哥林多后书

5 我哋喺地上嘅住所，就系呢个好似帐篷一样嘅身体。我哋知道，如果呢个住所被拆毁*，上帝就一定会俾我哋喺天上得到永远长存嘅住所，而天上嘅住所并唔系人手建造㗎。 2 我哋喺而家呢个住所悲叹，渴望得到我哋喺天上嘅住所，就好似想着起件衫噉。 3 如果我哋真系着咗呢件衫，就唔会赤身露体嘞。 4 我哋喺呢个帐篷里面悲叹，承受压力，唔系因为想好似除低件衫噉摆脱呢个帐篷，而系因为想得到天上嘅住所*，噉样，永远嘅生命就能够取代*会死嘅身体。 5 上帝塑造我哋，令我哋准备好领受呢种生命，佢将神圣力量赐俾我哋作为凭证*，令我哋清楚知道将来会得到产业。

6 所以，我哋时刻勇敢无惧。我哋知道，只要自己仍然以呢个身体为家，就仲系远离主*。 7 我哋行事为人，系凭信心，唔系凭眼见。 8 我哋勇敢无惧，希望可以同主一齐居住，唔再以呢个身体为家。 9 我哋亦都下定决心，无论系同主一齐居住，定系远离主，都要得到佢嘅接纳， 10 因为我哋每个人都要企喺基督嘅审判座前*，按照自己所做嘅好事或者坏事而得到回报*。

11 所以，既然我哋知道敬畏主系乜嘢意思*，就不断劝导人相信我哋传讲嘅道理。上帝清楚认识我哋*，但系我希望你哋都清楚认识我哋*，凭良心判断我哋系点样嘅人。 12 我哋唔系又喺你哋面前自己赞自己*，而系等你哋有机会因为我哋而夸耀。噉样，你哋就能够回答嗰啲夸耀外表，而唔夸耀内心嘅人。 13 就算我哋疯狂，都系为咗上帝；而我哋思想健全，系为咗你哋。 14 基督嘅爱好似催逼住我哋噉，因为我哋明白到：以往人人都已经“死去*”，于是有一个人为所有人而死。 15 佢已经为所有人死，然后复活，噉活人就唔应该再为自己而活，而系为主而活。

16 所以，从今以后，我哋唔会再用人嘅观点睇*人嘞。就算我哋以前用人嘅观点睇基督，而家都唔会再噉做。 17 只要系同基督联合嘅，都系新创造出嚟嘅人。旧嘅已经过去，新嘅已经出现喇。 18 呢一切都嚟自上帝。佢通过基督令我哋同佢和好，仲将帮助人同佢和好嘅职务赐俾我哋。 19 呢个职务就系要我哋话俾人知，上帝通过基督令世人同佢和好，唔再追究佢哋嘅罪过。佢已经将呢个和好嘅信息交托咗俾我哋嘞。

20 所以，我哋代基督做大使，就好似上帝通过我哋提出请求一样。我哋代基督恳求人，话：“你哋同上帝和好啦。” 21 基督冇犯过罪*，上帝为咗我哋，将佢赐下，成为赎罪祭*，噉样我哋就可以通过佢成为上帝眼中正义嘅人。