彼得前书

4 既然基督喺身体上*受过苦，你哋都要用基督嘅思想*武装自己，因为喺身体上受苦嘅人已经停止犯罪， 2 唔再顺应人嘅欲望生活，从此按照上帝嘅旨意，善用喺世上余下嘅时间*。 3 以前你哋按照列国嘅人嘅意思生活，沉迷于无耻嘅行为*、放纵嘅欲望、纵酒、狂欢、竞饮，同埋拜偶像嘅不法行为，花嘅时间已经够多嘞。 4 由于你哋冇再同佢哋同流合污*，冇再过放纵堕落嘅生活，佢哋就觉得好奇怪，诋毁你哋。 5 但系呢啲人要向主交账，主好快就会审判活人同死人嘞。 6 所以，好消息亦都传咗俾死人*。噉样，虽然世人按照外在条件*评断*佢哋，但系喺上帝眼中，佢哋系顺应神圣力量嘅指引而活嘅。

7 不过，万物嘅终结临近嘞。所以要思想健全，留意经常祷告*， 8 最重要嘅系，要热切噉彼此相爱，因为爱能够遮盖好多罪。 9 你哋要好客，彼此款待，唔好埋怨。 10 上帝用各种方式显示佢嘅分外恩典。身为分外恩典嘅好管家，每个人都应该按照自己得到嘅恩赐*，尽力为大家服务。 11 讲解嘅，就应该按照上帝嘅圣言讲解；为人服务嘅，就应该靠住上帝赐予嘅能力服务。噉样，上帝就能够喺一切事上通过耶稣基督得到荣耀。荣耀同大能永永远远都系佢嘅。阿们。

12 亲爱嘅朋友，你哋经历紧如火嘅考验，但系唔需要惊讶，唔好觉得自己遇到乜嘢奇怪嘅事。 13 相反，你哋应该欢欣，因为你哋能够经历基督受过嘅苦。噉样，佢嘅荣耀显露出嚟嘅时候，你哋就可以欢欣雀跃嘞。 14 如果你哋系因为基督嘅名而俾人指责*，就有福嘞*，因为上帝荣耀嘅神圣力量喺你哋身上*。

15 不过，你哋边个都唔应该因为杀人、偷窃、作恶、好管闲事而受苦。 16 人如果因为自己系基督徒而受苦，就唔应该觉得羞耻。佢应该继续以基督徒嘅身份*生活，不断荣耀上帝。 17 指定嘅时候到嘞，审判要由上帝嘅家开始。既然系从我哋开始先，唔服从上帝好消息嘅人又会有点样嘅结局呢？ 18 “连正义嘅人得救都唔容易，噉藐视上帝嘅人同罪人又会有乜嘢遭遇呢？” 19 所以，因为遵行上帝嘅旨意而受苦嘅人，应该继续行善*，继续将自己交托俾信实可靠嘅创造主。