点解要“赞美耶和华”？

1-3．（甲）诗篇147篇可能系几时写嘅呢？（乙）我哋通过研读诗篇147篇可以学到乜嘢？

如果某个人出色噉完成一件工作，或者表现出美好嘅基督徒特质，就会受到称赞。既然我哋有理由称赞人，噉唔系有更多嘅理由去赞美耶和华上帝咩？我哋通过奇妙嘅受造物睇出耶和华有无穷嘅力量，亦都通过佢牺牲爱子作为赎价睇出佢对人类充满温情，所以我哋应该赞美佢。

² 诗篇147篇嘅执笔者唔单止自己深受感动去赞美上帝，佢仲积极鼓励其他人同佢一齐将赞美献俾耶和华。（请读诗篇147:1,7,12）

³ 我哋唔知道诗篇147篇系边个写嘅，但睇嚟佢生活喺耶和华帮助以色列人脱离巴比伦嘅奴役，返翻耶路撒冷嗰段时期。（诗篇147:2）上帝嘅子民可以回归故土恢复正确嘅崇拜，的确打动诗篇执笔者去赞美耶和华。佢仲有更多嘅理由噉样做。有边啲理由呢？喺你生活里面，你会因乜嘢理由而衷心“赞美耶和华”呢？

 4．被掳嘅以色列人得知居鲁士王要释放佢哋嘅时候，点解感到好安慰？

⁴ 想象吓，被掳嘅以色列人喺巴比伦会有啲乜嘢感受。奴役佢哋嘅人嘲笑话：“唱一首锡安嘅歌俾我哋听吓！”正确崇拜嘅中心耶路撒冷系佢哋喜乐嘅最大因由，不过喺嗰时已经沦为一片废墟。（诗篇137:1-3,6）犹太人心灵破碎，好需要安慰，根本冇心情唱歌。后来，就好似耶和华预言所讲，波斯王居鲁士为佢哋带嚟拯救。佢征服咗巴比伦，宣布话：“耶和华……指派我喺犹大嘅耶路撒冷为佢建造圣殿。你哋当中凡系佢子民嘅，都可以上去，愿耶和华佢哋嘅上帝与佢哋同在！”（历代志下36:23）对于嗰啲住喺巴比伦嘅以色列人嚟讲，事态嘅发展的确俾咗佢哋好大嘅安慰！

 5．关于耶和华嘅医治能力，诗篇执笔者留意到乜嘢？

⁵ 耶和华唔单止为整个以色列国族带嚟安慰，仲个别安慰每一个以色列人。今日亦都系一样。关于上帝，诗篇执笔者话：“佢医治心碎嘅人，包扎佢哋嘅伤口。”（诗篇147:3）冇错，耶和华关心嗰啲喺身体上同感情上有创伤嘅人。今日，耶和华好渴望为我哋提供安慰，减轻我哋喺感情上嘅痛楚。（诗篇34:18；以赛亚书57:15）佢赐我哋智慧同力量，使我哋可以应付任何难题。（雅各书1:5）

 6．我哋从诗篇147:4学到乜嘢？（请睇吓课文开头嘅图片）

⁶ 之后，诗篇执笔者抬头望向夜空，话耶和华佢“数算星辰嘅数目，一一点名呼召”。（诗篇147:4）点解佢突然间转话题，去留意天上嘅星星呢？试谂吓：虽然诗篇执笔者能够用肉眼睇到天上嘅星星，但系佢根本冇办法知道确切嘅数目。时至今日，我哋可以观察到嘅星星比以前多咗好多。有人认为，单系我哋嘅银河系就有数以十亿计嘅星星，而宇宙里面存在嘅星系，可能多至数万亿！对我哋人类嚟讲，星星真系多到数都数唔晒！但系，造物主为每一粒星都起咗个名或称号。呢个意味住，对耶和华嚟讲，每一粒星都系独一无二嘅。（哥林多前书15:41）噉地上嘅人呢？既然耶和华上帝确切知道每一粒星喺任何时候嘅位置，同样，无论几时佢都清楚知道你喺边度，明白你嘅感受，同埋了解你嘅个人需要。佢真系对我哋每个人都了如指掌！

7,8．（甲）当耶和华帮助佢嘅子民应付考验嘅时候，佢会考虑啲乜嘢？（乙）喺帮助唔完美嘅人方面，耶和华点样表现体恤之心？请举例。

⁷ 耶和华唔单止了解你，佢亦都体恤你嘅情况，而且有能力帮助你解决生活上嘅难题。（请读诗篇147:5）你可能觉得，自己嘅情况太艰难，负担太重。耶和华上帝清楚知道你嘅限度，“记得［你］不过系尘土”。（诗篇103:14）因为唔完美，我哋一次又一次犯同样嘅错。我哋经常会因为讲错嘢而感到后悔，又时不时有错误嘅欲望或者妒忌其他人。虽然耶和华冇任何弱点，但系佢智慧深不可测，对我哋唔完美嘅人嘅了解无可估量。（以赛亚书40:28）

⁸ 你可能已经体验过耶和华点样用佢大能嘅手帮助你应付某啲考验。（以赛亚书41:10,13）我哋嚟睇吓一个叫做恭子嘅先驱姊妹嘅例子。佢搬咗去新委派嘅地区之后有一段时间变得好灰心。乜嘢表明耶和华了解佢嘅难题？后来，恭子发觉佢身边嘅人都好理解佢嘅感受。佢觉得好似耶和华喺度同佢讲：“我爱你，唔单单因为你系个先驱，仲因为你系我嘅女，你献咗身俾我。我希望你可以开开心心噉做我嘅见证人！”喺你嘅生活上，全能嘅上帝点样表现出“佢嘅悟性无可测度”呢？

9,10．耶和华首先会提供乜嘢嚟帮助我哋？请举例。

⁹ 我哋每个人都有物质上嘅需要。例如，你可能担心自己冇足够嘅食物。但系，耶和华创造咗自然循环嚟供应食物，甚至连幼小嘅乌鸦都得到喂养！（请读诗篇147:8,9）既然耶和华一直提供食物俾乌鸦，你都可以确信耶和华同样会供应你嘅物质所需。（诗篇37:25）

¹⁰ 最重要嘅系，耶和华供应强化信心嘅属灵食物，赐俾我哋“超越人所能理解嘅［平安］”。（腓立比书4:6,7）我哋睇吓陆奥夫同佢太太喺2011年日本海啸期间，点样亲身体会到耶和华用佢嘅大能扶助佢哋。海啸嘅时候，佢哋爬咗上自己屋顶，先可以死里逃生。但系，佢哋喺嗰日几乎失去晒自己所有嘅嘢，连间屋都烂埋。佢哋喺二楼嘅房间，挨过咗一个又黑又冻嘅夜晚。朝早，佢哋好想得到一啲属灵上嘅鼓励。佢哋唯一揾到嘅一本书，就系《2006耶和华见证人年鉴》。陆奥夫即刻留意到“最严重的海啸”呢个标题。资料提到2004年苏门答腊嘅一场地震，引发咗有史以来伤亡最惨重嘅海啸。陆奥夫同佢太太一边睇一边喊。喺佢哋最需要嘅时候，得到适时嘅属灵鼓励，使佢哋感受到耶和华嘅温暖同爱心。耶和华亦都仁慈噉提供俾佢哋物质所需，通过弟兄姊妹使佢哋得到救援物资。但系，最鼓励佢哋嘅系，上帝嘅组织派代表嚟探访会众。陆奥夫话：“我感受到耶和华就喺我哋每一个人嘅身边照顾紧我哋。真系好安慰啊！”耶和华会先提供我哋属灵食物，之后都会满足我哋物质上嘅需要。

11．如果我哋想从耶和华嘅帮助得益，需要点样做？

¹¹ 耶和华随时出手“为谦和嘅人纾困解危”。（诗篇147:6上）佢咁乐意帮助我哋，我哋可以点样从中得益呢？我哋要同佢建立亲密嘅关系。所以，我哋需要培养谦和嘅特质。（西番雅书2:3）谦和嘅人会等候耶和华纠正一切错误，消除佢哋所受嘅伤害。佢哋可以得到耶和华嘅认可，令佢嘅心欢喜。

12,13．（甲）为咗从耶和华嘅帮助得益，我哋应该要避免乜嘢？（乙）耶和华喜悦点样嘅人？

¹² 另一方面，上帝“将邪恶嘅人贬抑于地”（诗篇147:6下）呢番话真系严厉！想从耶和华嘅忠贞之爱得益，避免得罪耶和华，我哋就一定要恨佢所恨。（诗篇97:10）例如，我哋应该憎恨不道德嘅性行为。即系话，要避开任何会导致我哋犯性不道德嘅事物，包括色情资讯。（诗篇119:37；马太福音5:28）可能我哋需要经历一番争斗，但为咗得到耶和华嘅祝福，付出任何努力都系值得嘅。

¹³ 喺呢场斗争，我哋要依靠耶和华上帝而唔系自己。诗篇嘅经文话：“马虽然力大，［耶和华］并唔喜爱；人纵使腿快，佢亦唔喜悦”。（诗篇147:10）古代嘅人相信只要人强马壮就可以打胜仗。如果我哋尝试靠自己嘅能力或者其他人嘅帮助使自己得救，噉样可唔可以取悦耶和华呢？当然唔可以！相反，我哋一定要亲近耶和华，恳求佢嘅帮助。同世人唔一样，就算我哋一次又一次向耶和华求助，佢都唔会觉得厌烦，总系耐心聆听我哋嘅请求。“耶和华喜悦嘅，系敬畏佢嘅人，系等待佢忠贞之爱嘅人。”（诗篇147:11）因为耶和华有忠贞之爱，我哋可以确信，佢会对我哋不离不弃，帮助我哋战胜自己嘅错误欲望。

14．诗篇执笔者确信乜嘢？

¹⁴ 耶和华使我哋确信，喺需要嘅时候，佢一定会出手帮助自己嘅子民。诗篇执笔者谂起耶路撒冷嘅复兴，就歌颂耶和华话：“佢使你嘅门闩坚固，赐福俾你当中嘅居民。佢使你四境平安”。（诗篇147:13,14）知道耶和华会巩固城门嚟保护佢嘅忠心子民，诗篇执笔者真系觉得好安心！

15-17．（甲）面对考验嘅时候，通常我哋会有乜嘢感受？耶和华点样运用佢嘅话语嚟帮助我哋？（乙）举例说明上帝嘅话语点样“迅速颁行”。

¹⁵ 你可能会面对一啲难题而感到忧虑，但系，耶和华会俾你智慧去应付。诗篇执笔者话：“［耶和华］向大地下令，佢嘅话迅速颁行。”然后，又话上帝“降下嘅雪如同羊毛，撒下嘅霜如同灰烬，扔下嘅冰雹如同碎渣”。执笔者跟住问：“佢发出寒冷，边个能受得住呢？”最后又话，耶和华“下令，呢一切就融化”。（诗篇147:15-18）上帝系无所不知、无所不能嘅。既然佢可以控制冰雹同雪，佢亦都可以帮助你越过任何障碍。

¹⁶ 喺今日，耶和华用佢嘅话语圣经嚟指引我哋。“佢嘅话迅速颁行”，意思系，喺我哋有需要嘅时候，耶和华会迅速俾我哋属灵嘅指引。试谂吓，你通过研读圣经，查考“忠信睿智嘅奴隶”制作嘅出版物，收睇JW电视网嘅节目，浏览jw.org网站，向长老寻求帮助以及同弟兄姊妹一齐交往得到几多益处！（马太福音24:45）你有冇从呢啲安排睇出，耶和华喺生活上迅速噉俾你指引呢？

¹⁷ 西蒙娜就体验过上帝话语嘅力量嘞。佢觉得自己冇乜价值，怀疑自己得唔到上帝嘅肯定同认可。但系，每当灰心嘅时候，佢都仲系坚持祷告，向耶和华寻求帮助。同时，佢亦都好勤力做个人研读。佢话：“我从未试过得唔到耶和华嘅强化同指引。”呢种体会帮助佢尽力保持积极。

18．点解我哋可以感受到耶和华恩待我哋？有乜嘢理由我哋要衷心“赞美耶和华”？

¹⁸ 诗篇执笔者知道，上帝几咁恩待佢古代嘅子民。佢哋曾经系唯一一个可以得到上帝嘅“话［语］”、“条例同法令”嘅国族。（请读诗篇147:19,20）今日，世上只有我哋有福分，成为上帝名下嘅人。我哋认识耶和华，而且佢嘅话语喺我哋生活上发挥作用，所以我哋可以同佢享有特殊嘅关系。就好似诗篇147篇嘅执笔者噉，我哋真系有理由要衷心“赞美耶和华”，亦都要鼓励其他人噉样做！