基督徒嘅生活

周中聚会资料嘅新特色

从2018年1月开始，周中聚会嘅资料将会涵盖《圣经新世界译本》精读本（nwtsty）嘅注释同埋多媒体资料。虽然目前网站上面仲未有汉语嘅《圣经新世界译本》精读本，但系你仍然可以从中得益。毫无疑问，呢啲资料会使你喺准备聚会内容嗰阵，有更丰富嘅收获。更重要嘅系，呢啲资料可以帮你亲近我哋仁爱嘅天父耶和华！

注释

《新世》精读本注释嘅内容涉及文化、地理同语言方面嘅知识，帮助我哋对经文有更深入嘅了解。

马太福音12:20

就快熄灭嘅麻芯：古时家用嘅油灯系个有绳圈把手、外表好似一个樽仔嘅细小陶器。灯通常注满橄榄油。麻芯可以将灯油吸上嚟，点燃灯火。“余烟将尽嘅麻芯”嘅希腊语可能指麻芯已经冒出余烟，即使仲有余烬，但系火花好快会熄灭。以赛亚书42:3预告耶稣向人表现怜悯。佢从来都唔会熄灭谦卑同受欺压嘅人所怀有嘅希望之火。

马太福音26:13

实在：希腊语a·menʹ系从希伯来语ʼa·menʹ音译过嚟嘅，意思系“诚心希望系噉”或者“确实系噉”。耶稣喺地上传道教人嗰阵，经常运用“实在”呢个词，目的系要强调佢所讲嘅事、承诺同预言，全部都系真实嘅，绝对可靠。译做“实在”嘅希腊语就系a·menʹ“阿们”呢个词，据讲喺圣典当中，只有耶稣用“阿们”表示“实在”。喺整卷约翰福音当中，“阿们”（a·menʹ a·menʹ）每次都系连续噉反复强调嘅。耶稣嘅表达被翻译做“实实在在”。（约1:51）

多媒体资料

相片、插图、动画同无声短片，可以帮助我哋从多方面细致噉了解圣经嘅记载。

伯法其，橄榄山，耶路撒冷

呢段短片会带大家睇吓一条路线，从靠近耶路撒冷东面嘅杜尔，去到橄榄山其中一个地势较高嘅地方。杜尔系一个现代嘅村镇，相信系圣经时代嘅伯法其。伯大尼位于橄榄山东面嘅山坡，喺伯法其嘅东面。耶稣同佢嘅门徒曾经按惯例，喺伯大尼过夜，今日喺呢个地方有一个小村庄，阿拉伯语嘅村名叫做阿宰里耶（艾宰里耶），意思系“拉撒路嘅地方”。毫无疑问，耶稣曾经喺马大、马利亚同拉撒路嘅屋企留宿。（太21:17；可11:11；路21:37；约11:1）耶稣好可能沿住影片显示嘅路线，从佢哋嘅屋企走到耶路撒冷。公元33年尼散月九日，耶稣骑住驴越过橄榄山，进入耶路撒冷，睇嚟系从伯法其出发，沿住呢条路到达耶路撒冷。

从伯大尼到伯法其嘅路
伯法其
橄榄山
汲沦溪谷
圣殿山

人嘅脚后跟骨头被钉穿

我哋可以从呢张相睇到一副人类骸骨嘅复制品，有一支长11.5厘米（4.5英寸）嘅铁钉插喺骸骨嘅脚后跟。1968年，呢副骸骨嘅原形喺耶路撒冷北面被人发掘出嚟，推断系属于罗马时期嘅。呢个考古学证据表明，当一个人挂喺木柱上被处决嗰阵，为咗加快佢嘅死亡，行刑嘅人会使用呢啲钉。呢根钉可能同罗马士兵用嚟加快耶稣基督死亡嘅钉类似。呢副骸骨系放喺一个称为骨灰瓮嘅石器入面，当尸体嘅肉腐烂之后，死者枯干嘅骨头就会放入去。噉表明，喺苦刑柱上被处死嘅人，都有可能被埋葬。（太27:35）