上帝对地球有乜嘢旨意？

上帝创造地球系要俾人居住，做人类嘅家园。上帝创造第一对夫妇亚当同夏娃系住喺地上，而唔系住喺天上嘅。上帝创造嘅天使，先至住喺天上。（约伯记38:4,7）佢俾人类嘅祖先亚当住喺一个叫“伊甸”嘅乐园里面。（创世记2:15-17）亚当同佢嘅后代本来都有希望永远喺地上生活。 请读诗篇37:29；115:16

起初，只有“伊甸”系乐园。第一对夫妇要生儿育女，直到整个地球都住满佢哋嘅后代，最后成为乐园。（创世记1:28）地球永远系人类嘅家园，唔会被毁灭。 请读诗篇104:5

请观看短片《点解上帝要创造地球？》

亚当同夏娃唔听从上帝嘅吩咐，所以上帝将佢哋赶出“伊甸园”。人类失去乐园之后，冇人能够靠自己嘅努力使地球再次成为乐园。圣经话：“大地落喺恶人嘅手入面”。（约伯记9:24） 请读创世记3:23,24

上帝系唔系冇办法实现佢对人类本来嘅旨意呢？唔系。上帝系全能嘅，佢讲得出，就做得到。（以赛亚书45:18）上帝一定会实现佢对人类本来嘅旨意。 请读诗篇37:11,34

君王耶稣统治期间，会使地球成为乐园。将来会有一场大战，叫“哈米吉多顿”。到时，耶稣会带领好嘅天使将上帝嘅所有仇敌消灭，之后佢会将坏天使嘅首领撒但囚禁1000年。而上帝嘅子民就会得到耶稣嘅指引同保护，渡过呢场毁灭，喺地上嘅乐园里面永远快乐噉生活落去。 请读启示录20:1-3；21:3,4

上帝几时先至会铲除地上嘅坏人坏事呢？耶稣预告有一个综合嘅“征象”，表明呢个日子好快就会到。今日世界嘅坏人坏事越来越多，越来越坏。呢个表明我哋而家就生活喺“呢个制度嘅末期”嘞。 请读马太福音24:3,7-14,21,22

耶稣喺天上统治地球嘅1000年期间，会消除一切使人受苦嘅事。（以赛亚书9:6,7；11:9）佢仲会除去人嘅罪，亦即系话，上帝会通过耶稣消除疾病、衰老、死亡。 请读以赛亚书25:8；33:24

服从上帝嘅人可以喺乐园里面生活。（约翰一书2:17）耶稣吩咐门徒去揾出愿意服从上帝嘅人，教导佢哋明白点样做可以令上帝喜悦。今日，有几百万人得到上帝嘅帮助，努力做佢喜欢嘅事，噉就有希望喺地上乐园里面生活。（西番雅书2:3）喺耶和华见证人嘅王国聚会所，我哋会学识点样做更好嘅丈夫同爸爸，做更好嘅妻子同妈妈，大人同小朋友都一齐学习圣经，崇拜上帝，从中得益。 请读弥迦书4:1-4