点解上帝要人组织起嚟崇拜佢？

古代有个人叫亚伯拉罕，佢系个族长。上帝将亚伯拉罕嘅后代组织起嚟，成为一个国家，叫做以色列国，仲为呢个国家定下一套法律。上帝令以色列人有机会认识佢嘅话语，知道点样正确噉崇拜佢。所以，以色列国有责任带头尊重上帝嘅话语。（诗篇147:19,20）上帝噉样做，系为咗使其他国家民族嘅人都可以因为以色列国而得益。 请读创世记22:18

上帝拣选古代以色列人做佢嘅见证人。其他国家民族嘅人可以通过以色列国睇出，服从上帝嘅命令有乜嘢益处。（申命记4:6）佢哋睇到以色列人点样生活同崇拜上帝，就可以认识上帝。 请读以赛亚书43:10,12

后来，以色列人冇珍惜同上帝嘅友谊，上帝就将真基督徒组织起嚟，成为会众，代替以色列人。（马太福音21:43；23:37,38）从此之后，真基督徒就取代以色列人成为耶和华嘅见证人嘞。 请读使徒行传15:14,17

耶稣将佢嘅门徒组织起嚟，吩咐佢哋向所有国家民族嘅人传道，帮助人成为基督徒。（马太福音10:7,11；24:14；28:19,20）末日就快到嘞，传道工作不断扩展，去到一个前所未有嘅规模。几百万嚟自唔同国家民族嘅人组织起嚟，同心崇拜耶和华。（启示录7:9,10）佢哋组织起嚟，亦都系为咗互相鼓励，互相帮助。喺世界各地，佢哋参加聚会，学习圣经，受到同样嘅教导。 请读希伯来书10:24,25

喺19世纪70年代，有一啲人开始仔细研读圣经，结果发现一啲俾人歪曲或者忽略咗好多年嘅圣经真理。佢哋睇出，耶稣曾经将门徒组织起嚟去传道，于是佢哋组织起嚟，开始一个遍及全球嘅传道工作。1931年，呢个组织采用咗“耶和华见证人”呢个名称。 请读使徒行传1:8；2:1,4；5:42

喺1世纪，各地嘅基督徒会众都受一个管理中心指导，呢个管理中心承认佢哋嘅首领系耶稣基督。各地嘅会众都从呢个中心嘅管理得益。（使徒行传16:4,5）今日，耶和华见证人当中一啲经验丰富嘅长老亦都组成一个管理中心，叫做中央长老团。世界各地嘅耶和华见证人都从呢个中央长老团嘅管理得益。中央长老团直接管理世界各地嘅分部，呢啲分部嘅工作包括翻译、印刷、分发圣经书刊（已翻译成超过七百几种语言）。噉样，世界各地超过十一万群会众，就可以得到中央长老团按照圣经所俾嘅指导同鼓励嘞。每一群会众都有长老，亦都叫监督。呢啲基督徒男子都必须达到圣经所讲嘅要求。佢哋怀住爱心照顾“上帝嘅羊群”。 请读彼得前书5:2,3

耶和华见证人组织起嚟传讲上帝王国嘅好消息，帮助人成为基督徒。佢哋好似1世纪嘅基督徒噉逐家逐户传道，亦都帮助热爱真理嘅人学习圣经。（使徒行传20:20）耶和华见证人唔单止系个组织，亦都系个大家庭。佢哋有仁爱嘅父亲耶和华上帝，有相亲相爱嘅弟兄姊妹。（帖撒罗尼迦后书1:3）耶和华见证人组织起嚟系为咗崇拜上帝，使上帝欢喜，亦都系为咗帮助其他人，所以呢个组织系世上最快乐嘅大家庭。 请读诗篇33:12；使徒行传20:35