歌罗西书

4 做主人嘅，你哋要用正义公平嘅方式对待奴隶，因为你哋知道自己都有一位主人喺天上。

2 祷告要坚持不懈，唔好忽略祷告*，仲要怀住感恩之心噉做。 3 你哋要为我哋祷告，求上帝打开传道嘅大门，等我哋可以宣扬关于基督嘅神圣秘密（我就系因为呢个神圣秘密而被囚禁嘅）。 4 你哋都要祷告，等我可以尽本分，清清楚楚噉传讲呢个秘密。

5 你哋对会众以外嘅人要有智慧，尽力善用时间*。 6 任何时候都要讲仁慈体贴嘅说话，好似食物落盐调味，噉你哋就识得点样回应每个提出问题嘅人。

7 推基古会将我嘅近况全部话俾你哋知。佢系我亲爱嘅弟兄，系主嘅忠心仆人，同我一齐做主嘅奴隶。 8 我派佢去你哋嗰度，等你哋知道我哋嘅情况，可以得到安慰。 9 我亲爱嘅忠信弟兄奥尼西慕都同佢一齐去。佢原本就系你哋嗰度嘅人。佢哋两个会将呢度发生嘅所有事话俾你哋知。

10 同我一齐被囚禁嘅亚里达古问候你哋。巴拿巴嘅表弟马可都问候大家。（你哋都收到指示，如果佢去你哋嗰度，就要欢迎佢。） 11 耶数亦都问候大家，佢又叫做犹士都。佢哋几个都受过割礼。只有佢哋系同我一齐工作嘅同伴，为上帝嘅王国效力。佢哋令我得到好大嘅安慰*。 12 以巴弗问候你哋。佢原本系你哋嗰度嘅人，系基督耶稣嘅奴隶。佢经常为你哋恳切祷告，希望你哋一直做成熟嘅人*，亦都坚信上帝嘅一切旨意会实现。 13 我可以作证，佢为咗你哋，为咗老底嘉城同埋希拉波利斯城嘅人，付出咗好大努力。

14 亲爱嘅路加医生问候你哋，底马都问候你哋。 15 请代我问候老底嘉嘅弟兄，亦都问候宁法同喺佢屋企聚会嘅会众。 16 你哋读出呢封信之后，要交俾老底嘉嘅会众宣读，亦都要读我寄俾老底嘉嘅嗰封信。 17 另外，请同亚基布讲：“你要专注于主交俾你嘅职务，直到任务完成。”

18 我保罗喺呢度亲笔向你哋问好。唔好忘记我呢个被囚禁嘅人。愿上帝赐分外恩典俾你哋。