知，只有上帝先至知道。 4 佢突然间被接去乐园，听到一啲说话，系人唔可以用言语表达，亦都唔可以讲出嚟嘅。 5 我会因为呢个人而夸耀，但系除咗自己软弱嘅一面，我唔会夸耀自己。 6 即使我想夸耀，都唔算唔合理，因为我讲嘅系真话。不过，我宁愿唔夸耀，以免有人将我抬得太高，超过佢喺我呢度见到同听到嘅。 7 佢哋唔应该因为我得到咁特殊嘅启示就过分抬举我。

我身上有一条刺，令我唔会太骄傲。呢条刺好似撒但嘅天使，不断打我块面*。噉样我就唔会太骄傲嘞。 8 为咗呢件事，我曾经三次恳求主，希望呢条刺离开我。 9 不过主同我讲：“我俾你嘅分外恩典已经足够嘞，因为我嘅力量喺人软弱嘅时候就显得完美。”所以，我最钟意夸耀自己软弱嘅一面，噉样基督嘅力量就会好似帐篷一样覆庇我。 10 为咗基督，我乐意忍受软弱、侮辱、贫穷、迫害、困难。因为每当我软弱无力，我就大有力量。

11 我而家唔合理，系你哋逼我嘅，因为我本来应该受到你哋嘅赞赏*。就算我喺你哋眼中唔算得乜嘢，都冇一样比唔上你哋嗰啲超等使徒。 12 我喺你哋当中百般忍耐，用神迹、奇事*、大能嘅作为，证明咗我使徒嘅身份。 13 我对你哋系咪差过对其他会众吖？系嘅话，可能就只有我冇成为你哋嘅负担呢件事，请你哋原谅我嘅过错。

14 我准备好去你哋嗰度，今次系第三次嘞。不过，我唔会成为你哋嘅负担。因为我唔系要你哋嘅嘢，而系想见到你哋。从来都唔系仔女为父母积蓄，而系父母为仔女积蓄。 15 至于我，为咗你哋，我绝对乐意付出，甚至付出一切。既然我咁爱你哋，你哋唔系应该好似我爱你哋噉爱我咩？ 16 虽然系噉，我从来都冇成为你哋嘅负担。但系你哋就话我“狡猾”，话我用“奸计”呃*你哋。 17 我派去你哋嗰度嘅人，我有冇利用过佢哋任何一个，去占你哋便宜呢？ 18 之前我鼓励提多去你哋嗰度，仲派咗一个弟兄同佢一齐去。提多有冇占过你哋便宜吖？我哋唔系有同样嘅精神*，用同样嘅方式*行事为人咩？

19 你哋系咪以为我哋喺度为自己辩护呢？其实上帝知道我哋呢啲同基督联合嘅人，讲嘅系真话。亲爱嘅朋友，我哋做呢一切都系为咗鼓励你哋。 20 我只系怕我去到你哋嗰度之后，发觉你哋嘅行为唔符合我嘅期望，而我嘅行为都唔符合你哋嘅期望。我担心会见到你哋争执、妒忌、大发脾气、纷争、背后中伤人、讲闲话、自高自大、混乱不安。 21 我只系怕再去你哋嗰度嘅时候，我嘅上帝令我喺你哋面前蒙羞，而且我会为好多人痛心，因为佢哋犯咗罪，做咗不洁嘅事，淫乱*，行为无耻*，但系仍然未悔改。