继续用爱心强化人

 1． 同门徒喺一齐嘅最后一个晚上，耶稣同门徒讲咗乜嘢重要嘅话题？

同门徒喺一齐嘅最后一个晚上，耶稣差唔多30次提到爱呢种特质。佢特别指出，佢嘅门徒应该“彼此相爱”。（约翰福音15:12,17）佢哋互相表现嘅爱心成为一个显著嘅标志，使人好容易就辨认出，佢哋系真正嘅基督徒。（约翰福音13:34,35）耶稣曾经讲过：“人为朋友舍弃生命，人嘅爱心冇比呢个更大㗎嘞。你哋如果照我嘅吩咐去做，就系我嘅朋友嘞。”（约翰福音15:13,14）佢所讲嘅爱，唔系只系感情上嘅，而系一种有力量，愿意自我牺牲嘅可贵特质。

 2． （甲）上帝嘅子民有乜嘢显著嘅特质？（乙）呢篇课文会讨论边啲问题？

² 今日，好多人都睇出，耶和华嘅子民团结和睦，有真诚同无私嘅爱。（约翰一书3:10,11）无论弟兄姊妹嚟自边个国家，属于边个民族，讲边种语言，或者有乜嘢背景，整个弟兄团体都洋溢住基督徒嘅爱心。呢篇课文会讨论以下三个问题：点解今日呢个世界咁需要爱心？耶和华同耶稣点样用爱心强化我哋？我哋每个人可以点样通过基督徒嘅爱心嚟强化其他人？（哥林多前书8:1）

 3． “难以应付嘅非常时期”对人有乜嘢影响？

³ 因为我哋身处“难以应付嘅非常时期”，生活总系有好多“烦恼痛苦”。（诗篇90:10；提摩太后书3:1-5）好多人因为噉，就想放弃自己嘅生命。每年全球有八十万人自杀身亡，平均每四十秒就有一个。令人遗憾嘅系，都有啲基督徒因为觉得生活好痛苦而选择结束自己嘅生命。

 4． 边啲圣经人物曾经想一死了之？

⁴ 喺圣经时代，有啲上帝嘅忠仆都曾经谂过一死了之。例如，约伯饱受痛苦煎熬嗰时话：“我厌弃生命，唔想长寿。”（约伯记7:16；14:13）约拿因为对事情嘅结果感到失望，就话：“耶和华啊，而家就求你攞咗我嘅性命，因为我觉得生不如死。”（约拿书4:3）忠心嘅先知以利亚曾经一度感到绝望无助，话：“耶和华啊，我所受嘅已经够嘞！求你而家就取我性命”。（列王纪上19:4）其实，耶和华好珍视献身俾佢嘅忠仆，希望佢哋可以继续生活落去。佢冇因为呢啲忠仆有噉嘅感觉就责备佢哋，而系帮助佢哋克服轻生嘅念头，用爱心强化佢哋，使佢哋可以继续忠贞噉事奉佢。

 5． 点解喺而家呢个日子，弟兄姊妹特别需要受到关爱？

⁵ 就算我哋嘅弟兄姊妹冇轻生嘅谂法，佢哋大多数人仲系要面对好大嘅压力，好需要其他人嘅关爱，从而得到强化。有啲弟兄姊妹遭受迫害同嘲笑，有啲喺工作上俾人批评或者俾同事背后中伤，有啲因为工作压力太大或者经常要加班而感到精疲力尽，有啲就面对严重嘅家庭难题，例如成日俾不信嘅配偶挑剔。会众入面有好多人因为以上或者其他难题而感到身心疲倦。边个可以帮助呢啲人坚持落去？

 6． 耶和华点样用爱嚟强化佢嘅忠仆？

⁶ 耶和华向佢嘅忠仆保证，无论而家定系将来，佢对佢哋嘅爱都唔会改变。耶和华对忠于佢嘅以色列人讲：“你喺我眼中系宝贵嘅，系我所看重嘅，我爱你。 ……你唔使怕，因为我与你同在。”（以赛亚书43:4,5）呢啲以色列人听到耶和华嘅呢番话，一定大受鼓励。身为上帝嘅子民，你可以确信，耶和华一定好关心爱护你。a 圣经对嗰啲拥护正确崇拜嘅人承诺话：“佢系大能嘅主，必施行拯救。佢必因你而欢欣快乐”。（西番雅书3:16,17）

 7． 耶和华点样好似妈妈噉关爱我哋？（请睇吓课文开头嘅图片）

⁷ 耶和华保证，无论佢嘅子民遭遇乜嘢患难，佢都会支持同安慰佢哋。经文话：“你哋会好似婴儿一样食奶，又被抱喺怀中呵护，放喺膝上逗玩。母亲点样安慰成年嘅儿子，我亦都要照样安慰我嘅子民。”（以赛亚书66:12,13）试谂吓，妈妈满怀爱心噉抱住仔仔，同佢一齐玩嗰时，仔仔几咁开心，几咁有安全感！通过呢个温馨嘅情景，我哋可以明白，耶和华几咁关爱佢嘅子民。耶和华的确非常珍视你。（耶利米书31:3）

8,9． 耶稣嘅爱点样强化我哋？

⁸ 约翰福音3:16话：“上帝深爱世人，甚至赐下自己嘅独生子，使信从佢嘅人都不致灭亡，反得永生。”因为呢个原因，真基督徒受到耶和华嘅爱所吸引。耶稣为我哋牺牲生命，亦都表明佢好爱我哋。呢份爱使我哋大受强化！圣经保证话，任何患难痛苦都唔能够“隔断基督对我哋嘅爱”。（罗马书8:35,38,39）

⁹ 生活当中发生嘅好多问题，会令我哋感到身心疲累，或者喺事奉耶和华方面失去喜乐。不过请谨记，耶稣基督嘅爱可以强化我哋，使我哋有力量继续保持忍耐。（请读哥林多后书5:14,15）佢嘅爱亦都使我哋渴望继续用自己嘅生命嚟事奉耶和华，即使面对灾难、压迫，或者感到失望、忧虑，都唔会轻易放弃。

10,11． 强化弟兄姊妹系边个嘅责任？请解释。

¹⁰ 耶和华会通过基督徒会众用爱心强化我哋。如果我哋怀住爱心，喺属灵同感情方面强化我哋嘅弟兄姊妹，就系对耶和华以爱还爱嘞。（约翰一书4:19-21）使徒保罗劝勉基督徒话：“你哋要不断彼此鼓励，互相强化，就好似你哋而家所做嘅噉。”（帖撒罗尼迦前书5:11）冇错，唔单止长老，其实会众嘅每一个人都可以效法耶和华同耶稣，鼓励强化弟兄姊妹。（请读罗马书15:1,2）

¹¹ 会众有啲成员有严重嘅情绪问题，可能佢哋需要一啲专业嘅帮助同埋接受治疗。（路加福音5:31）长老同会众其他成员都应该表现谦逊嘅态度，因为大多数人都冇接受过精神或心理方面嘅专业培训。不过，佢哋都有一项极其重要嘅工作，就系要“安慰忧郁嘅人，支持软弱嘅人，耐心对待所有人”。（帖撒罗尼迦前书5:14）我哋好想尽力理解弟兄姊妹嘅感受。我哋要体恤佢哋，对佢哋有耐心，喺佢哋灰心沮丧嘅时候用言语安慰佢哋。你有冇尽力安慰同鼓励其他人？你点样做就可以更有效噉使其他人受到强化？

12． 会众成员嘅爱心可以点样强化人？请举例。

¹² 我哋可以点样用爱嚟强化嗰啲喺感情上饱受折磨嘅人？欧洲一个姊妹话：“有时我会想自杀。不过会众俾咗我好大嘅支持，系佢哋救咗我。弟兄姊妹经常鼓励我，关心我。虽然知道我有抑郁症嘅人唔多，不过成个会众都一直喺度帮助我。一对夫妇就好似我嘅属灵父母噉。佢哋悉心照顾我，24小时都愿意帮助我。”当然，我哋唔系每个人都可以做到噉嘅程度。不过，我哋嘅支持，可以对嗰啲喺感情上饱受折磨嘅人产生好大嘅影响。b

13． 如果我哋想安慰同强化其他人，可以点做？

¹³ 用心聆听。（雅各书1:19）怀住体恤之情用心聆听弟兄姊妹讲话系爱心嘅表现。我哋可以设身处地噉谂吓对方嘅感觉，用温和嘅语气向佢提出问题，深入了解佢嘅感受。噉样，你就系表现体恤，强化对方。要流露出真挚嘅感情，等对方睇出你真系关心佢。如果佢想讲更多，要保持耐心，千祈唔好打断佢讲话。只要你耐心聆听，就可以更明白对方嘅感受，而对方亦都会更加信任你。噉样，你想安慰同强化佢嘅时候，佢就会更愿意听你讲。佢感受到你真诚嘅关爱，就可以得到好大嘅安慰。

14． 点解我哋想避免挑剔嘅精神？

¹⁴ 避免挑剔嘅精神。如果一个情绪低落嘅人觉得你喺度批评紧佢，噉佢内心只会更加痛苦。结果，就算你想帮助佢，都会变得好困难。圣经话：“讲话不慎嘅如刀刺人，明智人嘅舌就如良药。”（箴言12:18）当然，我哋唔会专登讲啲尖酸刻薄嘅话去伤害人。不过，我哋有时无意中讲出鲁莽嘅话，都会好伤人心。我哋要怀住爱心去鼓励同强化对方，尽量企喺对方嘅立场嚟理解佢嘅感受。（马太福音7:12）

15． 我哋可以用乜嘢实用嘅工具嚟强化其他人？

¹⁵ 用上帝嘅话语安慰人。（请读罗马书15:4,5）圣经嚟自“赐人忍耐同安慰嘅上帝”，可以使人得到好大嘅安慰。除咗安慰人心嘅经文之外，仲有好多嘅工具有助于我哋搜寻圣经资料。《守望台出版物索引》同《耶和华见证人出版物检索手册》呢两个工具，可以帮助我哋揾出合适嘅经文同文章，安慰同鼓励我哋嘅弟兄姊妹。

16． 鼓励悲伤嘅弟兄姊妹嗰时，我哋应该有点样嘅态度？

¹⁶ 温柔和蔼。我哋应该怀住无私嘅爱，用温柔和蔼嘅态度嚟鼓励强化人。耶和华系“慈悲嘅父亲，亦系赐一切安慰嘅上帝”，对佢嘅子民“有亲切怜恤嘅心”。（请读哥林多后书1:3-6；路加福音1:78；罗马书15:13）保罗喺呢方面立下好好嘅榜样，佢话：“我哋喺你哋当中温柔和蔼，好似母亲乳养爱护自己嘅仔女一样。我哋既然对你哋深怀温情，就唔单止乐意将上帝嘅好消息传俾你哋，连自己嘅性命都乐意俾你哋，因为你哋系我哋所疼爱嘅。”（帖撒罗尼迦前书2:7,8）我哋有温柔和蔼嘅态度，就可以为嗰啲悲伤嘅弟兄姊妹带嚟安慰。好可能耶和华就系用呢种方式嚟回应佢哋嘅祷告。

17． 我哋想用爱心强化弟兄姊妹，对佢哋就应该有乜嘢平衡嘅睇法？

¹⁷ 唔好期望弟兄姊妹凡事完美。对弟兄姊妹要有平衡嘅睇法。期望弟兄姊妹凡事做得十全十美系唔现实嘅，只会令自己失望。（传道书7:21,22）耶和华对佢子民嘅要求系合情合理嘅。如果我哋效法佢嘅榜样，就会包容其他人唔完美嘅地方。（以弗所书4:2,32）如果我哋令弟兄姊妹觉得佢哋做得唔够好，或者将佢哋同其他人比较，就会令佢哋感到灰心。相反，我哋应该鼓励佢哋，衷心称赞佢哋付出努力。噉样就系用爱心强化佢哋，使佢哋更加有理由继续喜乐噉事奉耶和华。（加拉太书6:4）

18． 点解我哋要用爱心强化人？

¹⁸ 喺耶和华同耶稣眼中，每一个忠仆都系极其宝贵嘅。（加拉太书2:20）我哋好爱我哋嘅弟兄姊妹，好想用温和仁爱嘅方式对待佢哋。为咗使佢哋得享安舒，“我哋应该追求促进和睦嘅事，追求彼此强化嘅事”。（罗马书14:19）我哋所有人都对即将到来嘅新世界充满期待，到时唔会再有人感到灰心沮丧！喺乐园入面，唔会有战争同迫害，唔会再有人患病或者因为遗传嘅罪而死亡，所有人都唔需要面对家庭嘅难题，亦都唔会再有人悲观失望。千年统治结束之后，人类已经身心完美。嗰啲渡过最后考验嘅人就会被耶和华接纳为地上嘅儿女，“得享上帝儿女荣耀嘅自由”。（罗马书8:21）愿我哋所有人继续用爱心强化人，互相帮助，一同进入上帝美妙嘅新世界。