亚利马太人约瑟拥护真理

亚利马太人约瑟连自己都唔知点解有勇气去见罗马总督。因为本丢·彼拉多出咗名好顽固。如果想耶稣有一个体面嘅葬礼，就需要有人去问彼拉多，将耶稣嘅遗体领返嚟。结果，约瑟发觉同彼拉多见面并唔系佢想象中咁难。彼拉多向军官查证，证实耶稣死咗之后，就答应约瑟嘅请求。虽然约瑟心情好沉重，佢仲系赶返去耶稣被处决嘅地方。（马可福音15:42-45）

• 亚利马太人约瑟系边个呢？

• 佢同耶稣有咩关系？

• 我哋通过佢嘅故事学到乜嘢？

受上帝启示嘅马可福音称约瑟为“公议会嘅成员”。公议会系犹太最高法庭同最高行政中心。（马可福音15:1,43）约瑟系犹太人嘅其中一个领袖，所以佢可以同罗马总督见面，而且佢又系个富翁。（马太福音27:57）

公议会大部分人都好憎耶稣，佢哋策划谋害耶稣，想将佢处死。约瑟唔似公议会嘅大部分成员，圣经话佢“为人良善正义”。（路加福音23:50）约瑟为人诚实，过住道德高尚嘅生活，同埋尽力听从上帝嘅吩咐，而且“向来等待上帝嘅王国”，可能因为噉佢都成为耶稣嘅门徒。（马可福音15:43；马太福音27:57）另一个可能系佢热爱真理同正义，所以受到耶稣嘅信息吸引。

约翰福音19:38话约瑟“系耶稣嘅门徒，不过佢怕犹太人，所以系暗中做门徒嘅”。到底约瑟担心乜嘢呢？佢知道犹太人好憎耶稣，决意要将跟随耶稣嘅人逐出犹太会堂。（约翰福音7:45-49；9:22）被逐出犹太会堂意味住会受到同胞鄙视、排斥、抛弃。如果约瑟公开表明佢跟从耶稣，就会失去名誉同地位。所以，约瑟一直犹疑不决。

约瑟唔系唯一一个面对呢种情况嘅人。约翰福音12:42话：“就算连官长亦都有好多人信从佢，只系由于法利赛派，就唔敢公开承认，免得被开除，逐出会堂。”尼哥德慕都系公议会成员，佢面对同样嘅情况。（约翰福音3:1-10；7:50-52）

虽然约瑟系门徒，但系佢唔敢公开承认自己嘅信仰。噉样做后果好严重，因为耶稣公开讲过：“凡喺人面前承认同我联合嘅，我喺我天父面前亦会承认同佢联合；凡喺人面前唔认我嘅，我喺我天父面前亦唔认佢。”（马太福音10:32,33）约瑟冇话否认耶稣，不过佢冇勇气承认自己跟从耶稣。噉你呢？

约瑟唔支持公议会谋害耶稣，呢一点系值得称赞嘅。（路加福音23:51）有啲人觉得，耶稣受审判嗰阵，约瑟可能唔在场。无论约瑟在唔在场都好，佢见到公议会嘅人颠倒是非，一定觉得好难受，因为佢咩都做唔到！

耶稣死嗰时，约瑟好明显已经克服咗恐惧，甚至决定公开承认自己系耶稣嘅门徒。马可福音15:43 表明呢一点，经文话：“佢鼓起勇气入去见彼拉多，请求领取耶稣嘅遗体。”

睇嚟耶稣死嘅时候约瑟都在场，因为佢比彼拉多更早知道耶稣死咗，所以，当佢向彼拉多请求领取遗体嗰阵，彼拉多“听到耶稣已经死咗觉得好惊讶”。（马可福音15:44）如果约瑟亲眼睇住耶稣喺苦刑柱上痛苦噉死去，佢睇到咁惨嘅场面会唔会自我省察，同埋受到推动有勇气拥护真理呢？可以肯定嘅系，约瑟而家鼓起勇气采取行动，唔再暗中做耶稣嘅门徒。

按照犹太人嘅律法，判处死刑嘅人要喺日落之前埋葬。（申命记21:22,23）不过，对罗马人嚟讲，被处决罪犯嘅尸体，一系留喺木柱上腐烂，一系就全部揼晒喺一个乱葬岗度。所以，约瑟唔想耶稣嘅遗体好似嗰啲罪犯嘅尸体噉样处置，约瑟喺靠近行刑嘅地方有一个新墓穴。呢个墓穴系喺岩石里面凿出嚟嘅，而且从来都冇用过，表明约瑟系啱啱从亚利马太a搬到耶路撒冷，佢希望呢个墓地可以作为家族嘅墓地。（路加福音23:53；约翰福音19:41）约瑟将耶稣埋葬喺自己将来嘅墓穴，佢噉样做非常慷慨，同时亦都应验咗圣经嘅预言，弥赛亚“死去嘅时候就同富翁喺一齐”。（以赛亚书53:5,8,9）

四福音书都记载咗耶稣嘅遗体俾人从柱上面搬落嚟之后，约瑟就用上等细麻布将耶稣嘅遗体包好，放喺自己嘅墓穴里面。（马太福音27:59-61；马可福音15:46,47；路加福音23:53,55；约翰福音19:38-40）圣经特别提到尼哥德慕带咗安葬嘅香料嚟帮助约瑟。按照佢哋嘅身份，应该唔使自己搬耶稣嘅遗体，好可能佢哋系叫仆人去搬运同埋葬遗体。无论点都好，佢哋两个所做嘅唔系微不足道嘅。按照摩西律法，任何人接触过尸体都会不洁七日，而且佢哋接触嘅任何嘢都会不洁。（民数记19:11；哈该书2:13）任何接触过尸体嘅人，喺逾越节期间，就唔可以同其他人接触，仲会错过所有纪念同庆祝活动。（民数记9:6）约瑟为咗耶稣可以有一个体面嘅葬礼，就算会俾公议会嘅其他成员嘲笑，佢都好愿意噉样做，亦都公开承认自己系耶稣嘅门徒。

除咗四福音书记载约瑟埋葬耶稣之外，圣经冇再提过亚利马太人约瑟嘞。我哋可能会谂：“佢后来点呢？”我哋唔知道。不过按照故事嘅发展，佢好可能已经公开承认自己系基督徒。我哋点知道呢？佢喺面对考验同紧急关头之下，不断表现出信心同勇气，由此可见，佢已经有所改变。

呢个故事引起一个值得我哋思考嘅问题：无论系地位、事业、物质财富、亲情，定系个人自由，有乜嘢会比我哋同耶和华嘅关系更重要呢？