点样穿上同保持新品格

1,2．（甲）点解我哋能够培养新品格？（乙）歌罗西书3:10-14记录咗边啲特质？

“新品格”呢个词喺《圣经新世界译本》出现过两次。（以弗所书4:24；歌罗西书3:10）呢个品格系“按照上帝嘅旨意创造嘅”。培养呢个新品格系我哋做得到嘅。点解呢？因为耶和华按照佢嘅形象创造人类，使人可以反映佢嘅美好特质。（创世记1:26,27；以弗所书5:1）

² 我哋嘅始祖将唔完美嘅身心遗传俾我哋，所以我哋会受到错误欲望影响。我哋亦都可能会深受周围环境所影响。喺耶和华仁慈嘅帮助之下，我哋可以成为合佢心意嘅人。为咗达到呢个目标，我哋会讨论吓使徒保罗喺圣灵启示下提到嘅几种特质。（请读歌罗西书3:10-14）我哋亦都会睇吓喺传道工作上，可以点样表现呢啲特质。

 3．新品格嘅其中一种特质系乜嘢？

³ 喺劝勉我哋穿上新品格之后，保罗描述到新品格其中一种显著嘅特质——唔偏心。佢话：“唔在乎系希腊人抑或犹太人，有受割礼嘅抑或冇受割礼嘅，系外国人抑或西徐亚人，系奴隶抑或自由人。”a喺会众里面，弟兄姊妹之间点解唔应该因为种族、民族，或者社会地位唔同而有差别呢？因为真基督徒“都系一体”。（歌罗西书3:11；加拉太书3:28）

 4．（甲）上帝嘅仆人应该以点样嘅态度待人？（乙）乜嘢情况对基督徒嘅团结系一个挑战？

⁴ 无论信徒同工或者其他人嘅社会地位、种族背景系点样嘅，穿上新品格嘅人都会尊重佢哋，顾及佢哋嘅尊严。（罗马书2:11）但系，对某啲地区嘅人嚟讲，呢个可能系个挑战。就好似喺南非，地区曾经被划分为白人区、黑人区，或者混血人居住区。而家好多见证人仲住喺呢啲按种族嚟划分嘅地区。所以，为咗鼓励南非嘅弟兄“开阔心胸”，中央长老团喺2013年10月批准咗一个特别嘅安排，帮助佢哋彼此认识。（哥林多后书6:13）佢哋具体点样做呢？

5,6．（甲）上帝嘅组织喺南非做咗乜嘢安排嚟强化上帝子民之间嘅关系？（请睇吓课文开头嘅图片）（乙）有乜嘢成果？

⁵ 语言或种族唔一样嘅两群会众，会安排喺周末一齐活动。呢两群会众嘅弟兄姊妹会一齐传道，一齐聚会，互相邀请对方到自己屋企交往。几百个会众参加咗呢个安排，根据分部办事处收到嘅报告，除咗弟兄姊妹，连非见证人对呢个安排都有好好嘅评价。例如，一个传教士受到感动，话：“我唔系见证人，但系我好想讲，你哋嘅传道工作组织得非常之好，唔同种族之间充满团结嘅精神。”呢个安排对我哋嘅弟兄姊妹有乜嘢影响呢？

⁶ 诺玛系一个讲科萨语嘅姊妹。一开始，佢唔系好想邀请英语会众嘅白人弟兄姊妹去自己简陋嘅屋企。不过，同白人弟兄姊妹一齐传道，喺佢哋屋企交往之后，佢感叹话：“佢哋同我哋冇乜嘢唔同啊！”所以，轮到科萨语会众邀请英语会众嘅弟兄姊妹交往嘅时候，诺玛准备咗一餐饭嚟招待佢哋。诺玛提到客人当中一位白人长老，话：“令我印象深刻嘅系，佢居然唔介意坐喺咁矮嘅塑胶箱度。”通过呢个持续嘅安排，好多弟兄姊妹识到新朋友，佢哋都决心继续喺交往方面开阔心胸。

 7．点解我哋要继续以怜悯之心待人？

⁷ 撒但嘅制度被毁灭之前，我哋会一直面对考验，例如，失业、严重嘅健康问题、迫害、天灾、因罪行而遭受损失等难题。喺遭遇苦难或者面对逆境嗰阵，我哋要怀住真挚嘅怜恤之情互相扶持。怜悯之心会推使我哋喺行动上表现仁慈。（以弗所书4:32）新品格嘅呢啲特质会帮助我哋效法上帝，安慰其他人。（哥林多后书1:3,4）

 8．我哋对会众嘅所有人表现怜恤同仁慈，可以带嚟乜嘢好结果？请举例。

⁸ 喺会众里面，有啲弟兄姊妹嚟自国外，有啲生活艰难。我哋可以点样对佢哋表现更多关注呢？我哋可以同佢哋做朋友，帮助佢哋睇出自己喺会众系有价值嘅。（哥林多前书12:22,25）丹尼卡尔从菲律宾搬咗去日本，我哋嚟睇吓佢嘅经历。佢喺工作嘅地方受到唔公平嘅对待。后来，佢参加咗耶和华见证人嘅聚会。丹尼卡尔话：“参加聚会嘅几乎都系日本人，不过佢哋好热情欢迎我，就好似识咗好耐嘅老朋友噉。”弟兄姊妹继续仁慈体贴噉对待丹尼卡尔，使佢喺属灵上不断进步。佢最后受咗浸，而家系一个长老。会众嘅其他长老都将丹尼卡尔同佢太太珍妮弗视为会众嘅福分，佢哋话：“丹尼卡尔同珍妮弗过住简单嘅先驱生活，喺先追求王国方面立下好榜样。”（路加福音12:31）

9,10．喺传道工作上向人表现怜恤会得到乜嘢奖赏？请举例。

⁹ 我哋向其他人分享王国信息，就系“对所有人行善”。（加拉太书6:10）出于对移民嘅怜恤，好多见证人努力学习佢哋嘅语言。（哥林多前书9:23）噉样做带嚟好多福分。例如，喺澳大利亚一个叫蒂芬妮嘅先驱姊妹，为咗帮助布里斯班市嘅斯瓦希里语会众而学习佢哋嘅语言。虽然对蒂芬妮嚟讲，学习呢种语言要付出好大嘅努力，不过佢嘅生活变得更充实更有意义。佢话：“如果你希望自己嘅传道工作更加丰富多彩，去外语会众服务一定好啱你。呢种感觉就好似唔使离开自己嘅城市都可以出国旅游噉。你可以真正体会到乜嘢系国际性嘅弟兄团体，而且亲身感受到弟兄姊妹之间嘅团结有几咁奇妙。”

¹⁰ 我哋亦都嚟睇吓一个日本家庭嘅例子。女儿佐规子话：“喺90年代，我哋一家人传道嗰时经常会遇到嚟自巴西嘅移民。我哋会翻开佢哋自己嘅葡萄牙语圣经，俾佢哋睇一啲经文，例如启示录21:3,4或者诗篇37:10,11,29。佢哋一边睇一边留心听我哋讲，有时仲流出眼泪。”呢家人继续向移民表现怜恤。佐规子话：“我哋睇到佢哋真系好渴求真理，于是全家都开始学习葡萄牙语。”之后，呢个家庭帮手成立咗一个葡萄牙语会众。多年来，好多移民得到呢个家庭嘅帮助，成为上帝嘅仆人。佐规子又话：“学习葡萄牙语的确要落好多心机，但系我哋得到嘅福分远远超过我哋所付出嘅努力。我哋真系好感激耶和华。”（请读使徒行传10:34,35）

11,12．（甲）点解怀住正确嘅动机穿上新品格咁重要？（乙）乜嘢可以帮助我哋保持谦卑？

¹¹ 我哋穿上新品格嘅动机应该系想荣耀耶和华，而唔系要得到人嘅称赞。要紧记，如果任由骄傲嘅精神喺内心滋长，就算完美嘅天使都会犯罪。（参考以西结书28:17）有罪嘅人要避免骄傲自大就更加唔容易嘞！虽然系噉，我哋仲系能够穿上新品格，表现谦卑。乜嘢可以帮助我哋穿上谦卑呢？

¹² 为咗保持谦卑，我哋每日都要拨出时间沉思上帝嘅话语。（申命记17:18-20）我哋由其要认真沉思耶稣嘅教导同埋佢喺谦卑方面树立嘅杰出榜样。（马太福音20:28）耶稣甚至为门徒洗脚。（约翰福音13:12-17）我哋都需要不断祷告，求上帝赐圣灵帮助我哋避免任何自以为高人一等嘅倾向。（加拉太书6:3,4；腓立比书2:3）

13．谦卑可以带嚟乜嘢益处？

¹³ 请读箴言22:4。谦卑系每个支持正确崇拜嘅人都需要具备嘅特质，可以带嚟好多益处。谦卑可以帮助我哋喺会众促进和睦，维系团结。培养同强化谦卑呢种特质亦都使我哋得享上帝所赐嘅分外恩典。使徒彼得话：“其实你哋所有人都要以谦卑相待，好似束腰服事人一样，因为上帝同高傲嘅人为敌，但系就赐分外恩典俾谦卑嘅人。”（彼得前书5:5）

14．喺表现温和同耐心方面，边个系最完美嘅榜样？

¹⁴ 喺今日嘅世界，表现温和同耐心往往俾人视为软弱。呢种睇法同圣经真理有好大差别！呢啲美好嘅特质源于全宇宙力量最强大嘅嗰位——耶和华上帝。喺表现温和同耐心方面，佢系最完美嘅榜样。（彼得后书3:9）我哋可以谂吓，当亚伯拉罕同罗得向上帝提出问题嘅时候，通过天使耶和华点样回答佢哋。（创世记18:22-33；19:18-21）仲有，面对以色列嘅反叛，耶和华点样喺超过1500年嘅时间里面一直保持忍耐。（以西结书33:11）

15．喺表现温和同耐心方面，耶稣树立咗乜嘢榜样？

¹⁵ 耶稣“性情温和”。（马太福音11:29）佢好有耐心噉包容门徒嘅弱点。喺地上传道期间，耶稣要忍受宗教领袖嘅无理指责。甚至遭受唔公正嘅审判而被处死嗰阵，佢仲系表现出温和同耐心。当耶稣喺苦刑柱上忍受折磨嗰时，佢向天父祷告，求天父宽恕嗰啲处决自己嘅人，话：“因为佢哋唔知道自己喺度做紧啲乜嘢”。（路加福音23:34）喺痛苦同压力之下，耶稣仍然表现温和同耐心，的确系杰出嘅好榜样！（请读彼得前书2:21-23）

16．我哋可以用乜嘢实际嘅方法表现温和同耐心？

¹⁶ 我哋可以点样表现温和同耐心？喺写俾信徒同工嘅信入面，保罗提到其中一个方法：“无论边个有理由对人不满，都要继续彼此包容，彼此甘心宽恕。耶和华点样甘心宽恕咗你哋，你哋亦都要点样甘心宽恕人。”（歌罗西书3:13）当然，我哋服从呢个劝告系需要表现温和同耐心嘅。我哋乐于宽恕弟兄姊妹，就可以喺会众促进和睦，维系团结。

17．点解温和同耐心咁重要？

¹⁷ 身为基督徒，我哋一定要穿上温和同耐心，因为呢个系我哋得救嘅必要条件。（马太福音5:5；雅各书1:21）更重要嘅系，通过表现呢啲特质，我哋可以荣耀耶和华，仲可以帮助其他人听从圣经嘅劝告。（加拉太书6:1；提摩太后书2:24,25）

18．爱同唔偏心有乜嘢关系？

¹⁸ 以上考虑过嘅所有特质都同爱有密切嘅关系。例如，门徒雅各因为佢嘅弟兄欺贫爱富，所以俾劝告佢哋。佢指出噉样嘅行为违反咗“要爱人如己”呢条至尊嘅律法。然后佢补充话：“你哋如果仲系偏心，就系犯罪嘞”。（雅各书2:8,9）相反，爱会推动我哋，唔会因为学历、种族，或者社会地位而对人有任何偏见。冇错，我哋唔应该只系表面上对人唔偏心，而系要使呢种特质成为我哋内在为人嘅一部分。

19．点解穿上爱咁重要？

¹⁹ 爱亦都系“有耐心、和蔼仁慈”同埋“唔自大”嘅。（哥林多前书13:4）要持续不断噉同其他人分享王国信息，就真系需要有耐心、仁慈，同埋谦卑先至得。（马太福音28:19）同样，具备呢啲特质可以帮助我哋同会众嘅所有弟兄姊妹更容易相处。表现呢种爱可以带嚟乜嘢奖赏呢？我哋表现呢种爱，可以使会众更加团结，荣耀耶和华，亦都吸引对真理感兴趣嘅人。所以，经文对新品格嘅描述，作咗一个有力嘅总结：“除咗呢一切之外，仲要穿上爱，因为爱能够完美噉维系团结。”（歌罗西书3:14）

20．（甲）我哋应该问吓自己乜嘢问题？点解？（乙）我哋期待点样嘅未来？

²⁰ 我哋每一个人都应该问吓自己，“为咗除去同弃绝旧品格，我仲需要做啲乜嘢？”我哋要热切祷告求上帝帮助，努力改变任何使我哋失去承受上帝王国资格嘅行为态度。（加拉太书5:19-21）我哋亦都要问：“我可以点样继续更新自己思想背后嘅动力呢？”（以弗所书4:23,24）对所有基督徒嚟讲，穿上同保持新品格系一个持续不断嘅过程，直到我哋身心完美。试谂吓，当身边所有人都喺新世界恢复完美，穿上新品格，到时生活会几咁美好！