雅各书

3 我嘅弟兄，你哋当中唔应该人人都做导师*，因为知道我哋做导师嘅会受到更严格*嘅审判。 2 我哋人人都难免多次犯错*。边个冇喺言语上犯错，边个就系完美嘅人，可以控制*全身。 3 如果要马服从人，只要将辔头套喺马嘅嘴，就驾驭到佢全身嘞。 4 又谂吓船吖，船就算好大，又有强风驱动，但系舵手只要用好细嘅舵，就可以令船行驶到佢要去嘅地方。

5 同样，舌头喺身体入面虽然好细，但系就可以讲夸大嘅说话。睇吓，好细嘅火苗就可以烧着一大片森林！ 6 舌头就系火。喺我哋身体各部分当中，舌头就系一个唔正义嘅世界*。佢玷污全身，可以摧毁人嘅一生*。舌头嘅火会带嚟彻底嘅毁灭*。 7 各种野生动物、飞鸟、爬行动物、海洋生物，都系人类可以驯服，而且已经驯服嘅。 8 不过，舌头就冇人驯服到，而且唔受管束、害人不浅，充满致命嘅毒素。 9 我哋用舌头赞美天父耶和华*，又用舌头咀咒被创造成“同上帝相似”嘅人。 10 赞美同咀咒竟然出自同一把口！

我嘅弟兄，噉系唔啱㗎。 11 甘甜同苦涩嘅水，点会由同一个泉眼涌出嚟呢？ 12 我嘅弟兄，无花果树点会结出橄榄呢？葡萄树都结唔出无花果㗎，系咪？同样，咸水嘅源头都冇可能涌出甘甜嘅水。

13 你哋当中边个有智慧同理解力呢？佢就应该有行动，显出好品行，表现出基于智慧嘅温和。 14 不过，你哋如果心存妒忌*同埋好胜嘅精神*，就唔好吹嘘，唔好讲大话违背真理。 15 呢种智慧唔系嚟自天上嘅，而系嚟自地上嘅，系好似动物噉嘅*，系嚟自邪灵嘅。 16 边度有妒忌、好胜嘅精神*，边度就有混乱同埋各种卑劣嘅事。

17 不过嚟自天上嘅智慧，首先令人有纯洁嘅心，跟住令人促进和睦、通情达理、乐意服从，充满怜悯，亦都结出好多好果实*，唔偏心，唔虚伪。 18 促进和睦嘅人会喺和睦嘅情况下撒种，而且会收获正义嘅果实。