点样除去同弃绝旧品格

1,2．好多人对耶和华见证人有乜嘢印象？

好多人留意到耶和华嘅子民有出众嘅品格。例如，关于我哋喺纳粹德国统治之下嘅弟兄姊妹，作家安东·吉尔写道：“耶和华见证人特别受到纳粹党敌视。……到1939年为止，有成6000个见证人被韫喺集中营。”作者补充话，呢啲见证人虽然忍受猛烈嘅迫害，但系佢哋“为人可靠，喺压力下依然内心平静”，继续保持“忠义同紧密团结嘅精神”。

² 近年来，喺南非有好多人留意到上帝嘅子民表现出同样嘅美好品格。有一段时间，南非唔同肤色嘅见证人之间唔能够自由来往。虽然系噉，2011年12月18日星期日，喺南非约翰内斯堡有一个令人惊讶嘅场面。7万8000个唔同种族嘅见证人坐满咗当地最大嘅体育馆，佢哋嚟自南非同邻近国家，一齐享受属灵节目。体育馆嘅一个经理评论出席大会嘅人，话：“你哋系我喺呢个体育馆见过，品行最好嘅一班人。你哋个个都衣着得体，而且将体育馆打扫得干干净净。最特别嘅就系，你哋的确系一个嚟自唔同种族嘅国际性团体。”

 3．乜嘢令我哋嘅弟兄团体与众不同？

³ 通过其他人嘅评论可以睇出，我哋嘅国际“弟兄团体”确实与众不同。（彼得前书5:9）点解我哋同其他组织咁唔一样呢？喺上帝话语同圣灵嘅帮助下，我哋努力“除去旧品格”，“穿上新品格”。（歌罗西书3:9,10）

 4．呢篇课文会讨论乜嘢？点解？

⁴ 除去旧品格系一回事，但系完全弃绝又系另一回事。喺呢篇课文，我哋会讨论吓点样先可以除去旧品格，点解噉样做好迫切，点解即使系根深蒂固嘅恶习都能够改变得到。我哋都会分析吓，一啲喺真理里面好多年嘅人点样弃绝旧品格。点解我哋需要呢啲提醒？原因系，有啲曾经事奉耶和华嘅人冇保持警惕，结果又过翻以往嘅生活。所以，我哋所有人都要将呢个警告紧记于心，“自以为企得稳嘅就要小心，以免跌倒”。（哥林多前书10:12）

 5．（甲）请举例说明，点解要尽快除去旧品格？（请睇吓课文开头嘅图片）（乙）根据歌罗西书3:5-9，乜嘢行为属于旧品格？

⁵ 如果你件衫整污糟咗，仲有啲臭，你会点做呢？你会即刻将件邋遢衫除落嚟。同样，我哋要尽快采取行动，服从诫命，除去上帝憎恨嘅行为。我哋应该留意保罗向公元1世纪嘅基督徒清楚提出嘅一个劝勉。佢话：“你哋必须要将［属肉体嘅行为］通通除去。”等我哋嚟讨论吓保罗提到违反上帝标准嘅两种行为——淫乱同不洁。（请读歌罗西书3:5-9）

6,7．（甲）保罗嘅话点样表明我哋要竭尽全力先可以除去旧品格？（乙）樱子过往嘅生活系点样嘅？佢点样得到力量离弃呢种生活？

⁶ 淫乱。喺圣经原文里面，译作“淫乱”嘅词，其中一个意思系指婚姻以外或者同性之间嘅不道德性行为。保罗同基督徒同工讲，要“治死”佢哋嘅“肢体”，即系要除去所有“淫乱”嘅欲望。保罗嘅措辞清楚表明，要竭尽全力先可以铲除呢啲错误嘅欲望。不过，喺克服错误欲望嘅呢场斗争中，我哋系可以得胜嘅。

⁷ 我哋嚟睇吓日本嘅樱子a嘅经历。喺成长嘅过程中，佢一直都觉得孤独同空虚。为咗摆脱呢啲感觉，从15岁开始，佢就同唔同嘅人发生性关系。佢内疚噉承认：“结果，我堕咗三次胎。”佢解释自己嘅感觉话：“一开始嗰阵，同人发生性行为俾到我安全嘅感觉，令我觉得有人需要我，爱我。但同越多人发生性关系，我就越冇安全感。”直到23岁，樱子都一直过住噉样嘅生活，后来佢开始同耶和华见证人学习圣经。樱子好钟意自己学到嘅知识，喺耶和华嘅帮助下，佢除去不道德嘅性行为，唔再深受罪疚感困扰。樱子而家系一个正规先驱，佢唔再感到孤独，佢话：“我真系好开心日日都感受耶和华温暖嘅爱。”

 8．乜嘢事会令我哋俾上帝视为不洁？

⁸ 不洁。喺圣经原文里面，翻译成“不洁”嘅词含义广泛，除咗性不道德之外，仲可以指食烟、讲下流笑话等有害行为。（哥林多后书7:1；以弗所书5:3,4）呢个词亦可以指私下嘅不洁行为，例如阅读挑起性欲嘅书刊或者睇色情资讯。呢啲行为都可能导致手淫呢种不洁嘅恶习。（歌罗西书3:5）b

 9．养成“唔受控制嘅性欲”可以导致乜嘢结果？

⁹ 嗰啲惯常睇色情资讯嘅人会养成“唔受控制嘅性欲”，令自己沉迷其中，不能自拔。研究表明，对色情资讯上瘾嘅人，同嗰啲对酒精、毒品上瘾嘅人所表现出嚟嘅症状系一样嘅。习惯睇色情资讯会带嚟有害嘅后果，例如觉得好内疚，工作效率低，家庭生活唔幸福，离婚，自杀。一个男子以前有睇色情资讯嘅习惯，佢戒除呢个恶习一年之后写道：“我终于有翻以前失去咗嘅尊严。”

10．里贝罗点样摆脱色情资讯嘅束缚？

¹⁰ 对好多人嚟讲，摆脱色情资讯系一场持续不断嘅战斗。巴西嘅里贝罗嘅经历可以讲明，呢场战斗系可以得胜嘅。里贝罗十几岁嗰时就离开咗屋企，之后喺一个废纸回收站揾到份工。喺工作嘅地方，佢开始接触到色情资讯。佢话：“慢慢，我就上咗瘾。情况越来越差，有时我甚至恨不得同居嘅女朋友快啲离开间屋，噉我就可以自己一个人睇色情片。”有一日工作嗰时，里贝罗喺一堆要回收嘅书当中留意到有本叫做《家庭幸福的秘诀》，就攞起嚟读。呢本书打动咗佢嘅心，于是佢决定同耶和华见证人学习圣经。不过，要除去自己嘅恶习，就需要一段好长嘅时间。最终乜嘢帮到佢呢？佢解释话：“通过祷告、学习圣经，同埋沉思自己所学到嘅，我越来越欣赏耶和华嘅特质，噉样做使我对耶和华嘅爱不断加深。最终，呢种爱胜过我对色情资讯嘅欲望。”喺上帝嘅话语同圣灵帮助下，里贝罗除去旧品格，受咗浸，而家系会众嘅长老。

11．弃绝色情资讯嘅最好方法系乜嘢？

¹¹ 值得留意嘅系，为咗喺呢场战斗得胜，里贝罗唔只系学习圣经嘅知识，佢仲花时间使上帝嘅话语打动自己嘅内心。通过祷告同沉思，佢对耶和华嘅爱战胜咗对色情资讯嘅欲望。弃绝色情资讯最好嘅方法就系，培养对耶和华深挚嘅爱，亦都要憎恨恶事。（请读诗篇97:10）

12．乜嘢帮助史提芬除去怒气同伤人嘅言语？

¹² 脾气暴躁嘅人经常通过闹人嚟发泄佢哋嘅怒气。好明显，噉样做只会破坏家庭幸福。嚟自澳大利亚嘅史提芬系一个爸爸，佢话：“以前我一日到黑都讲粗口，为咗啲鸡毛蒜皮嘅事就发晒脾气。我同太太分咗三次居，仲差啲连婚都离埋。”后来，耶和华见证人开始同佢哋两夫妻学习圣经。史提芬听从圣经劝告之后有乜嘢改变呢？佢话：“我哋一家人嘅关系有咗好大改善。之前，我系一个火爆嘅炸弹，随时可能会因为一啲小小嘅问题就爆炸。喺耶和华嘅帮助下，而家，我内心充满和平同安宁。”而家，史提芬系助理仆人，佢太太已经做咗几年正规先驱。会众嘅长老提到史提芬话：“史提芬系一个安静、工作勤奋嘅弟兄，佢亦都有谦卑嘅态度。”喺佢哋印象中，从来都冇见过佢发火。史提芬系咪全靠自己嘅努力就做得到呢？佢话：“如果我冇接受耶和华嘅帮助彻底更新自己内在嘅为人，生活上就唔会得到任何美好嘅祝福。”

13．点解愤怒咁危险？圣经提出乜嘢劝告？

¹³ 点解圣经劝告人要除去怒气、尖叫同诋毁伤人嘅言语呢？（以弗所书4:31）因为呢啲行为往往会进一步演变成暴力。呢个世界嘅人可能将发泄怒气睇成系家常便饭，但呢种谂法一啲都唔尊重我哋嘅创造主。好多人要除去呢啲有害嘅行为，先可以穿上新品格。（请读诗篇37:8-11）

14．凶狠好斗嘅人有冇可能变得温和？

¹⁴ 汉斯系奥地利一个会众嘅长老，我哋嚟睇吓佢嘅例子。长老团协调人评价汉斯话：“佢系我哋见过嘅其中一个最温和嘅弟兄。”但汉斯其实唔系一直都咁温和嘅。喺十几岁嗰时，佢开始滥用酒精，结果变得凶狠好斗。有一次佢饮醉咗，一怒之下杀死咗佢嘅女朋友，因为噉被判监二十年。一开始，监狱里面嘅生活冇改变汉斯嘅粗暴性格。过咗一段时间，佢嘅妈妈请一位长老去监狱探佢，之后汉斯就开始学习圣经。汉斯话：“对我嚟讲，除去旧品格真系好唔容易。经文的确俾咗我好大嘅鼓励，例如以赛亚书55:7话，‘恶人应当离开歧途’，哥林多前书6:11提到嗰啲已经离弃错误行径嘅人话，‘你哋有啲人以前都做过噉样嘅事’。多年以来，耶和华都耐心噉通过佢嘅圣灵帮助我穿上新品格。”服刑17年半之后，汉斯获得释放。当时佢已经系一个受咗浸嘅基督徒。汉斯话：“我真系非常感激耶和华用佢无与伦比嘅慈悲宽恕咗我。”

15．一般人对边啲行为见怪不怪？但系圣经点讲？

¹⁵ 除咗伤人嘅言语，旧品格亦包括讲大话。例如，喺报税表上做假，或者为咗逃避责任而讲大话，好多人对呢啲行为已经见怪不怪。相反，耶和华系“信守真理嘅上帝”。（诗篇31:5）佢要求佢嘅子民“各人［都］要对人讲实话”，“唔好互相讲大话”。（以弗所书4:25；歌罗西书3:9）所以，就算喺尴尬或者唔方便嘅情况下，我哋都一定要讲真话。（箴言6:16-19）

16．点样先能够成功除去旧品格？

¹⁶ 除去旧品格唔可以单靠自己嘅力量。呢篇课文提到嘅樱子、里贝罗、史提芬同汉斯都要竭尽全力先可以除去佢哋嘅恶习。佢哋凭住上帝话语同圣灵嘅力量而获得胜利。（路加福音11:13；希伯来书4:12）如果想得到噉样嘅力量，我哋就要每日阅读同沉思圣经，经常通过祷告求耶和华俾我哋智慧同力量去实践圣经嘅原则。（约书亚记1:8；诗篇119:97；帖撒罗尼迦前书5:17）我哋为聚会做准备同参加聚会嘅时候，就可以从上帝嘅话语同圣灵得益。（希伯来书10:24,25）另外，我哋都好想善用，上帝组织通过唔同方式为世界各地嘅弟兄姊妹提供嘅属灵食物。（路加福音12:42）

17．下一篇课文会讨论乜嘢？

¹⁷ 我哋已经讨论过一啲基督徒必须要除去同弃绝嘅恶习。如果我哋想得到耶和华嘅悦纳，只系弃绝呢啲恶习系唔够嘅，仲一定要穿上新品格。喺下一篇文章，我哋会讨论吓，点样做就可以永远穿上新品格呢件比喻性嘅衣服。