帖撒罗尼迦前书

5 各位弟兄，关于时候同时期，你哋唔需要我哋写乜嘢俾你哋。 2 因为你哋自己清楚知道，耶和华*嘅日子嚟到，就好似贼喺夜晚嚟到一样。 3 啲人话“和平安全嘞！”嘅时候，佢哋就会即刻面临突如其来嘅毁灭，就好似孕妇面临产痛噉。佢哋一定走唔甩。 4 但系各位弟兄，你哋唔喺黑暗之中，所以嗰个日子突然嚟到嗰阵，你哋唔会措手不及，好似日头嚟到嗰阵，贼措手不及一样， 5 因为你哋全部都系光明之子，白昼之子。我哋唔属于黑夜，亦都唔属于黑暗。

6 所以，我哋唔应该好似其他人噉继续沉睡，反而几时都应该警醒，保持清醒。 7 因为瞓觉嘅人系喺夜晚瞓觉，饮醉嘅人系喺夜晚饮醉。 8 但系我哋既然属于白昼，就应该保持清醒，将信心同爱心当做胸甲着上身，将得救嘅希望当做头盔， 9 因为上帝拣选我哋，唔系要惩罚我哋*，而系要我哋通过我哋嘅主耶稣基督得救。 10 基督为我哋而死，等我哋无论系生系死*，都能够同佢一齐活着。 11 所以，你哋要不断互相安慰*，互相鼓励，就好似你哋而家做紧嘅噉。

12 各位弟兄，我哋请求你哋，要尊重嗰啲喺你哋当中辛勤工作嘅人，即系喺主嘅工作上督导、劝诫你哋嘅人， 13 亦都要因为佢哋嘅工作而特别敬重佢哋，爱佢哋。你哋要促进大家之间嘅和睦。 14 另外，各位弟兄，我哋劝你哋，要警告*唔守规矩*嘅人，安慰情绪低落嘅人*，支持软弱嘅人，对所有人都要有耐心。 15 你哋要小心，唔好以恶报恶，几时都要努力互相善待，亦都要善待其他人。

16 几时都要喜乐， 17 不断祷告， 18 事事感谢。呢个就系上帝对你哋跟随基督耶稣嘅人定嘅旨意。 19 唔好令神圣力量嘅火熄灭。 20 唔好藐视上帝启示嘅信息*。 21 事事都要验证，美好嘅就要谨守。 22 各种各样嘅恶事，都要禁戒。

23 愿赐人安宁*嘅上帝令你哋完全圣洁。喺我哋嘅主耶稣基督返到我哋呢度嘅时候*，愿你哋共同嘅精神*、生命*、身体，喺各方面都健全，得到保全，无可指责。 24 呼召你哋嗰位系信实可靠嘅，佢一定会噉样帮助你哋。

25 各位弟兄，请不断为我哋祷告。

26 请亲切噉*问候所有弟兄。

27 我奉主嘅名郑重吩咐你哋，要向所有弟兄读出呢封信。

28 愿我哋嘅主耶稣基督赐分外恩典俾你哋。