点解我哋要向拥有一切嘅上帝奉献？

1,2．耶和华点样慷慨噉运用佢嘅资源？

耶和华系非常慷慨嘅上帝。我哋拥有嘅一切都系源于佢嘅。所有金银同其他地球上嘅自然资源都属于耶和华，佢运用呢啲资源嚟维持地上嘅生命。（诗篇104:13-15；哈该书2:8）圣经记载咗好多例子，系关于耶和华点样施行奇迹，运用呢啲资源去帮助佢嘅子民。

² 以色列人喺旷野40年期间，耶和华一直提供吗哪同水俾佢哋。（出埃及记16:35）结果，“佢哋毫无缺乏”。（尼希米记9:20,21）耶和华通过先知以利沙施行奇迹，使一个忠心嘅寡妇家里嘅食油增加多倍。嚟自上帝嘅礼物使妇人可以还清债务，而且仲有足够嘅钱使佢同两个仔继续生活。（列王纪下4:1-7）喺耶和华嘅帮助下，耶稣施行过奇迹提供食物，甚至金钱。（马太福音15:35-38；17:27）

 3．呢篇课文会讨论乜嘢？

³ 耶和华拥有无限嘅资源，可以用嚟维持受造物嘅生命。但系，上帝依然鼓励佢嘅子民用自己嘅资财嚟支持佢地上组织嘅运作。（出埃及记36:3-7；请读箴言3:9）点解耶和华希望我哋将自己宝贵嘅资财献俾佢？喺圣经时代，耶和华嘅仆人点样运用物质嚟支持佢嘅工作？今日上帝嘅组织点样运用捐款？呢篇课文会回答呢啲问题。

 4．我哋支持耶和华嘅工作就向佢表明乜嘢？

⁴ 我哋向耶和华作出奉献，因为我哋爱佢亦都感激佢。当我哋谂翻耶和华为我哋所做嘅一切，内心就深受感动。大卫王解释建造圣殿工程嘅需要嗰时，佢承认我哋所拥有嘅一切都嚟自耶和华，所以我哋献俾耶和华嘅一切，都系佢赐俾我哋嘅。（请读历代志上29:11-14）

 5．圣经点样表明无私奉献喺耶和华眼中系好重要嘅？

⁵ 奉献系崇拜耶和华嘅一种方式。使徒约翰喺一个异象里面听到耶和华嘅仆人喺天上话：“耶和华我哋嘅上帝，你配得荣耀、尊崇、力量，因为你创造咗一切，一切都系因为你嘅旨意先至存在，先至被创造嘅。”（启示录4:11）冇错，耶和华配得一切荣耀同尊崇，所以我哋要将自己最好嘅献俾佢。耶和华通过摩西吩咐以色列人每年要喺耶和华面前举行三次节期。喺呢啲节期嘅崇拜活动当中，包括向耶和华奉献。当时嘅以色列人受到提醒，唔可以“空手到耶和华面前”。（申命记16:16）今日都一样，无私奉献喺耶和华眼中系好重要嘅。我哋噉样做就表明自己重视同支持耶和华地上组织嘅工作。

 6．点解表现慷慨对我哋嚟讲系好嘅？（请睇吓课文开头嘅图片）

⁶ 我哋慷慨施与而唔系只系接受，其实系对我哋好嘅。（请读箴言29:21）我哋可能谂到一个细路仔平时从父母嗰度收到小小零用钱，佢就买翻份礼物送俾爸爸妈妈。你认为佢父母收到呢份礼物嘅时候有乜嘢感觉呢？又或者一个做紧先驱嘅弟兄或姊妹同父母一齐住，佢俾一笔钱父母去支持屋企嘅开销。虽然父母未必期望仔女噉样做，但系佢哋可能都会接受呢笔钱，因为仔女可以通过呢个机会向父母表现感恩之心。同样，耶和华知道我哋将最宝贵嘅献俾佢系对我哋有益。

7,8．喺圣经时代，耶和华嘅子民点样喺以下两方面作出捐献，立下榜样：（甲）某啲项目上？（乙）上帝嘅工作上？

⁷ 我哋从圣经学到，耶和华嘅子民会作出奉献支持佢嘅工作。有时佢哋会为某啲项目作出捐献。例如，摩西建造圣幕嘅时候，佢鼓励人民作出奉献。后来大卫王为建筑圣殿做准备嗰时，佢亦都噉样做。（出埃及记35:5；历代志上29:5-9）喺约阿施王在位期间，祭司用收集到嘅钱嚟修葺耶和华嘅殿。（列王纪下12:4,5）公元1世纪，犹地亚发生饥荒，当地嘅弟兄好需要得到援助。其他基督徒知道后就按照自己嘅能力，献出物资捐助受灾嘅弟兄。（使徒行传11:27-30）

⁸ 耶和华嘅子民亦都会资助嗰啲喺上帝工作上带头嘅人。根据摩西律法，利未部族同其他部族唔一样，佢哋唔会得到产业。不过，以色列人会捐出佢哋嘅十分之一，使利未人可以喺圣幕专心工作。（民数记18:21）类似嘅系，一啲慷慨嘅妇女帮助耶稣同佢嘅门徒，“呢啲妇女都用自己嘅财物资助佢哋”。（路加福音8:1-3）

 9．以往嘅捐献系点样嚟嘅呢？

⁹ 当然，呢啲捐献嚟自唔同嘅来源。喺旷野建造圣幕嘅时候，以色列人可能将佢哋从埃及带走嘅贵重物品都捐献出嚟。（出埃及记3:21,22；35:22-24）喺1世纪，有啲基督徒变卖自己嘅田地、房屋等财物，将卖到嘅钱交俾使徒。使徒就将收集到嘅钱分俾有需要嘅人。（使徒行传4:34,35）其他人亦都会经常拨出一啲钱去支持上帝嘅工作。（哥林多前书16:2）所以，无论系好有钱嘅抑或系好贫穷嘅，每个人都可以作出捐献。（路加福音21:1-4）

10,11．（甲）喺表现慷慨方面，我哋可以点样效法耶和华嘅古代仆人？（乙）你对支持王国工作呢件事有乜嘢感觉？

¹⁰ 今日，我哋都会受到鼓励喺一啲特别嘅安排上作出捐献。例如，你会众系咪计划起个新嘅聚会所？又或者你而家用嘅聚会所系咪装修紧？我哋可能会听到宣布话，本地嘅分部办事处需要装修、受天灾影响嘅弟兄需要帮助，或者我哋需要支持大会嘅开销。我哋嘅捐款可以支持喺世界总部同埋全球各个分部工作嘅弟兄姊妹，以及特派传道员、特别先驱同从事分区探访工作嘅弟兄姊妹。你嘅会众亦都可能会经常捐款支持世界各地嘅建筑工程，例如兴建大会堂同聚会所。

¹¹ 喺最后嘅日子，我哋每个人都可以支持耶和华正喺度成就嘅工作。大部分嘅捐款都系匿名嘅。我哋可以暗中将捐款放喺聚会所嘅捐款箱，或者可以上jw.org网站捐款。我哋可能会觉得自己小小嘅捐款冇乜价值。不过，组织收到嘅捐献其实大部分嚟自好多笔细少嘅数额，而唔系几笔巨款。虽然有啲弟兄姊妹好似马其顿人一样“极度贫困”，但系佢哋仍然渴望有机会表现慷慨，作出捐献。（哥林多后书8:1-4）

12．组织点样尽力以妥善嘅方式使用捐款？

¹² 对于点样使用组织嘅捐款，中央长老团会事先祷告、慎重考虑，尽力表现忠信同睿智。（马太福音24:45）佢哋会小心处理收集到嘅捐款，并按照预算好好运用。（路加福音14:28）喺圣经时代，忠心嘅管家会跟从指示确保所得嘅捐献只用喺指定嘅用途。例如，以斯拉重返耶路撒冷嘅时候带住波斯王嘅捐献，呢啲捐献包括金、银同其他物料，总值超过今日嘅1亿美元。以斯拉将呢啲物资视为献俾耶和华嘅礼物，考虑到会途经危险路段，佢采取咗一啲详细嘅步骤嚟保护财物。（以斯拉记8:24-34）使徒保罗曾经收集过一啲用嚟救济犹地亚基督徒嘅捐款。佢实行措施，确保嗰啲派送物资嘅人“喺耶和华睇嚟处事诚实，喺人睇嚟亦都处事诚实”。（请读哥林多后书8:18-21）今日，我哋嘅组织效法以斯拉同保罗嘅榜样，跟从指示，小心谨慎处理同运用捐款。

13．我哋应该点样睇组织简化运作嘅安排？

¹³ 一个家庭可能会作出调整去平衡收入同开支，或者考虑点样减少支出，过简朴嘅生活，以求为耶和华作更多嘅服务。耶和华嘅组织亦都一样。近年来，有好多令人兴奋嘅新安排，不过资金有时会入不敷出。所以，组织会经常考虑可以点样减少开支同简化工作程序，目的系善用你哋慷慨嘅捐款嚟成就更多事。

14-16．（甲）你嘅捐款成就紧乜嘢事呢？（乙）你点样从呢啲安排得益？

¹⁴ 好多事奉耶和华多年嘅弟兄姊妹都话，从未见过有一段时期好似而家噉，可以得到咁多灵粮。请谂吓，近年来，我哋有jw.org网站同JW电视网。《圣经新世界译本》以越来越多嘅语言版本发行。2014至2015年，组织喺全球14个城市嘅大型体育馆，举行咗为期3日题名为“不断先追求上帝嘅王国”嘅国际大会。有机会出席呢啲大会嘅人都非常兴奋。

¹⁵ 好多人都感激耶和华嘅地上组织提供丰富嘅灵粮，使佢哋得益不浅。例如，一对喺亚洲服务嘅夫妇提到JW电视网话：“我哋受到委派，喺一个小城市服务。所以，我哋有时觉得好似同外界隔绝，好容易忘记耶和华嘅工作规模遍及全球。但系我哋收睇JW电视网嘅节目嗰阵，就意识到自己都系呢个国际弟兄团体嘅一分子。本地嘅弟兄姊妹都好钟意JW电视网。我哋经常都会听到佢哋讲，睇完每月嘅电视节目之后，觉得自己同中央长老团成员更亲近。而家，佢哋因为自己可以属于耶和华嘅组织而感到更加自豪。”

¹⁶ 而家全球兴建或者翻新紧嘅聚会所差唔多有2500个。洪都拉斯嘅一群会众开始使用新嘅聚会所之后，会众嘅一位成员话：“我哋真系好开心可以成为耶和华宇宙大家庭嘅一分子，而且能够属于一个咁好嘅国际弟兄团体。我哋一直都好希望喺自己嘅社区有聚会所，而家终于美梦成真。”好多人都因为收到自己语言嘅圣经同圣经书刊，或者受天灾影响时得到弟兄姊妹嘅帮助，又或者睇到自己社区嘅都市见证工作同公众场所见证工作有好好嘅成果，而表达出类似嘅感激。

17．今日组织嘅运作点样表明背后有耶和华嘅支持？

¹⁷ 一般人唔明白，点解我哋只系靠自愿捐献都能够成就咁多事。一间大公司嘅总裁参观完我哋嘅印刷设施之后就觉得好惊讶，因为呢啲工作都系由志愿人员同自愿捐款维持嘅，完全冇销售冇集资。佢话照计我哋噉样做系唔会成功嘅。我哋都同意！我哋知道因为有耶和华喺背后支持我哋，先可以成就到呢啲事。（约伯记42:2）

18．（甲）支持上帝嘅王国使我哋得到乜嘢福分？（乙）我哋可以点样训练仔女同新人支持上帝嘅王国？

¹⁸ 今日，耶和华使我哋有荣幸可以支持呢项伟大嘅王国工作。佢保证，如果我哋支持佢嘅王国就会得到福分。（玛拉基书3:10）耶和华承诺嗰啲慷慨嘅人必得丰盈。（请读箴言11:24,25）表现慷慨亦都会令我哋开心，因为“施与比接受更快乐。”（使徒行传20:35）我哋仲可以通过自己嘅言行训练仔女同新人，使佢哋知道点样作出奉献支持上帝嘅王国，从而得享福分。

19．你从呢篇课文得到乜嘢鼓励？

¹⁹ 我哋嘅一切都系耶和华所赐嘅。我哋将所得到嘅用嚟支持佢嘅王国就表明我哋爱佢，亦都感激佢为我哋所做嘅一切。（历代志上29:17）当以色列人建造圣殿嘅时候，“众人自愿奉献，人民就欢喜，因为佢哋全心自愿奉献俾耶和华”。（历代志上29:8,9）愿我哋继续将耶和华赐俾我哋嘅一切都奉献俾佢，噉样我哋就能够得到真正嘅快乐同满足。