喺生活上全心信赖耶和华！

 1． 点解我哋所有人都需要得到安慰？

我哋所有人都需要得到安慰。我哋嘅生活可能充满苦恼、失望同悲伤。原因可能系年纪越来越大、患上疾病或者有亲友去世，又可能系因为受到其他人唔好嘅对待，或者周围嘅人变得越来越暴力。呢个“难以应付嘅非常时期”所发生嘅一切，都充分证明我哋正生活喺“最后嘅日子”。（提摩太后书3:1）每过一日，我哋就更接近新世界。不过，我哋等待耶和华实现佢嘅应许可能已经等咗好耐，而我哋面对嘅困难变得越来越多。噉我哋喺边度可以得到安慰呢？

2,3． （甲）关于哈巴谷，我哋知道乜嘢？（乙）点解我哋要讨论哈巴谷书？

² 分析哈巴谷书嘅经文可以帮助我哋揾出答案。虽然经文并冇详细介绍哈巴谷嘅生平，不过以佢嘅名命名嘅呢卷书可以使我哋受到鼓励。哈巴谷嘅意思可能系“热烈嘅拥抱”，可以指耶和华俾人安慰嘅拥抱，或者指崇拜耶和华嘅人信心十足噉依附佢。哈巴谷向上帝提出一啲疑问，想了解佢对呢啲问题嘅睇法。耶和华回答咗呢啲问题，亦都启示哈巴谷将对话记录落嚟，因为佢知道我哋可以从中得益。（哈巴谷书2:2）

³ 我哋从圣经睇出，哈巴谷先知充满愁苦。同佢有关嘅事，我哋只能够通过佢同耶和华之间嘅亲密对话嚟获知。哈巴谷书作为“从前写落嚟嘅［所有］话”嘅一部分保存喺上帝嘅话语圣经入面，“等我哋靠住忍耐，靠住圣经所带嚟嘅安慰，可以怀有希望”。（罗马书15:4）我哋自己可以点样从哈巴谷书得益？呢本书可以帮助我哋睇出，信赖耶和华系乜嘢意思。另外，哈巴谷嘅预言使我哋确信，无论面对点样嘅痛苦同难题，我哋依然可以保持内心平静。而家，等我哋详细讨论吓哈巴谷书嘅内容。

 4． 点解哈巴谷感到焦虑不安？

⁴ 请读哈巴谷书1:2,3。哈巴谷生活喺一段非常艰难嘅时期。佢因为身边嗰啲邪恶、暴力嘅人而感到悲痛万分。哈巴谷睇到自己嘅同胞行事不公，又互相恶待，佢心入面谂：“恶人恶事几时先至终止？点解耶和华咁耐都唔采取行动？”佢觉得好无助。所以，喺呢段黑暗时期，佢请求耶和华伸出援手。哈巴谷可能开始觉得耶和华唔关心佢嘅子民，认为佢迟迟都唔采取行动。你能唔能够理解佢嘅感受呢？

 5． 我哋从哈巴谷书可以学到乜嘢重要嘅事？（请睇吓课文开头嘅图片）

⁵ 哈巴谷系咪对耶和华失去信心呢？佢系咪唔再相信耶和华嘅应许会实现？完全唔系！佢将自己嘅难题同忧虑都交俾耶和华而唔系人，呢个表明佢并冇因为绝望而放弃。佢感到不安，显然系因为佢唔理解上帝点解仲未采取行动，亦都唔明白点解耶和华容许佢处于咁痛苦嘅境地。哈巴谷喺圣灵启示下写低咗佢嘅忧虑，耶和华通过呢啲记载教导我哋一件重要嘅事：我哋可以放心将自己嘅忧虑同疑问话俾耶和华知。佢的确仁慈噉邀请我哋通过祷告向佢敞开心扉。（诗篇50:15；62:8）箴言3:5鼓励我哋要“全心信赖耶和华，唔好依靠自己嘅聪明”。睇嚟哈巴谷知道呢啲经文并且谨记在心。

 6． 点解祷告好重要？

⁶ 哈巴谷主动亲近耶和华，将佢视为值得信赖嘅朋友同父亲。哈巴谷并冇只系为自己嘅情况忧愁，亦都冇依靠自己嘅聪明，而系通过祷告向耶和华讲出自己嘅感受同忧虑，为我哋立下好榜样。另外，耶和华系听祷告嘅主，佢邀请我哋通过祷告将自己嘅忧虑话俾佢知，借此表明我哋信赖佢。（诗篇65:2）我哋噉样做，就可以睇到耶和华点样回应我哋嘅祷告。佢会通过仁慈嘅指引俾我哋温暖嘅拥抱，使我哋得到安慰。（诗篇73:23,24）无论我哋遭受乜嘢患难，佢都会帮助我哋了解佢嘅谂法。所以，向耶和华衷心祷告就系表明我哋信赖佢嘅其中一个最好嘅方法。

 7． 知道哈巴谷嘅忧虑之后，耶和华点样作出回应？

⁷ 请读哈巴谷书1:5-7。哈巴谷将自己担心同忧虑嘅事交托俾耶和华之后，可能好想知道耶和华会点样作出回应。耶和华系仁爱嘅天父，佢好理解哈巴谷嘅感受，佢知道哈巴谷正喺悲痛绝望中向佢寻求帮助。所以，耶和华并冇责备哈巴谷，而系话俾哈巴谷知，佢好快会对不忠嘅犹太人采取乜嘢行动。哈巴谷可能系第一个从耶和华嗰度得知当时嘅暴力时代即将会终结嘅人。

 8． 点解耶和华嘅回答令哈巴谷感到困惑？

⁸ 耶和华向哈巴谷表明，佢已经准备好采取行动。佢会用迦勒底人，即系巴比伦人，嚟惩罚又暴力又邪恶嘅犹大国。耶和华提到呢件事会“喺你哋嘅日子”发生。呢个表明，判决会喺哈巴谷以及同时代嘅以色列人仍然在生嘅嗰段时期执行。耶和华嘅回答根本唔系哈巴谷所期待嘅。巴比伦人比嗰啲起码知道耶和华标准嘅以色列人更加冷血残暴。点解耶和华用呢个残忍嘅异教国家嚟惩罚自己嘅子民呢？噉样只会令犹大国嘅人遭受更多痛苦。a 如果你系哈巴谷，你对上帝嘅回答会有乜嘢感觉？

 9． 哈巴谷可能问过乜嘢其他问题？

⁹ 请读哈巴谷书1:12-14,17。哈巴谷知道耶和华会通过巴比伦嚟审判同惩罚周围嘅恶人，但佢仲系觉得好困惑。不过，佢继续谦卑噉将耶和华视为自己嘅“磐石”。（申命记32:4；以赛亚书26:4）哈巴谷保持耐心，继续信赖耶和华呢位既仁慈又有爱心嘅上帝，所以佢可以放心向耶和华提出更多问题。可能佢仲想知道：点解上帝容许犹大嘅情况变得越来越差；点解佢冇马上行动；点解全能者容许更多令人痛苦嘅事发生；点解恶人当道嘅时候佢“缄默不语”。不过可以确信嘅系，耶和华系“圣者”，佢“眼目纯洁，唔能够容忍恶事”。

10． 点解有时我哋可能会有哈巴谷一样嘅感受？

¹⁰ 有时，我哋可能会有哈巴谷一样嘅感受。我哋听从耶和华，满怀信心噉阅读同学习圣经并借此强化我哋嘅希望，亦都通过佢嘅组织提供嘅指引知道佢嘅应许。不过我哋可能仲系会谂：“我哋嘅痛苦几时先至到尽头呢？”我哋从哈巴谷之后所做嘅事可以学到乜嘢？

11． 听咗耶和华嘅话之后，哈巴谷决心点样做？

¹¹ 请读哈巴谷书2:1。哈巴谷同耶和华交谈之后，内心就平静落嚟。于是，佢决心等待耶和华采取行动。呢个唔系一个即时作出嘅反应，因为佢后来话自己会“静心等候苦难嘅日子”，再次表明咗佢嘅决心。（哈巴谷书3:16）上帝嘅其他忠仆都表现出同样嘅耐心同信心。佢哋嘅榜样鼓励我哋继续等待耶和华采取行动。（弥迦书7:7；雅各书5:7,8）

12． 我哋从哈巴谷身上学到乜嘢？

¹² 我哋从哈巴谷嘅决心学到乜嘢？第一，无论我哋遭遇乜嘢患难，都必须继续向耶和华祷告；第二，我哋要听从耶和华通过佢嘅话语同组织对我哋讲嘅话；第三，我哋应该耐心等候耶和华，深信佢会喺适当嘅时候将我哋从痛苦中解救出嚟。如果继续同耶和华保持亲密嘅沟通，耐心等候佢嘅指示，我哋就会好似哈巴谷噉内心平静，忍受得住。我哋嘅希望会强化我哋嘅耐心，而我哋嘅耐心可以帮助我哋喺一切逆境之下保持喜乐。所以，我哋所怀嘅希望帮助我哋坚信天父耶和华会采取行动。（罗马书12:12）

13． 哈巴谷书2:3作出乜嘢仁慈嘅保证？

¹³ 请读哈巴谷书2:3。哈巴谷决心等候肯定使耶和华好高兴。全能嘅上帝完全了解哈巴谷嘅艰难处境，所以佢仁爱、温和噉向哈巴谷保证，佢会对哈巴谷提出嘅问题作出回应，使哈巴谷得到安慰。哈巴谷嘅所有忧虑好快就会得到舒解。上帝作出保证，就好似系同哈巴谷讲：“就算睇嚟我好迟先回应你，亦都请你保持耐心，继续信赖我，我一定会回应你嘅祷告。”耶和华提醒哈巴谷，佢已经为实现自己嘅承诺定好时间，所以佢鼓励哈巴谷继续等待。最终，先知并冇失望。

14． 我哋遇到困难嗰时应该决心点样做？

¹⁴ 我哋耐心等候耶和华，细心留意佢对我哋所讲嘅，就可以满怀信心，喺任何艰难嘅情况下都能够保持内心平静。耶稣鼓励我哋唔好将注意力集中喺上帝仲未透露嘅“时候时期”，而系要信赖伟大、守时嘅上帝耶和华。（使徒行传1:7）所以，愿我哋永不放弃，怀住信心，谦卑噉继续等候，善用时间尽己所能事奉耶和华。（马可福音13:35-37；加拉太书6:9）

15,16． （甲）我哋喺哈巴谷书可以睇到乜嘢有力嘅应许？（乙）我哋从呢啲应许学到乜嘢？

¹⁵ 耶和华对信赖佢嘅忠仆讲：“义人就凭忠信活落去。认识耶和华荣耀嘅知识必遍满大地”。（哈巴谷书2:4,14）冇错，嗰啲保持耐心、信赖上帝嘅人最终会得到生命作为奖赏。

¹⁶ 可能有啲人觉得，哈巴谷书2:4所记载嘅应许只系一个普通嘅陈述。不过，使徒保罗睇出耶和华嘅呢个保证好重要，所以佢三次引用呢节经文！（罗马书1:17；加拉太书3:11；希伯来书10:38）一个义人无论遇到乜嘢困难，只要对耶和华保持忠贞同信心，就可以睇见佢嘅应许实现。耶和华希望我哋唔好过度关心目前嘅难题，而系专注于未来嘅希望。

17． 哈巴谷书向我哋提出乜嘢保证？

¹⁷ 所有生活喺最后日子嘅人都可以从哈巴谷书学到重要嘅道理。耶和华承诺，所有信赖佢嘅义人都可以得到永生。所以，愿我哋面对任何痛苦同忧虑嘅时候，都继续强化自己嘅信心，信赖上帝。耶和华通过哈巴谷向我哋保证，佢会支持同拯救我哋。佢仁慈噉提醒我哋要信赖佢，而且要耐心等候佢所指定嘅时间。到时，喺上帝嘅王国统治下，崇拜上帝嘅人会遍满地球，得享和平、快乐嘅生活。（马太福音5:5；希伯来书10:36-39）

18． 耶和华所讲嘅话对哈巴谷产生咗乜嘢影响？

¹⁸ 请读哈巴谷书3:16-19。耶和华所讲嘅话对哈巴谷产生咗深远嘅影响。哈巴谷沉思耶和华过去为佢子民所做嘅令人敬畏嘅事，进一步强化咗自己对耶和华嘅信心。虽然苦况可能仲会持续一段时间，但哈巴谷因为知道耶和华好快就会采取行动而得到安慰。哈巴谷嘅内心唔再有疑问，佢深信耶和华一定会施行拯救。佢喺18节讲出咗一句令人难忘嘅话。有啲学者认为呢节经文嘅字面意思系：“我会因主而欢喜跳跃；我会因上帝而开心跳舞。”冇错，哈巴谷嘅经历的确带俾我哋所有人好大嘅安慰！耶和华唔单止对我哋作出美好嘅承诺，仲帮助我哋确信佢正迅速实现自己嘅旨意。

19． 我哋点样做，就可以同哈巴谷一样得到上帝嘅安慰？

¹⁹ 我哋从哈巴谷书学到重要嘅一点系，要信赖耶和华。（哈巴谷书2:4）想继续信赖耶和华，我哋就要强化自己同耶和华嘅关系。所以，我哋必须努力做到以下三点：（1）坚持不懈噉祷告，将自己所有嘅忧虑都交俾耶和华；（2）认真听从耶和华话语嘅吩咐同埋耶和华通过佢组织提供嘅指引；（3）忠心并耐心噉等候耶和华。哈巴谷就系噉样做嘅。虽然哈巴谷起初内心充满痛苦，但系佢同耶和华交谈之后大受鼓励，非常喜乐！喺呢个黑暗嘅世界当中，我哋仲可以喺边度得到咁大嘅安慰呢？愿我哋效法哈巴谷嘅榜样，同佢一样从天父耶和华温暖嘅拥抱得到安慰！